މިއަދުގެ ބައްދަލުވުމުގައި ކުރިއަށް ގެންދެވީ ކޮމިޓީގައި ޢަމަލުކުރާނެ ބައެއް އުސޫލުތަކާ ގުޅޭގޮތުން މަޝްވަރާކުރެއްވުމެވެ. އެގޮތުން ކޮމިޓީގެ ޤާނޫނީ ޢަދަދަކީ 3/1 (4 މެންބަރުން) ކަމުގައި ރައްޔިތުންގެ މަޖިލީހުގެ ގަވާއިދުގައި ކަނޑައަޅުއްވާފައިވާތީ، އެ ޢަދަދަށް އެއްވެސް ބަދަލެއް ނުގެނެސް އޮތްގޮތަށް ބޭއްވުމަށް ކޮމިޓީން ނިންމެވިއެވެ. އަދި ކޮމިޓީން އެއްވެސް ކަމެއް ނިންމަވާއިރު، ހާޒިރުވެ ތިބެންޖެހޭ މެންބަރުންގެ ޢަދަދު (ވޯޓިންގ ކޯރަމް) އަކީ 6 މެންބަރުން ކަމުގައި ކަނޑައެޅުމަށް ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުށަހަޅުއްވައި، ހުރާ ދާއިރާގެ މެންބަރު އަނާރާ ނަޢީމް ތާއިދުކުރެއްވިއެވެ. މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓުގެ ނަތީޖާ: ކޮމިޓީގެ ވޯޓިންގ ކޯރަމްއަކީ 6 މެންބަރުން ކަމަށް ކަނޑައެޅުން

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 9

ފެންނަކަމަށް ވޯޓު ދެއްވި މެންބަރުންގެ ޢަދަދު : 8

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 8

ފާސްވުމަށް ބޭނުންވާ ޢަދަދު: 5

ނިންމުން: ހުށަހެޅުން ފާސްވެފައި.

އެހެންކަމުން، ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ކޮމިޓީގެ ވޯޓިންގ ކޯރަމްއަކީ 6 މެންބަރުން ކަމަށް ކަނޑައެޅުއްވިއެވެ.

އެއަށްފަހު ރައްޔިތުންގެ މަޖިލީހުގެ ގަވާއިދުގެ 163 ވަނަ މާއްދާގެ (ހ) ގައިވާ ގޮތުގެމަތިން މީހުން ހާޒިރުކުރުމަށް ބޭއްވޭ ކޮމިޓީގެ ބައްދަލުވުމެއްގެ ޤާނޫނީ ޢަދަދަކީ 4 މެންބަރުންކަމަށް ކަނޑައެޅުމަށް މަނަދޫ ދާއިރާގެ މެންބަރު ހުސްނީ މުބާރަކް ހުށަހަޅުއްވައި، އިހަވަންދޫ ދާއިރާގެ މެންބަރު އަޙްމަދު ނަޞީރު ތާއިދުކުރެއްވިއެވެ.

ވޯޓުގެ ނަތީޖާ: ރައްޔިތުންގެ މަޖިލީހުގެ ގަވާއިދުގެ 163 ވަނަ މާއްދާގައިވާ ގޮތުގެ މަތިން މީހުން ހާޒިރުކުރުމަށް ބޭއްވޭ ކޮމިޓީގެ ބައްދަލުވުމެއްގެ ޤާނޫނީ ޢަދަދަކީ 4 މެންބަރުންކަމަށް ކަނޑައެޅުން

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 9

ފެންނަކަމަށް ވޯޓު ދެއްވި މެންބަރުންގެ ޢަދަދު : 8

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 11

ފާސްވުމަށް ބޭނުންވާ ޢަދަދު: 5

ނިންމުން: ހުށަހެޅުން ފާސްވެފައި.

އެހެންކަމުން، ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން މީހުން ހާޒިރުކުރުމަށް ބޭއްވޭ ކޮމިޓީގެ ބައްދަލުވުމެއްގެ ޤާނޫނީ ޢަދަދަކީ 4 މެންބަރުންކަމަށް ކަނޑައެޅުއްވިއެވެ.

އެއަށްފަހު ކޮމިޓީގައި ޢަމަލުކުރާނެ ބައެއް އުސޫލުތައް ކޮމިޓީއަށް ވަޑައިގެން ތިއްބެވި މެންބަރުންގެ އިއްޠިފާޤުން ނިންމެވިއެވެ. އަދި ކޮމިޓީގެ މަސައްކަތްތައް ކުރިއަށްގެންދާނެ ގޮތަކާ ގުޅޭގޮތުން މެންބަރުން މަޝްވަރާކުރެއްވުމަށްފަހު، އެކިއެކި މިނިސްޓްރީތަކުން އެކުލަވާލާފައިވާ ގަވާއިދުތައް ޤާނޫނާ ތަޢާރުޒުވޭތޯ ބެލުމަށް ނިންމެވިއެވެ. މިގޮތުން ފުރަތަމަ މިނިސްޓްރީ އޮފް އެޑިއުކޭޝަންގެ ގަވާއިދުތައް ދިރާސާކުރެއްވުމަށް ނިންމެވިއެވެ. އަދި އެހެން މިނިސްޓްރީތަކުގެ ގަވާއިދުތައް ދިރާސާކުރައްވާނެ ގޮތުގެ ވޯކްޕްލޭނެއް ތައްޔާރުކޮށް ދެން ބާއްވަވާ ކޮމިޓީގެ ބައްދަލުވުމެއްގައި މަޝްވަރާކުރުމަށް ކޮމިޓީން ނިންމެވިއެވެ.

އެއަށްފަހު، ޤާނޫނު ނަންބަރު 2008/6 (ޢާންމު ގަވާއިދުތަކާބެހޭ ޤާނޫނު) ގެ ޖަދުވަލު 1 އަދި 2 ގައި ހިމެނިފައިވާ ގަވާއިދުތަކާ ގުޅޭގޮތުން، އެޓަރނީ ޖެނެރަލްގެ އޮފީހުން އެކުލަވާލަންޖެހޭ ބިލުތަކުގެ މަސައްކަތް މިހާރު ގޮސްފައިވާ ހިސާބާއި އެ ބިލުތައް ރައްޔިތުންގެ މަޖިލީހަށް ހުށަހެޅުއްވޭނެ ތާރީޚެއް ސާފުކުރެއްވުމަށް އެ އޮފީހަށް ސިޓީ ފޮނުއްވުމަށް ކޮމިޓީން ނިންމެވިއެވެ.