މިއަދުގެ ބައްދަލުވުމުގައި މުދާ އެތެރެކުރާ ބޯޓު ފަހަރުން ދިވެހި ރުފިޔާއިން ނަގަމުން އަންނަ ފީތައް (ސްޓީވްޑޯރިންގ ޗާރޖް) އެޕްރީލް މަހުން ފެށިގެން ޑޮލަރުން ނެގުމަށް މޯލްޑިވްސް ޕޯޓްސް ލިމިޓެޑުން ނިންމުމާ ގުޅިގެން އެކަމާ ގުޅޭގޮތުން މޯލްޑިވްސް ޓްރޭޑް އެސޯސިއޭޝަންގެ ކަންބޮޑުވުންތައް ކޮމިޓީގެ މެންބަރުންނާ ހިއްސާކުރުމަށް އެ އެސޯސިއޭޝަނުން އެދިލައްވާފައިވާތީ އެ އެސޯސިއޭޝަންގެ ބޭފުޅުންނާ ބައްދަލުކުރިއެވެ. އެގޮތުން، ބައްދަލުވުމުގައި ހިއްސާކުރެއްވި ކަންކަމުގެ ތެރޭގައި ދިވެހި ރުފިޔާއިން ނަގަމުން އަންނަ ފީތައް (ސްޓީވްޑޯރިންގ ޗާރޖް) އެޕްރީލް މަހުން ފެށިގެން ޑޮލަރުން ނެގުމަށް މޯލްޑިވްސް ޕޯޓްސް ލިމިޓެޑުން ނިންމާފައިވަނީ ވިޔަފާރިވެރިންނާ މަޝްވަރާކުރުމެއްނެތިކަމަށާއި، އެ ބަދަލު ގެނައުމުގެ ކުރިން ވިޔަފާރިވެރިންނަށް އެކަށީގެންވާ މުއްދަތެއް ދެއްވާފައިނުވާކަމަށާއި، ދިވެހިރާއްޖެއަށް ކުރިމަތިވެފައިވާ ޑޮލަރުގެ ތާށިކަމާއެކު، މުދާ އެތެރެކުރާ ފަރާތްތަކުން ދިވެހި ފައިސާއިން ދައްކަމުން އައި ފީތައް އެމް.ޕީ.އެލްއަށް ޑޮލަރުން ދެއްކުމަށް މަޖުބޫރުވެގެން ދިއުމަކީ ވިޔަފާރިވެރިންނަށް ބޮޑު އަގުގައި ޑޮލަރު ގަންނަން މަޖުބޫރުވާނެކަމެއްކަމަށާއި އޭގެ އެއް ސަބަބަކީ ދިވެހިރާއްޖޭގެ ބޭންކުތަކުން ވިޔަފާރިވެރިންނަށްވެސް ބޭނުންވާވަރަށް ޑޮލަރު ގަންނަން ލިބެން ނެތުންކަމަށާއި، ނަތީޖާއަކަށް ވެގެންދާނީ ވިޔަފާރިވެރިން ބޮޑު އަގުދީގެން ޑޮލަރު ގަތުމަށް ކުރާ ހޭދައިގެ ނިސްބަތުން މުދަލުގެ އަގު އުފުލިގެން ދިއުންކަމަށާއި، އިޤްތިޞާދީ ގޮތުން ދަތި ދުވަސްވަރެއްގައި އަދި ޚާއްޞަކޮށް ޑޮލަރުގެ ދަތިކަން އިންތިހާއަށް ބޮޑުވެފައިވާ ދަނޑިވަޅެއްގައި މިއީ ގެނައުން އެންމެ ރަނގަޅު ބަދަލެއް ނޫންކަމަށް ފާހަގަކުރެއްވިއެވެ.