މިއަދުގެ ބައްދަލުވުމުގެ ފުރަތަމަ ކަމެއްގެ ގޮތުގައި ކުރިއަށްގެންގޮސްފައިވަނީ، ހިޔުމަން ރައިޓްސް ކޮމިޝަން އޮފް ދަ މޯލްޑިވްސްގެ ހުސްވެފައިވާ މެންބަރުކަމުގެ މަޤާމަށް މެންބަރަކު ޢައްޔަންކުރެއްވުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލަ ދިރާސާކުރެއްވުމެވެ. އެގޮތުން ހުޅުވާލި ފުރުޞަތުގައި އެ މައްސަލަ ނިންމާނެ ސުންގަޑިއަކީ 31 ޖުލައި 2024 ކަމުގައި ކަނޑައެޅުމަށް ގައްދޫ ދާއިރާގެ މެންބަރު މުޙައްމަދު ޢަލީ ހުށަހަޅުއްވައި ދާންދޫ ދާއިރާގެ މެންބަރު މުޙައްމަދު ފަޟީލް ތާއީދުކުރެއްވިއެވެ.

މި މައްސަލައިގައި ވޯޓު ދެއްވިގޮތުގެ ތަފްޞީލު ތިރީގައިއެވަނީއެވެ.

ދެވަނަ ކަމެއްގެ ގޮތުގައި ކުށުގެ ރެކޯޑު ސާފުކުރުމާ ގުޅޭގޮތުން ހުޅުވާލި ފުރުޞަތުގައި، ކުށުގެ ރެކޯޑު ސާފުކުރުމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން، އިލެކްޝަންސް ކޮމިޝަން، އެންޓި-ކޮރަޕްޝަން ކޮމިޝަން އަދި ރައީސުލްޖުމްހޫރިއްޔާގެ އޮފީހަށް ސިޓީ ފޮނުއްވުމަށް ދާންދޫ ދާއިރާގެ މެންބަރު މުޙައްމަދު ފަޟީލް ހުށަހަޅުއްވައި ގުރައިދޫ ދާއިރާގެ މެންބަރު ހަނާން މުޙައްމަދު ރަޝީދު ތާއީދުކުރެއްވިއެވެ.

ތިންވަނަ ކަމެއްގެ ގޮތުގައި އާންމުންގެ ޝަކުވާއެއް އޮތްތޯ ބެލުމަށްޓަކައި ރައްޔިތުންގެ މަޖިލީހުގެ ގަވާއިދުގެ 201 ވަނަ މާއްދާގެ (ރ) ގައިވާ ގޮތުގެމަތިން، އިޢުލާންކުރާނެ ދުވަހެއް ކަނޑައެޅުމާއި އަދި އެ އިޢުލާންގެ މުއްދަތު ކަނޑައެޅުމާ ގުޅޭގޮތުން ހުޅުވާލި ފުރުޞަތުގައި، އާންމުންގެ ޝަކުވާއެއް އޮތްތޯ ބެލުމަށްޓަކައި ރައްޔިތުންގެ މަޖިލީހުގެ ގަވާއިދުގެ 201 ވަނަ މާއްދާގެ (ރ) ގައިވާ ގޮތުގެމަތިން 17 ޖުލައި 2024 އިން 28 ޖުލައި 2024 ގެ ނިޔަލަށް އިޢުލާން ކުރުމަށް ކުޅުދުއްފުށި ދެކުނު ދާއިރާގެ މެންބަރު ފަރުޙަތު މުޙައްމަދު ހުށަހަޅުއްވައި ދާންދޫ ދާއިރާގެ މެންބަރު މުޙައްމަދު ފަޟީލް ތާއީދުކުރެއްވިއެވެ.

ހަތަރު ވަނަ ކަމެއްގެ ގޮތުގައި، މަޤާމުގެ ޝަރުތު ފުރިހަމަވޭތޯ ބެލުމަށްޓަކައި ރައްޔިތުންގެ މަޖިލީހުގެ ގަވާއިދުގެ 201 ވަނަ މާއްދާގެ (ހ) ގައިވާ ގޮތުގެމަތިން އިދާރީ ޕެނަލް އެކުލަވާލުމާ ގުޅޭގޮތުން ހުޅުވާލި ފުރުޞަތުގައި، ރައީސުލްޖުމްހޫރިއްޔާ ނަން ފޮނުއްވާފައިވާ ފަރާތުގެ މަޤާމުގެ ޝަރުތު ހަމަވޭތޯ ބެލުމަށްޓަކައި އެކުލަވާލެވޭ އިދާރީ ޕެނަލުގައި ލީގަލް އޮފިސަރ ފަރުޙަތު ޙަބީބު، ލީގަލް އޮފިސަރ މަރްޔަމް ހުދާ، އަދި ލީގަލް އޮފިސަރ ޢާއިޝަތު ޢަބްދުލްﷲ ޙަމީދު ހިމެނުމަށް ދާންދޫ ދާއިރާގެ މެންބަރު މުޙައްމަދު ފަޟީލް ހުށަހަޅުއްވައި ކުޅުދުއްފުށި ދެކުނު ދާއިރާގެ މެންބަރު ފަރުޙަތު މުޙައްމަދު ތާއީދުކުރެއްވިއެވެ.

