މިއަދުގެ ބައްދަލުވުމުގައި މުދާ އެތެރެކުރާ ބޯޓު ފަހަރުން ދިވެހި ރުފިޔާއިން ނަގަމުން އަންނަ ފީތައް (ސްޓީވްޑޯރިންގ ޗާރޖް) އެޕްރީލް މަހުން ފެށިގެން ޑޮލަރުން ނެގުމަށް މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އިން ނިންމުމާ ގުޅިގެން މޯލްޑިވްސް ޓްރޭޑް އެސޯސިއޭޝަންއިން ފޮނުއްވާފައިވާ މައްސަލައާ ގުޅޭގޮތުން މިނިސްޓްރީ އޮފް އިކޮނޮމިކް ޑިވެލޮޕްމަންޓް ޓްރޭޑް އަދި މޯލްޑިވްސް ޕޯޓްސް ލިމިޓެޑްގެ ބޭފުޅުންނާ ބައްދަލުކުރިއެވެ. އެގޮތުން، ބައްދަލުވުމުގައި ހިއްސާކުރެއްވި ކަންކަމުގެ ތެރޭގައި ސްޓީވްޑޯރިންގ ފީ އަކީ އުޅަނދުފަހަރަށް މުދާ އަރުވާ، މުދާ ބޭލުމަށް ޕޯޓުތަކުން އެ ބޯޓެއްގެ އެޖެންޓުންގެ އަތުން ނަގާ ފީއެއްކަމަށާއި، ދިވެހިރާއްޖެއަށް މުދާ އެތެރެކުރަމުންދަނީ ސީ.އައި.އެފް (ކޮސްޓް، އިންޝުއަރެންސް، ފްރައިޓް) ކޮށް ނުވަތަ އެފް.އޯ.ބީ (ފްރީ އޮން ބޯޑް) ކޮށްކަމަށާއި، ސީ.އައި.އެފް (ކޮސްޓް، އިންޝުއަރެންސް، ފްރައިޓް) ކޮށް މުދާ ގެންނައިރު ފްރައިޓް ޗަރޖް ދައްކަނީ ޑޮލަރުންކަމަށާއި އޭގެ ތެރޭގައި ސްޓީވްޑޯރިންގ ޗަރޖްވެސް ހިމެނޭކަމަށް އެމް.ޕީ.އެލްއިން ފާހަގަކުރެއްވިއެވެ. ދިވެހިރާއްޖެއިން ބޭރުގައި ހުންނަ ޝިޕް އޯނަރު ނުވަތަ ޝިޕް އެޖެންޓަށް ފްރައިޓް ޗަރޖް ދެއްކުމުން، އެ އެޖެންޓުގެ ވެސެލް ދިވެހިރާއްޖޭގެ ޕޯޓަށް އަންނާތީވެ، އެ ޕޯޓުން ދޭ ޚިދުމަތަށް ދޭ އަގެއްގެ ގޮތުގައި އެ ފަރާތުން ޕޯޓުގެ ޗަރޖަސް ޔޫ.އެސް ޑޮލަރުން ދިވެހިރާއްޖޭގައި ހުންނަ އެޖެންޓަށް ފޮނުވާނެކަމަށާއި އެމް.ޕީ.އެލްއަށް ސްޓީވްޑޯރިންގ ޗަރޖް ދިވެހި ރުފިޔާއިން ދައްކަންޖެހޭތީ ދިވެހިރާއްޖޭގެ ބްލެކް މާކެޓަށް އެ ފައިސާ ވިއްކުމަށްފަހު އެމް.ޕީ.އެލްއަށް ދިވެހި ރުފިޔާއިން ދައްކަމުންދާކަމަށް އެމް.ޕީ.އެލްއިން ފާހަގަކުރެއްވިއެވެ.

2011 ވަނަ އަހަރުން ފެށިގެން ސްޓީވްޑޯރިންގ ޗަރޖް އެމްޕީއެލްއިން ނަގަމުން އައީ ރުފިޔާއިންކަމަށާއި ދިވެހިރާއްޖޭގައި ޝިޕިންގ އެޖެންޓުންގައި ގޮތުގައި މިހާރު މަސައްކަތްކުރަމުންދާ ދެ ޕާޓީ، ޓީ.ޓީ.އެސް އަދި އެމް.އެސް.އެސް.، އާ މި ބަދަލު ގެނައުމުގެ ކުރިން މަޝްވަރާތައްކޮށްފައިވާނެކަމަށާއި މިނިސްޓްރީ އޮފް އިކޮނޮމިކް ޑިވެލޮޕްމަންޓުން ފެބްރުވަރީ 2024 ގައި ކުންފުނީގެ ނިންމުމަށް އިޢުތިރާޒެއް ނެތްކަމަށް އެންގުމާގުޅިގެން ޝިޕިންގ އެޖެންޓުންނަށް އެކަން އަންގާފައިވާނެކަމަށާއި އެޕްރީލް 2024 އިން ފެށިގެން ސްޓީވްޑޯރިންގ ޗަރޖަސް ޑޮލަރުން ދެއްކުމަށް ރަސްމީކޮށް އެންގުމުގެ ކުރިން ދޮޅުމަސްދުވަހުގެ މުއްދަތެއް ޝިޕިންގ އެޖެންޓުންނަށް ދެވިފައިވާކަމަށް އެމް.ޕީ.އެލްއިން ފާހަގަކުރެއްވިއެވެ.

