މިއަދުގެ ބައްދަލުވުމުގައި، ސޮވްރިން ޑިވެލޮޕްމަންޓް ފަންޑުގެ ބިލުގެ ސުންގަޑި ކަނޑައަޅައި، ބިލުގެ މަސައްކަތް ކުރިއަށް ގެންދާނެގޮތާ ގުޅޭގޮތުން މަޝްވަރާކުރެއްވިއެވެ. އެގޮތުން، ބިލާ ގުޅޭގޮތުން ކަމާގުޅުންހުރި ފަރާތްތަކުގެ ކޮމެންޓް ހޯދުމަށް މިއަދުން ފެށިގެން 7 ދުވަސް ދިނުމަށާއި، ބިލުގެ މަސައްކަތް ނިންމާނެ ސުންގަޑިއަކީ 23 ޖުލައި 2024 ކަމުގައި ކަނޑައެޅުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހެޅުއްވިއެވެ. އަދި މި ހުށަހެޅުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ތާޢީދުކުރެއްވިއެވެ. މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓު: ސޮވްރިން ޑިވެލޮޕްމަންޓް ފަންޑުގެ ބިލާ ގުޅޭގޮތުން ކަމާގުޅުންހުރި ފަރާތްތަކުގެ ކޮމެންޓް ހޯދުމަށް މިއަދުން ފެށިގެން 7 ދުވަސް ދިނުމަށާއި، ބިލުގެ މަސައްކަތް ނިންމާނެ ސުންގަޑިއަކީ 23 ޖުލައި 2024 ކަމުގައި ކަނޑައެޅުމަށް.

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 10

ފެންނަކަމަށް ވޯޓު ދެއްވި މެންބަރުންގެ ޢަދަދު : 8

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 1

ވޯޓުގައި ބައިވެރިވި މެންބަރުންގެ ޢަދަދު: 8

ފާސްވުމަށް ބޭނުންވާ ޢަދަދު: 5

ނިންމުން: ހުށަހެޅުން ފާސްވެފައި.

އެހެންކަމުން، ބިލާ ގުޅޭގޮތުން ކަމާގުޅުންހުރި ފަރާތްތަކުގެ ކޮމެންޓް ހޯދުމަށް މިއަދުން ފެށިގެން 7 ދުވަސް ދިނުމަށާއި، ބިލުގެ މަސައްކަތް ނިންމާނެ ސުންގަޑިއަކީ 23 ޖުލައި 2024 ކަމުގައި ކަނޑައެޅުއްވިއެވެ.

އެއަށްފަހު، ޤާނޫނު ނަންބަރު 81/6 (މޯލްޑިވްސް މަނިޓަރީ އޮތޯރިޓީގެ ޤާނޫނު) ގެ 6 ވަނަ މާއްދާގެ (3) ވަނަ ނަންބަރުގެ ދަށުން، މޯލްޑިވްސް މަނިޓަރީ އޮތޯރިޓީގެ ގަވަރުނަރު ޢަލީ ޙާޝިމް މަޤާމުން ވަކިކުރުމަށް ރައީސުލްޖުމްހޫރިއްޔާއަށް މަޝްވަރާދިނުމާގުޅޭ މައްސަލަ (މެމޯ ނަންބަރު 83/2024) ދިރާސާކުރެއްވިއެވެ. އެގޮތުން، މި މައްސަލައިގައި ކޮމިޓީން ފާހަގަކުރައްވާފައިވާ ކަންތައްތަކާ ގުޅޭގޮތުން އެ މަނިކުފާނަށް ޖަވާބުދާރީވުމުގެ ފުރުޞަތު ދެއްވުމަށް 15 ޖުލައި 2024 ގައި ބާއްވާ ކޮމިޓީގެ ބައްދަލުވުމަށް އެ މަނިކުފާނު ހާޒިރުކުރެއްވުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހެޅުއްވިއެވެ. އަދި މި ހުށަހެޅުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ތާޢީދުކުރެއްވިއެވެ. މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓު: 15 ޖުލައި 2024 ގައި ބާއްވާ ކޮމިޓީގެ ބައްދަލުވުމަށް ގަވަރުނަރު ހާޒިރުކުރެއްވުމަށް.

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 10

ފެންނަކަމަށް ވޯޓު ދެއްވި މެންބަރުންގެ ޢަދަދު : 9

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 9

ފާސްވުމަށް ބޭނުންވާ ޢަދަދު: 5

ނިންމުން: ހުށަހެޅުން ފާސްވެފައި.