އޭގެ އިތުރުން ރައީސުލްޖުމްހޫރިއްޔާ ނަން ފޮނުއްވާފައިވާ ފަރާތާ އިންޓަރވިއުކުރާނެ ތާރީޚެއް ކަނޑައެޅުމާ ގުޅޭގޮތުން ހުޅުވާލި ފުރުޞަތުގައި އިންޓަރވިއުކުރާނެ ތާރީޚަކީ 29 ޖުލައި 2024 ކަމުގައި ކަނޑައެޅުމަށް ދާންދޫ ދާއިރާގެ މެންބަރު މުޙައްމަދު ފަޟީލް ހުށަހަޅުއްވައި ގުރައިދޫ ދާއިރާގެ މެންބަރު ހަނާން މުޙައްމަދު ރަޝީދު ތާއީދުކުރެއްވިއެވެ.

މިއަދުގެ ބައްދަލުވުމުގެ ފަހު ކަމެއްގެ ގޮތުގައި ކުރިއަށްގެންގޮސްފައިވަނީ، ކޮމިޓީގެ މަސައްކަތްތަކުގެ ދާއިރާގެ ތެރޭގައި ހިމެނޭ މިނިސްޓްރީ އޮފް ސޯޝަލް އެންޑް ފެމެލީ ޑިވެލޮޕްމަންޓުގެ 2022 އަދި 2023 ވަނަ އަހަރުގެ އަހަރީ ރިޕޯޓާ ގުޅޭގޮތުން އެ އިދާރާގެ ބޭފުޅުންނާ ބައްދަލުކޮށް މަޢުލޫމާތު ސާފުކުރެއްވުމެވެ.

މި ބައްދަލުވުމުގައި، އެ މިނިސްޓްރީގެ 2022 އަދި 2023 ވަނަ އަހަރުގެ އަހަރީ ރިޕޯޓާ ގުޅޭގޮތުން ތައްޔާރުކޮށްފައިވާ ޕްރެޒެންޓޭޝަނެއް ކޮމިޓީގެ މެންބަރުންނާ ޙިއްޞާކުރެއްވިއެވެ. އެ ޕްރެޒެންޓޭޝަންގައި އެ އިދާރާއިން ވޭތުވެދިޔަ ދެ އަހަރު ކުރައްވާފައިވާ މަސައްކަތްތަކާއި، އަދި އެ އިދާރާއަށް 2022 އަދި 2023 ވަނަ އަހަރު ލިބިފައިވާ ބަޖެޓު ހޭދަކޮށްފައިވާ ގޮތުގެ ތަފްސީލާއި އެ އިދާރާގެ މަސައްކަތްތައް އިތުރަށް ތަރައްޤީކޮށް ހަރުދަނާކުރެއްވުމަށްޓަކައި ކުރައްވާފައިވާ މަސައްކަތްތަކާއި އަދި އެ މަސައްކަތްތައް ތަންފީޒުކުރުމުގައި ދިމާވެފައިވާ ގޮންޖެހުންތަކާ ގުޅޭގޮތުން ކޮމިޓީގެ މެންބަރުނާ މަޢުލޫމާތު ހިއްސާކުރައްވާފައިވެއެވެ.

އަދި އެ އިދާރާއިން ކުރައްވަމުންގެންދަވާ މަސައްކަތްތަކާއި، އިދާރާގެ މެންޑޭޓުގެ ދަށުގައި ހިމެނޭ މަސައްކަތްތައް ތަންފީޒު ކުރުމުގައި ދިމާވާ ދަތިތަކާއި ގޮންޖެހުންތަކާ ގުޅޭގޮތުން ކޮމިޓީއިން ކުރެއްވި ސުވާލުތަކަށް ޖަވާބުދެއްވިއެވެ.