މިއަދުގެ ބައްދަލުވުމުގައި އެޖެންޑާ ކޮށްފައިވަނީ ކޮމިޓީއަށް ލިބިފައިވާ ސިޓީތަކާ ގުޅޭގޮތުން މަޝްވަރާކޮށް ގޮތެއް ނިންމުމެވެ. މިގޮތުން ފުރަތަމަކަމަކަށް ކުރިއަށް ގެންދެވީ، މޯލްޑިވްސް މީޑިއާ ކައުންސިލް އިން ފޮނުވާފައިވާ ސިޓީއާ މެދު ގޮތެއް ނިންމުމެވެ. މިގޮތުން، މޯލްޑިވްސް މީޑިއާ ކައުންސިލްގެ ޤާނޫނުއަށް އިސްލާހު ގެނައުމުގެ ބިލު ރައްޔިތުންގެ މަޖިލީހަށް މިހާތަނަށް ހުށަހަޅުއްވާފައި ނުވާތީ، އެ ބިލު ލިބި، އެ ބިލު ދިރާސާކުރުމުގެ މަސައްކަތް މިނިވަން މުއައްސަސާތަކުގެ ކޮމިޓީން ކުރިއަށްގެންދަވާއިރު، އެ ބިލާ ގުޅިގެން ބައްދަލުކުރެއްވުމަށް އެ ކޮމިޓީއަށް ފެނިވަޑައިގަންނަވާ ފަރާތްތަކާ ބައްދަލުކުރައްވާނެކަމަށާއި މޯލްޑިވްސް މީޑިއާ ކައުންސިލްގެ ޤާނޫނަށް އިޞްލާޙު ގެނައުމުގެ ބިލަށް އެ ކައުންސިލުން ހުށަހަޅުއްވަން ބޭނުންފުޅުވާ ޚިޔާލެއް ވާނަމަ، އެ ބިލު ޑްރާފްޓްކުރުމުގެ މަރުހަލާގައި އެ އިޞްލާޙުތައް ބިލުގައި ހިމެނުމާމެދު ބަންޑާރަނައިބުގެ އޮފީހާއެކު މަޝްވަރާކުރައްވައި، އެ އިޞްލާޙުތައް އެ އޮފީހާ ހިއްސާކުރެއްވުމަށް އެ ކައުންސިލްގައި ދެންނެވުމަށް ތުލުސްދޫ ދާއިރާގެ މެންބަރު އިބްރާހީމް ނަސީމް ހުށަހަޅުއްވާ ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް ތާޢީދުކުރެއްވިއެވެ.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލު ތިރީގައި އެވަނީއެވެ.

ވޯޓުގެ ނަތީޖާ: މޯލްޑިވްސް މީޑިއާ ކައުންސިލްގެ ޤާނޫނުއަށް އިސްލާހު ގެނައުމުގެ ބިލު ރައްޔިތުންގެ މަޖިލީހަށް މިހާތަނަށް ހުށަހަޅުއްވާފައި ނުވާތީ، އެ ބިލު ލިބި، އެ ބިލު ދިރާސާކުރުމުގެ މަސައްކަތް މިނިވަން މުއައްސަސާތަކުގެ ކޮމިޓީން ކުރިއަށްގެންދަވާއިރު، އެ ބިލާ ގުޅިގެން ބައްދަލުކުރެއްވުމަށް އެ ކޮމިޓީއަށް ފެނިވަޑައިގަންނަވާ ފަރާތްތަކާ ބައްދަލުކުރައްވާނެކަމަށާއި މޯލްޑިވްސް މީޑިއާ ކައުންސިލްގެ ޤާނޫނަށް އިޞްލާޙު ގެނައުމުގެ ބިލަށް އެ ކައުންސިލުން ހުށަހަޅުއްވަން ބޭނުންފުޅުވާ ޚިޔާލެއް ވާނަމަ، އެ ބިލު ޑްރާފްޓްކުރުމުގެ މަރުހަލާގައި އެ އިޞްލާޙުތައް ބިލުގައި ހިމެނުމާމެދު ބަންޑާރަނައިބުގެ އޮފީހާއެކު މަޝްވަރާކުރައްވައި، އެ އިޞްލާޙުތައް އެ އޮފީހާ ހިއްސާކުރެއްވުމަށް އެ ކައުންސިލްގައި ދެންނެވުމަށް.