އެހެންކަމުން، 15 ޖުލައި 2024 ގައި ބާއްވާ ކޮމިޓީގެ ބައްދަލުވުމަށް ގަވަރުނަރު ހާޒިރުކުރެއްވުމަށް ނިންމެވިއެވެ.

މީގެ އިތުރުން، އަންނަނިވި މަޢުލޫމާތު ސާފުކުރެއްވުމަށް މިނިސްޓްރީ އޮފް ފިނޭންސްއަށް ސިޓީ ފޮނުވުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހެޅުއްވިއެވެ. އަދި މި ހުށަހެޅުމަށް ހުޅުމާލެ ދެކުނު ދާއިރާގެ މެންބަރު އަޙްމަދު ޝަމްހީދު ތާޢީދުކުރެއްވިއެވެ.

1.     ދައުލަތުގެ މާލީ އަދި އިޤްތިޞާދީ ކަންކަން ހަރުދަނާކުރެއްވުމާ ގުޅޭގޮތުން، 17 ނޮވެންބަރު 2023 އިން ފެށިގެން މިއަދާ ހަމައަށް، މޯލްޑިވްސް މަނިޓަރީ އޮތޯރިޓީގެ ގަވަރުނަރު އިސްނަންގަވައިގެން އެއްވެސް ލަފާފުޅެއް ދެއްވާފައިވާނަމަ، އެކަމުގެ ތަފްޞީލް؛ އަދި

2.     ސަރުކާރުގެ އެކިއެކި ސިޔާސަތުތައް ތަންފީޒުކުރުމުގައި މޯލްޑިވްސް މަނިޓަރީ އޮތޯރިޓީގެ ގަވަރުނަރުގެ ހައިސިއްޔަތުން ދެއްވަންޖެހޭ އެއްބާރުލުން ދެއްވާފައިވާކަން ނުވަތަ ނޫންކަން.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓު: މައްސަލައާގުޅޭ މަޢުލޫމާތު ސާފުކުރެއްވުމަށް މިނިސްޓްރީ އޮފް ފިނޭންސްއަށް ސިޓީ ފޮނުވުމަށް.

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 10

ފެންނަކަމަށް ވޯޓު ދެއްވި މެންބަރުންގެ ޢަދަދު : 9

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 9

ފާސްވުމަށް ބޭނުންވާ ޢަދަދު: 5

ނިންމުން: ހުށަހެޅުން ފާސްވެފައި.

އެހެންކަމުން، މައްސަލައާގުޅޭ މަޢުލޫމާތު ސާފުކުރެއްވުމަށް މިނިސްޓްރީ އޮފް ފިނޭންސްއަށް ސިޓީ ފޮނުވުމަށް ނިންމެވިއެވެ.

އެހެނިހެން:

1.     ފެނަކަ ކޯޕަރޭޝަން ލިމިޓެޑްއާ ގުޅޭ މައްސަލަތަކާއި، އެ ކުންފުނީގެ ހާލަތު ބެލުމަށް ކެލާ ދާއިރާގެ މެންބަރު ޢަބްދުﷲ ޝަރީފް ހުށަހެޅުއްވިއެވެ. އަދި މި ހުށަހެޅުމަށް ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ތާޢީދުކުރެއްވިއެވެ. މި ހުށަހެޅުމަށް އެއްވެސް މެންބަރަކު އިޢުތިރާޒުކުރައްވާފައިނުވާތީ، އެ ކުންފުނީގެ ޕްރޮކިއުމަންޓް ކަންތައްތަކާއި، މުވައްޒަފުންނަށް ވަޒީފާ ދިނުމާއި (ރެކްރޫޓްމަންޓް)، އަދި ޕްރޮޖެކްޓް ހިންގުމުގައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ގައިޑްލައިންތަކާއި، ގަވާއިދުތަކާ އެއްގޮތަށް ޢަމަލުކޮށްފައިވޭތޯ ނުވަތަ ޚިލާފުވެފައިވޭތޯ އަދި އިސްވެދެންނެވި ކަންތައް ކޮށްފައިވަނީ ކޮރަޕްޝަނަށް މަގުފަހިވާ ފަދަ ގޮތަކަށްތޯ ބައްލަވައިދެއްވައި، އެ ކުންފުނީގެ ޚާއްސަ އޮޑިޓެއް ހައްދަވައިދެއްވުމަށް އޮޑިޓަރ ޖެނެރަލްއަށް ދެންނެވުމަށް ނިންމެވިއެވެ.