މިއަދުގެ ބައްދަލުވުމުގައި ދިވެހިރާއްޖެއަށް ޤާނޫނާ ޚިލާފަށް 149 ކިލޯގެ މަސްތުވާތަކެތި އެތެރެކޮށް، ގދ.ހުޅުވާރުލު ކިޔާ ފަޅުރަށެއްގައި ފޮރުވާފައި ބެހެއްޓުމުގެ ކުށުގައާއި އެކަމުގައި ބައިވެރިވުމުގެ ކުށުގައި ހައްޔަރުކޮށްފައިވާ ފަރާތްތަކުގެ މައްޗަށް އެ މައްސަލައިގައި ޕްރޮސިކިއުޓަރ ޖެނެރަލްގެ ފަރާތުން ދަޢުވާކުރެއްވިއިރު އެ މައްސަލައިގެ ތަޙްޤީޤު ފުރިހަމަވެފައިނުވާތީއާއި، އެ މައްސަލައިގެ އިޚްތިޞާޞް ނެތް ކޯޓަކަށް އެ މައްސަލަ ހުށަހަޅުއްވާފައިވުމުންނާއި، އެހެން ކޯޓަކަށް އެ މައްސަލައިގެ ދަޢުވާކުރެއްވިއިރު އެފަދަ މައްސަލަތަކުގައި ދަޢުވާކުރުމަށް ޤާނޫނުން ލާޒިމުކޮށްފައިވާ މުއްދަތު ފާއިތުވެފައިވާކަމަށް މަޢުލޫމާތު ލިބޭތީއާއި، އަދި އެކަމުގެ ސަބަބުން މަސްތުވާތަކެތި ޓްރެފިކްކުރުމުގެ އެފަދަ ބޮޑު މައްސަލައެއް ކޯޓުތަކުން ބޭރުކޮށް، އެ މައްސަލައިގައި ހައްޔަރުކޮށްފައިވާ އެންމެން ދޫކޮށްލުމަށް ކޯޓުން ޢަމުރުކުރައްވާފައިވާކަމަށް ބަޔާންކުރައްވައި، ހުށަހަޅުއްވާފައިވާ މައްސަލައަކާ ގުޅޭގޮތުން ޕްރޮސިކިއުޓަރ ޖެނެރަލްއާ ބައްދަލުކޮށް މައުލޫމާތު ސާފުކުރެއްވިއެވެ. މީގެއިތުރުން، އެހެނިހެން މައްސަލަތަކުގެ ތެރެއިން، ޤާނޫނު ނަންބަރު 2010/3 (ޓެކްސް ނެގުމާބެހޭ އިދާރީ ޤާނޫނު) ގެ 56 ވަނަ މާއްދާގެ (ހ) ގެ 1 ވަނަ ނަންބަރުގައިވާ ގޮތުގެ މަތިން، ޓެކްސް އެޕީލް ޓްރައިބިއުނަލްގެ ހުސްވެފައިވާ މަޤާމަށް މެންބަރަކު ޢައްޔަނުކުރެއްވުމަށްޓަކައި، ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކޮށް ގޮތެއް ނިންމުމުގެ މައްސަލައިގެ ސުންގަޑި ކަނޑައެޅުއްވިއެވެ. އެގޮތުން ކޮމިޓީގެ މެންބަރުންނަށް އެއްބަސްވެވިފައިވަނީ މައްސަލަ ނިންމުމުގެ ސުންގަޑިއެއްކަމަށް 16 ފެބްރުއަރީ 2021 އެވެ. އަދި ނަންފުޅު ފޮނުއްވާފައިވާ ފަރާތްތަކާމެދު ޢާންމުންގެ ޚިޔާލު ހޯދުމަށް ފުރުޞަތު 14 ފެބްރުއަރީ 2021 ގެ ނިޔަލަށް ކޮމިޓީން ނިންމިއެވެ.
© 2024 ރައްޔިތުންގެ މަޖިލިސްގެ އިދާރާA