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 6

ފެންނަކަމަށް ވޯޓު ދެއްވި މެންބަރުންގެ ޢަދަދު: 5

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 5 (ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް، ތުލުސްދޫ ދާއިރާގެ މެންބަރު އިބްރާހީމް ނަސީމް، ފެލިދޫ ދާއިރާގެ މެންބަރު އާދަމް ޒާހިރު، ހިތަދޫ އުތުރު ދާއިރާގެ މެންބަރު މުޙައްމަދު ސިނާން އަދި ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން)

ފާސްވުމަށް ބޭނުންވާ ޢަދަދު: 4

ނިންމުން: ހުށަހެޅުން ފާސްވެފައި.

އެހެންކަމުން، މޯލްޑިވްސް މީޑިއާ ކައުންސިލްގެ ޤާނޫނުއަށް އިސްލާހު ގެނައުމުގެ ބިލު ރައްޔިތުންގެ މަޖިލީހަށް މިހާތަނަށް ހުށަހަޅުއްވާފައި ނުވާތީ، އެ ބިލު ލިބި، އެ ބިލު ދިރާސާކުރުމުގެ މަސައްކަތް މިނިވަން މުއައްސަސާތަކުގެ ކޮމިޓީން ކުރިއަށްގެންދަވާއިރު، އެ ބިލާ ގުޅިގެން ބައްދަލުކުރެއްވުމަށް އެ ކޮމިޓީއަށް ފެނިވަޑައިގަންނަވާ ފަރާތްތަކާ ބައްދަލުކުރައްވާނެކަމަށާއި މޯލްޑިވްސް މީޑިއާ ކައުންސިލްގެ ޤާނޫނަށް އިޞްލާޙު ގެނައުމުގެ ބިލަށް އެ ކައުންސިލުން ހުށަހަޅުއްވަން ބޭނުންފުޅުވާ ޚިޔާލެއް ވާނަމަ، އެ ބިލު ޑްރާފްޓްކުރުމުގެ މަރުހަލާގައި އެ އިޞްލާޙުތައް ބިލުގައި ހިމެނުމާމެދު ބަންޑާރަނައިބުގެ އޮފީހާއެކު މަޝްވަރާކުރައްވައި، އެ އިޞްލާޙުތައް އެ އޮފީހާ ހިއްސާކުރެއްވުމަށް އެ ކައުންސިލްގައި ދެންނެވުމަށް ފާސްކުރެވުނެވެ.

ދެން ކުރިއަށް ގެންދެވީ، ނޭޝަނަލް އިންޓެގްރިޓީ ކޮމިޝަނުން ފޮނުވާފައިވާ ސިޓީއާ މެދެ ގޮތެއް ނިންމެވުމެވެ. މިގޮތުން، ދިވެހިރާއްޖޭގެ މިވަގުތުގެ އިޤްތިޞާދީ ޙާލަތަށް ރިޢާޔަތްކުރައްވައި، ދައުލަތުގެ ޚަރަދުތައް ކުޑަކުރެއްވުމަށް ދައުލަތުގެ އެންމެހައި މުއައްސަސާތަކަށް، ރައީސުލްޖުމްހުރިއްޔާގެ އޮފީހުގެ ނަންބަރު 9/2024/57/(PRA)POL-1 (3 ޖުލައި 2024) ސިޓީން އަންގަވާފައިވާ މި ދަނޑިވަޅުގައި، މަޤާމުތަކަށް މީހުން ހަމަޖެއްސެވުމަކީ އެންމެ އެކަށީގެންވާ ގޮތެއް ނޫންކަމަށް ކޮމިޓީން ދެކޭ ކަމަށާއި 2025 ވަނަ އަހަރަށް ލަފާކުރާ ދައުލަތުގެ ބަޖެޓު ރައްޔިތުންގެ މަޖިލީހަށް ހުށަހަޅައި އެ މަސައްކަތް ކުރިއަށްގެންދަވާއިރު މިނިވަން މުއައްސަސާތަކުގެ ބަޖެޓުގެ ކަންބޮޑުވުންތަކަށް އެ ކޮމިޓީން ރިޢާޔަތްކޮށްދެއްވާނެކަމަށްވެސް ނޭޝަނަލް އިންޓެގްރިޓީ ކޮމިޝަންގައި ދެންނެވުމަށް ނިންމެވިއެވެ.

