Committee Meeting - People's Majlis of Maldives

ޚުލާސާ

މިއަދުގެ ބައްދަލުވުމުގައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ 2023 ވަނަ އަހަރުގެ އަހަރީ ރިޕޯޓާ ގުޅޭގޮތުން މަޢުލޫމާތު ސާފުކުރުމަށާއި، އެ ބޯޑުގެ މަސައްކަތްތަކާ ގުޅޭގޮތުން މަޝްވަރާކުރެއްވުމަށް، އެ ބޯޑުގެ ބޭފުޅުންނާ ބައްދަލުކުރެއްވިއެވެ. މިގޮތުން އެ ބޯޑުން މިދިޔަ އަހަރު ކުރައްވާފައިވާ މުޙިއްމު މަސައްކަތްތަކާއި، ބޯޑުގެ މަސައްކަތްތައް ކުރިއަށްގެންދިއުމަށް ދިމާވާ ގޮންޖެހުންތައް މެންބަރުންނާ ޙިއްޞާކުރެއްވިއެވެ. އަދި މެންބަރުން ބޭނުންފުޅުވާ ބައެއް މަޢުލޫމާތު ސާފުކުރެއްވުމަށް އެ ބޯޑަށް ސިޓީ ފޮނުއްވުމަށް ނިންމެވިއެވެ.

އެއަށްފަހު ސަރުކާރު ޙިއްޞާވާ ކުންފުނިތައް މައިގަނޑު 9 ދާއިރާއަކަށް ބެހުމަށްފަހު، އެ ކުންފުނިތަކާ ގުޅޭ މައްސަލަތައް ދިރާސާކުރެއްވުމަށް 9 ސަބް ކޮމިޓީއެއް ނެގުމަށް އެއްވެސް މެންބަރަކު އިއުތިރާޒްނުކުރައްވާތީ، ނިންމެވިއެވެ.

އަދި، ސަރުކާރު ޙިއްޞާވާ ކުންފުނިތަކާ ގުޅޭގޮތުން އެންޓި-ކޮރަޕްޝަން ކޮމިޝަނުން ބައްލަވާފައިވާ މައްސަލަތަކާއި، ކުންފުނިތައް ހަރުދަނާކުރުމަށް ކުރެވޭނެ ކަންތައްތަކާ ގުޅޭ މަޢުލޫމާތު ސާފުކުރެއްވުމަށް އެ ކޮމިޝަނާ ބައްދަލުކުރެއްވުމަށް ފުވައްމަލަކު ދެކުނު ދާއިރާގެ މެންބަރު އިބްރާހީމް ޙުސައިން ހުށަހެޅުއްވިއެވެ. މި ހުށަހެޅުއްވުމަށް އެއްވެސް މެންބަރަކު އިއުތިރާޒްނުކުރައްވާތީ، އެ ހުށަހެޅުއްވުން ފާސްވިއެވެ.