މިއަދުގެ ބައްދަލުވުމުގައި ފުރަތަމަ އޮތީ ކޮމިޓީގައި ޢަމަލުކުރާނެ އުޞޫލުތަކާމެދު މަޝްވަރާކޮށް ގޮތެއް ނިންމުމެވެ. އެގޮތުން، ކޮމިޓީގެ ބައްދަލުވުމަކަށް އެޖެންޑާ ކޮށް އެބައްދަލުވުން ފަށަންޖެހޭ ވަގުތު ހަމަވިއިރު ކޮމިޓީގެ ޤާނޫނީ ޢަދަދު ހަމަނުވާނަމަ ކޮމިޓީގެ ބައްދަލުވުން ފަށަން ހަމަޖެހިފައިވާ ވަގުތުން ފެށިގެން، 10 (ދިހަ) މިނިޓަށް މަޑުކުރުމަށްފަހު ކެންސަލްކުރުމަށް ފެންނަކަމަށް ގަމު ދާއިރާގެ މެންބަރު ޔޫސުފް ނަޝީދު ހުށަހަޅުއްވައި ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު ތާޢީދުކުރެއްވި ހުށަހެޅުންވަނީ ކޮމިޓީގައި އެވަގުތު ހާޒިރުވެވަޑައިގެން ތިއްބެވި އެއްވެސް މެންބަރަކު އިޢުތިރާޒް ނުކުރައްވާތީ އެގޮތަށް ފާސްވެފައެވެ. މީގެ އިތުރަށް ކޮމިޓީގައި ޢަމަލުކުރާނެ ގޮތުގެ އުޞޫލަށް އިތުރު އެއްވެސް އިޞްލާހެއް ހުށަހެޅިފައިނުވެއެވެ. އެހެންކަމުން، ކޮމިޓީގައި ޢަމަލުކުރާނެ ގޮތުގެ އުޞޫލު ފާސްކުރެއްވުމަށް ކޮމިޓީގައި އެވަގުތު ހާޒިރުވެވަޑައިގެން ތިއްބެވި އެއްވެސް މެންބަރަކު އިޢުތިރާޒް ނުކުރައްވާތީ، ގެނެވުނު ބަދަލާއެކު ވަނީ ކޮމިޓީގައި ޢަމަލުކުރާނެ ގޮތުގެ އުޞޫލު ފާސްވެފައެވެ.

އެއަށްފަހު، އެންޓި- ކޮރަޕްޝަން ކޮމިޝަނުން އަމިއްލަ ކުންފުނިތައް ރަޖިސްޓްރީކުރުމުގެ ނިޒާމަށް ގެންނަން ފެންނަ ބަދަލުތައް ދެނެގަނެ ކަމާބެހޭ ފަރާތްތަކަށް ލަފައާއި އިރުޝާދު ދިނުމަށް ތައްޔާރުކޮށް 9 ނޮވެންބަރު 2023 ގައި ޝާއިޢުކޮށްފައިވާ ދިރާސާތަކުގެ ހޯދުންތަކާއި އިރުޝާދުތައް ހިމެނޭ މަޢުލޫމާތު ކަރުދާސް މެންބަރުންނާ މެއިލްގެ ޒަރިއްޔާއިން ޙިއްޞާކުރެއްވުމަށްފަހު، އެ މައްސަލަ ކޮމިޓީގެ ސްޓޭޓަސްއިން ނެގުމަށް ނިންމެވިއެވެ.

ދެން،  އެންޓި-ކޮރަޕްޝަން ކޮމިޝަނުގެ ފަރާތުން އެ ކޮމިޝަނުގެ ނަންބަރު 123-ES/161/2023/11 (30 އޮކްޓޫބަރު 2023) ސިޓީއިން އަންގަވާފައިވާ ކަންކަމުން ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑްގެ އިދާރީ ގިނަ މަސައްކަތް ހުއްޓުމަކަށް އައިސް ކުންފުންޏަށް މާލީ ގިނަ ގެއްލުންތައްވާނެތީ، އެ ކޮމިޝަނުގެ ސިޓީއާ ގުޅޭގޮތުން އެ ކުންފުނިން ޢަމަލުކުރާނެ ގޮތުގެ ލަފައަކަށް އެދި 02 ނޮވެންބަރު 2023ގައި ފޮނުއްވާފައިވާ މައްސަލައިގެ ޙާލަތު ދެމިއޮތްތޯ ބެއްލެވުމަށް ހައުސިންގ ޑިވެލޮޕްމަންޓް ކޯޕަރޭޝަނަށް ސިޓީ ފޮނުއްވުމަށް ގަމު ދާއިރާގެ މެންބަރު ޔޫސުފް ނަޝީދު ހުށަހެޅިއްވި ހުށަހެޅުމަށް އެއްވެސް މެންބަރަކު އިޢުތިރާޒު ނުކުރައްވާތީ ފާސްވިއެވެ.

އަދި، ސަރުކާރު ޙިއްޞާވާ ކުންފުނިތަކުގެ ޙާލަތު ދިރާސާކުރެއްވުމަށް ސަބް-ކޮމިޓީތަކެއް އެކުލަވާލުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހެޅުއްވި ހުށަހެޅުއްވުމަށް މާވަށު ދާއިރާގެ މެންބަރު އަޙްމަދު ޝާކިރު ތާޢީދުކުރައްވި ހުށަހެޅުއްވުމަށް އެއްވެސް މެންބަރަކު އިޢުތިރާޒްނުކުރައްވާތީ، އެ ހުށަހެޅުއްވުން ފާސްވިއެވެ. އަދި ސަބް ކޮމިޓީތައް ހޮވުމުގެ މަސައްކަތް އެހެން ބައްދަލުވުމެއްގައި ކުރިއަށްގެންދިއުމަށް ނިންމެވިއެވެ. މިއާއެކު، ސަރުކާރު ޙިއްޞާވާ ކުންފުނިތަކުގެ މޮނިޓަރިންގެ ޒިންމާ މަތިކޮށްފައިވަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަންއާކަމުން އެ ބޯޑު ކޮމިޓީއަށް ހާޒިރުކުރަން މާފަންނު އުތުރު ދާއިރާގެ މެންބަރު މުޙައްމަދު ނާޘިމް ހުށަހަޅުއްވައި ކިނބިދޫ ދާއިރާގެ މެންބަރު ޢަލީ އަޝްރަޤް ތާޢީދުކުރެއްވި ހުށަހެޅުންވަނީ ކޮމިޓީގައި އެވަގުތު ހާޒިރުވެވަޑައިގެން ތިއްބެވި އެއްވެސް މެންބަރަކު އިޢުތިރާޒް ނުކުރައްވާތީ އެގޮތަށް ފާސްވެފައެވެ.