އެއަށްފަހު ދެން ކުރިއަށް ގެންދެވީ އެންޓި-ކޮރަޕްޝަން ކޮމިޝަނުން ފޮނުވާފައިވާ ސިޓީ އާ މެދު ގޮތެއް ނިންމެވުމެވެ. އެސިޓީ އަކީ ސިއްރު ޖަހާފައި ފޮނުވާފައިވާ ސިޓީއެއްކަމުން މި ސިޓީގެ މަސައްކަތް ކުރިއަށް ގެންދެވީ ކޮމިޓީ ސިއްރު ކޮށްގެންނެވެ. އެގޮތުން، އެ ސިޓީގައި ބަޔާންކޮށްފައިވާ އެންޓި-ކޮރަޕްޝަން ކޮމިޝަންގެ 2025 ވަނަ އަހަރަށް ކަނޑައަޅުއްވާފައިވާ ބަޖެޓް ސީލިންގއާ ގުޅޭގޮތުން ފާހަގަކުރައްވާފައިވާ ކަންކަމަށް، 2025 ވަނަ އަހަރަށް ލަފާކުރާ ދައުލަތުގެ ބަޖެޓު ރައްޔިތުންގެ މަޖިލީހަށް ހުށަހަޅައި، އެ މަސައްކަތް ކުރިއަށްގެންދަވާއިރު މިނިވަން މުއައްސަސާތަކުގެ ބަޖެޓުގެ ކަންބޮޑުވުންތަކަށް، ކޮމިޓީން ރިޢާޔަތްކޮށްދެއްވާނެކަމަށް އެ ކޮމިޝަންގައި ދެންނެވުމަށް ނިންމެވިއެވެ.

 ދެން ކުރިއަށް ގެންދެވީ، ކޮމިޓީއަށް ކުރިން ހުށަހެޅިފައިވާ ސިޓީއަކާ ގުޅިގެން މި ކޮމިޓީގެ އިޙްތިސާސްގެ ތެރޭގައި ހިމެނޭ ކޮމިޝަންތަކުގެ ހާޒިރީތައް ދިރާސާކުރުމުގެ މަސައްކަތެވެ. މިގޮތުން މިހާރު ހާޒިރީތައް ފޮނުވާފައިވާ ގޮތަކީ އެންމެ އެކަށީގެންވާގޮތް ކަމަށް ކޮމިޓީއަށް ނުފެންނާތީ، ކޮމިޝަންގެ މެންބަރުން 1 ޖަނަވަރީ 2024 އިން ފެށިގެން 30 އެޕްރީލް 2024 ގެ ނިޔަލަށް ކޮމިޝަނަށް ހާޒިރުވެވަޑައިގެންނެވި ތަފްސީލު (ކޮމިޓީއަށް ވަޑައިގަންނަވަން ޖެހޭ ގަޑި، ސައިން އިން އަދި ސައިން އައުޓް ވި ގަޑި އަދި ވަކިވަކި މެންބަރުންގެ ތަފްޞީލު ވަކިން އެނގޭނެހެން) ހޯއްދެވުމަށާއި ކޮމިޝަންގެ މެންބަރުން ކޮމިޝަނަށް ހާޒިރުވެވަޑައިގަތުމާ ގުޅޭގޮތުން އެއްވެސް އުސޫލެއް ނުވަތަ ނިންމުމެއް ކޮމިޝަނުން ނިންމަވާފައިވާނަމަ، އެ އުސޫލު ނުވަތަ ނިންމުން ވެސް ކޮމިޓީއާ ހިއްސާކޮށްދެއްވުމަށް އެ ކޮމިޝަންތަކަށް ސިޓީ ފޮނުވުމަށް ނިންމެވިއެވެ.