ސްޓީވްޑޯރިންގ ޗަރޖް ޑޮލަރުން ނެގުމާމެދު މިނިސްޓްރީ އޮފް އިކޮނޮމިކް ޑިވެލޮޕްމަންޓުގެ އިޢުތިރާޒެއް ނެތްކަމަށް ނިންމާފައިވަނީ މޯލްޑިވްސް ޕޯޓްސް ލިމިޓެޑްއަށް ޑޮލަރު ލިބުމުގައި ހުރި ދަތިކަމާއި، ޕޯޓަށް ބޭނުންވާ މެޝިނަރީ ހޯދުމަށްޓަކައި ކުންފުންޏަށް ހުރި ދަތިތަކެއް ހައްލުކުރުމަށްޓަކައި އެ ކުންފުނިން ނެންގެވި ވިޔަފާރީގެ ނިންމުމެއްކަމަށްވުމުންކަމަށާއި މިނިސްޓްރީން އެ ނިންމުން ނިންމާފައިވަނީ އެގޮތަށް ޑޮލަރުން ފައިސާ ނަގަން ފެށުމުގެ ސަބަބުން ވިޔަފާރިތަކަށް އިތުރަށް ފައިސާ ޚަރަދުކުރަންޖެހޭ ހާލަތެއް ކުރިމަތިވާނެކަމަކަށް ލަފާނުކުރެވޭތީއާއި، ސަބަބަކީ އެ ފައިސާއަކީ އެޑްވާންސްކޮށް ފްރައިޓް ޗަރޖް ދައްކާއިރު ދައްކާފައިހުންނަ ފައިސާއަކަށް ވުމުންކަމަށާއި އެފް.އޯ.ބީކޮށް މުދާ ގެންނަ ފަރާތްތަކަކީ މަދު ފަރާތްތަކަކަށްވެފައި އެއީ ކުޑަ ވޮލިއުމްއެއްކަމަށްވާތީ، އިޤްތިޞާދަށް މާބޮޑު އަސަރެއް ކުރާނެކަމަށް ލަފާކުރެވިފައިނުވާތީކަމަށް މިނިސްޓްރީން ފާހަގަކުރެއްވިއެވެ.

އެމް.ޕީ.އެލްއިން ނިންމި ނިންމުމަކީ ދިވެހިރާއްޖޭގެ އިޤްތިޞާދަށްޓަކައި ކޮންމެހެން ކުރަންޖެހޭ ކަމެއްކަމަށާއި، ސަބަބަކީ އެމް.ޕީ.އެލްއަށް ލިބެންޖެހޭ އާމްދަނީއެއް އެހެން ފަރާތަކުން އެ އާމްދަނީ އެހެން ގޮތަކަށް ބަދަލުކޮށްގެން އެއިން ކޮންމެވެސް ފައިދާއެއް ނެގުމަށްފަހު އެ އާމްދަނީ ދިވެހިރާއްޖޭގެ އިޤްތިޞާދުން ބޭރަށް އެހެން ގައުމަކަށް ފޮނުވުމަކީ ދިވެހިރާއްޖޭގެ އިޤްތިޞާދަށް ހުރި ގެއްލުމެއްކަމަށް ފެންނާތީއާއި، ސްޓީވްޑޯރިންގ ޗަރޖް ޔޫ.އެސް.ޑޮލަރުން ނަގާގޮތަށް ބަދަލުކުރުމާ ގުޅިގެން ކުންފުނީގެ ހިންގުމަށް ފަސޭހަވުމާއެކު، ކުންފުނީގެ އެފީޝިއެންސީ އިތުރުވެގެންދާނެކަމަށް ބެލެވޭތީއާއި އެކަމުގެ ސަބަބުން ދިވެހި ގައުމަށް ފައިދާވާނެކަމަށާއި، އެމް.ޕީ.އެލްއިން ޑޮލަރުން ނަގާ ފައިސާ ދިވެހިރާއްޖޭގައި ހުންނަ ބޭންކުތަކަށް މާރުކުރަމުންދަނީ 15.42 ރުފިޔާގެ ރޭޓުންކަމަށްވުމާއެކު ޑޮލަރުގެ ބްލެކްމާކެޓު މައްސަލަ ޙައްލުވުމަށް ކޮންމެވެސް ވަރެއްގެ ލުޔެއް ލިބިގެންދާނެކަމަށާއި އެހެންކަމުން މި ބަދަލު ގެނައުމަކީ ކޮންމެހެން ކުރަންޖެހޭ ކަމެއްކަމަށް ކުންފުންޏަށް ފެންނަކަމަށް އެމް.ޕީ.އެލްއިން ފާހަގަކުރެއްވިއެވެ.