މިއަދުގެ ބައްދަލުވުމުގައި ކުރިއަށް ގެންދެވީ ކޮމިޓީގެ މަސައްކަތްތައް ކުރިއަށް ގެންދާނެގޮތަކާމެދުއެވެ. އެގޮތުން ސަލާމަތީ ޚިދުމަތްތަކާބެހޭ ކޮމިޓީއަށް ހުށަހެޅޭ މައްސަލަތަކާއި އަދި އެނޫންވެސް ކަންކަމުގައި ކޮމިޓީން ޢަމަލުކުރާނެ ގޮތުގެ އުސޫލާމެދު ކޮމިޓީގައި މަޝްވަރާކުރެއްވިއެވެ.

އިސްވެދެންނެވުނު އުސޫލާމެދު ކޮމިޓީން މަޝްވަރާކުރެއްވުމަށްފަހު އުސޫލު އޮތްގޮތަށް ފާސްކުރެއްވުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި މާމިގިލީ ދާއިރާގެ މެންބަރު ޤާސިމް އިބްރާހީމް ތާއީދު ކުރެއްވިއެވެ. މި ހުށަހެޅުއްވުމަށް މެންބަރުން ވޯޓު ދެއްވިގޮތުގެ ތަފްޞީލު ތިރީގައި އެވަނީއެވެ.

ވޯޓު: ސަލާމަތީ ޚިދުމަތްތަކާބެހޭ ކޮމިޓީއަށް ހުށަހެޅޭ މައްސަލަތަކާއި އަދި އެނޫންވެސް ކަންކަމުގައި ކޮމިޓީން ޢަމަލުކުރާނެ ގޮތުގެ އުސޫލު އޮތްގޮތަށް ފާސްކުރުމަށް

ކޮމިޓީގެ ޖުމްލަ މެންބަރުންގެ ޢަދަދު :13

ހާޒިރުވެ ތިއްބެވި މެންބަރުންގެ ޢަދަދު: 9

ފެންނަކަމަށް ވޯޓު ދެއްވި މެންބަރުންގެ ޢަދަދު : 8

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 8

ފާސްވުމަށް ބޭނުންވާ ޢަދަދު: 5

ނިންމުން: ހުށަހެޅުން ފާސްވެފައި.

އެހެންކަމުން، ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ސަލާމަތީ ޚިދުމަތްތަކާބެހޭ ކޮމިޓީއަށް ހުށަހެޅޭ މައްސަލަތަކާއި އަދި އެނޫންވެސް ކަންކަމުގައި ކޮމިޓީން ޢަމަލުކުރާނެ ގޮތުގެ އުސޫލު ވަނީ ފާސްވެފައެވެ.

އެއަށްފަހު، ކޮމިޓީގައި މަޝްވަރާކުރެއްވީ 19 ވަނަ މަޖިލީހުގެ މަސައްކަތްތަކުގެ ތެރެއިން ނުނިމި ހުރި މައްސަލަތައް ކުރިއަށްގެންދާނެ ގޮތަކާގުޅޭގޮތުންނެވެ. އަދި ނުނިމިހުރި މައްސަލަތަކުގެ ތާވަލެއް އެކުލަވާލާ މައްސަލަތަކާމެދު ޢަމަލުކުރާނެ ގޮތެއް ކަނޑައެޅުން ދެންއޮންނަ ބައްދަލުވުމެއްގައި ނިންމުމަށް މާމިގިލި ދާއިރާގެ މެންބަރު ޤާސިމް އިބްރާހީމް ހުށަހަޅުއްވައި މާފަންނު އުތުރު ދާއިރާގެ މެންބަރު މުޙައްމަދު ނާޡިމް ތާއީދު ކުރެއްވިއެވެ.

ދެން ކޮމިޓީގައި މަޝްވަރާކުރެއްވީ ކޮމިޓީގެ މެންޑޭޓްގެ ތެރޭގައި ހިމެނޭ އިދާރާތަކާ ބައްދަލުކުރެއްވުމާ ގުޅޭގޮތުންނެވެ. އެގޮތުން އަންނަ ހަފްތާގައި އިދާރާތަކާ ބައްދަލުކުރުމަށް ފެނިވަޑައިގަންނަވާކަމަށް ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ހުށަހަޅުއްވާ ތުޅާދޫ ދާއިރާގެ މެންބަރު ޢަބްދުލްޙަންނާން އަބޫބަކުރު ތާއީދު ކުރެއްވިއެވެ.