މިއަދުގެ ބައްދަލުވުމުގައި ކުރިއަށް ގެންގޮސްފައިވަނީ، ކޮމިޓީއަށް ހުށަހެޅިފައިވާ މައްސަލަތަކާ ގުޅޭގޮތުން މަޝްވަރާކޮށް ގޮތެއް ނިންމެވުމެވެ. މިގޮތުން ފުރަތަމަކަމަކަށް ކުރިއަށް ގެންދެވީ، އިލެކްޝަންސް ކޮމިޝަންގެ މެންބަރުކަމަށް ޢައްޔަނުކުރެއްވުމަށްޓަކައި، ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ ނަންފުޅު ދިރާސާކުރުމުގެ މައްސަލަ ކުރިއަށް ގެންދާނެ ގޮތް ކަނޑައެޅުމެވެ. އެގޮތުން، މި މައްސަލަ ނިންމާނެ ސުންގަޑިއަކީ 28 އޮކްޓޫބަރު 2024 ކަމަށް ތުލުސްދޫ ދާއިރާގެ މެންބަރު އިބްރާހީމް ނަސީމް ހުށަހަޅުއްވާ، ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް ތާޢީދުކުރެއްވިއެވެ. ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން އިލެކްޝަންސް ކޮމިޝަންގެ މެންބަރުކަމަށް ޢައްޔަނުކުރެއްވުމަށްޓަކައި، ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ ނަންފުޅު ދިރާސާކުރުމުގެ މައްސަލަ ނިންމާނެ ސުންގަޑި އަކީ 28 އޮކްޓޫބަރު 2024 ކަމަށް ފާސްވިއެވެ.

އެ މައްސަލަ ދިރާސާ ކުރެއްވުމަށްޓަކައި ނަން ހުށަހެޅިފައިވާ ފަރާތްތަކުގެ ޝަރުތު ހަމަވޭތޯ ބެލުމަށް ރައްޔިތުންގެ މަޖިލީހުގެ ގަވާއިދުގައި ބަޔާންކުރާ ގޮތުގެމަތިން އެކުލަވާ މުވައްޒަފުންގެ ޕެނަލްއަކީ ޝަހުޒާދު ސައީދު، އައިޝަތު ހަމީދު އަދި ފާތުމަތު ނަދާ ކަމަށް ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ހުށަހަޅުއްވާ ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް ތާޢީދުކުރެއްވިއެވެ. ް، ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން އިލެކްޝަންސް ކޮމިޝަންގެ މެންބަރުކަމަށް ޢައްޔަނުކުރެއްވުމަށްޓަކައި، ފޮނުއްވާފައިވާ ފަރާތުގެ ޝަރުތު ހަމަވޭތޯ ބެލުމަށް ރައްޔިތުންގެ މަޖިލީހުގެ ގަވާއިދުގައި ބަޔާންކުރާ ގޮތުގެމަތިން އެކުލަވާ މުވައްޒަފުންގެ ޕެނަލްއަކީ ޝަހުޒާދު ސައީދު، އައިޝަތު ހަމީދު އަދި ފާތުމަތު ނަދާ ކަމަށް ފާސްވިއެވެ.

އިލެކްޝަންސް ކޮމިޝަންގެ މެންބަރުކަމަށް ޢައްޔަނުކުރެއްވުމަށްޓަކައި، ފޮނުއްވާފައިވާ ފަރާތާ ގުޅޭގޮތުން އާންމުންގެ އެއްވެސް ޝަކުވާއެއްވޭތޯ ބެލުމަށްޓަކައި 24 އޮކްޓޫބަރު ގެ 14:00 ގެ ނިޔަލަށް އިޢުލާން ކުރުމަށާއި އެފަރާތާ އިންޓަވިއު ކުރުން 28 އޮކްޓޫބަރު 2024 މާރިޗު 2024 ގައި ކުރިއަށް ގެންދިއުމަށް ފުވައްމުލަކު ދެކުނު ދާއިރާގެ މެންބަރު އިބްރާހީމް ޙުސައިން ހުށަހަޅުއްވާ ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް ތާޢީދުކުރެއްވިއެވެ. ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން އިލެކްޝަންސް ކޮމިޝަންގެ މެންބަރުކަމަށް ޢައްޔަނުކުރެއްވުމަށްޓަކައި، ފޮނުއްވާފައިވާ ފަރާތާ ގުޅޭގޮތުން އާންމުންގެ އެއްވެސް ޝަކުވާއެއްވޭތޯ ބެލުމަށްޓަކައި 24 އޮކްޓޫބަރު ގެ 14:00 ގެ ނިޔަލަށް އިޢުލާން ކުރުމަށާއި އެފަރާތާ އިންޓަވިއު ކުރުން 28 އޮކްޓޫބަރު 2024 މާރިޗު 2024 ގައި ކުރިއަށް ގެންދިއުމަށް ފާސްވިއެވެ.

އެއަށް ފަހު ދެން ކުރިއަށް ގެންދެވީ، ކޮމިޓީއަށް ލިބިފައިވާ ސިޓީތަކާ ގުޅޭގޮތުން މަޝްވަރާކޮށް ގޮތެއް ނިންމުމެވެ. މިގޮތުން، ރަޖިސްޓަރީކޮށްގެންނާއި، ރަޖިސްޓަރީ ނުކޮށް ހިންގާ ބައެއް މީޑިއާތަކުން ފަތުރާ ޚަބަރާ ގުޅޭގޮތުން ރައީސުލްޖުމްހޫރިއްޔާގެ އޮފީހުން ފޮނުވާފައިވާ ސިޓީ އާ ގުޅޭގޮތުން މަޝްވަރާކުރުމެވެ. މިގޮތުން މި މައްސަލާގައި މޯލްޑިވްސް މީޑިއާ ކައުންސިލް އަދި މޯލްޑިވްސް ބްރޯޑްކާސްޓީންގ ކޮމިޝަންގެ މެންބަރުން ކޮމިޓީއަށް ހާޒިރުކޮށް މައުލޫމާތު ސާފުކުރުމަށް ކެލާ ދާއިރާގެ މެންބަރު އިބްރާހީމް ޝަރީފް ހުށަހަޅުއްވާ ތުލުސްދޫ ދާއިރާގެ މެންބަރު އިބްރާހީމް ނަސީމް ތާޢީދުކުރެއްވިއެވެ. ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން އ މޯލްޑިވްސް މީޑިއާ ކައުންސިލް އަދި މޯލްޑިވްސް ބްރޯޑްކާސްޓީންގ ކޮމިޝަންގެ މެންބަރުން ކޮމިޓީއަށް ހާޒިރުކޮށް މައުލޫމާތު ސާފުކުރުމަށް ފާސްވިއެވެ.

1 ޖަނަވަރީ 2024 އިން 30 އެޕްރީލް 2024 ގެ ނިޔަލަށް މިނިވަން މުއައްސަސާތަކުގެ މެންބަރުންގެ ހާޟިރީ ކޮމިޓީގެ ވަޓްސްއަޕް ގްރޫޕްގައި ހިއްސާކުރުމަށްވެސް ކޮމިޓީން ނިންމެވިއެވެ.

އެންމެ ފަހުކަމެއްގެ ގޮތުގައި ކުރިއަށް ގެންދެވީ، މިދިޔަ ދައުރުގައި ކޮމިޓީއަށް ހުށަހެޅިފައިވާ ރައްޔިތުންގެ މަޖިލީހުގެ މެންބަރުންގެ ޢަދަދު ކޮންމެ 5 އަހަރަކުން އިތުރުވަމުންދާ ދިއުމާމެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅާފައިވާ ޤަރާރުގެ މަސައްކަތް ނުނިމި އޮތުމާއެކު، އެ ޤަރާރުގެ ސުންގަޑިކަމަށް ކޮމިޓީން އޭރު ނިންމާފައިވަނީ އޮކްޓޫބަރު 2024 ގެ ނިޔަލަށް ކަމަށްވާތީ އެ ޤަރާރުގެ ސުންގަޑި އިތުރުކުރުމާ ގުޅޭގޮތުން މަޝްވަރާކުރުމެވެ. މިގޮތުން މި ޤަރާރުގެ ސުންގަޑި 2025 ވަނަ އަހަރުގެ މެއި 15 ވަނަ ދުވަހުގެ ނިޔަލަށް އިތުރުކުރުމަށް ތުލުސްދޫ ދާއިރާގެ މެންބަރު އިބްރާހީމް ނަސީމް ހުށަހަޅުއްވާ ހެންވޭރު ހުނޅަގު ދާއިރާގެ މެންބަރު އަލީ އިބްރާހީމް ތާޢީދުކުރެއްވިއެވެ. ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ޤަރާރުގެ ސުންގަޑި 2025 ވަނަ އަހަރުގެ މެއި 15 ވަނަ ދުވަހުގެ ނިޔަލަށް އިތުރުކުރުމަށް ފާސްވިއެވެ.