މިއަދުގެ ބައްދަލުވުމުގައި، ޓެކްސް އެޕީލް ޓްރައިބިއުނަލްގެ އިދާރީ ހިންގުމުގެ ތެރެއަށް ޓްރައިބިއުނަލްގެ ބައެއް މެންބަރުން ވަދެ ނުފޫޒު ފޯރުވުމުގެ ސަބަބުން ދައުލަތުން ކުރަން ނުޖެހޭ ގިނަ ޚަރަދުތަކެއް ޓްރައިބިއުނަލްގެ ބަޖެޓުން ކުރެވިފައިވާކަމަށާއި، ޓްރައިބިއުނަލް ހިންގުމުގެ ގަވާއިދުގައި ބަޔާންކުރާ މާއްދާތަކާ ޚިލާފަށް ބައެއް ކަންކަން ހިނގަމުންދާކަން ބަޔާންކޮށް 09 ޖޫން 2024 ގައި ފޮނުއްވާފައިވާ ސިޓީއާ ގުޅޭގޮތުން މަޝްވަރާކުރެއްވުމަށްފަހު، މި މައްސަލައަކީ ޖުޑިޝަރީ ކޮމިޓީގައި ދިރާސާކުރައްވަމުންދާ މައްސަލައަކަށްވާތީ، މައްސަލަ ފައިލްކުރަން ނިންމެވިއެވެ.

އެއަށްފަހު، ކައުންސިލް އިދާރާގެ އިދާރީ މުވައްޒަފުންގެ މުސާރަ ބޮޑުކުރުމަށް އެދި އަރިއަތޮޅު އުތުރުބުރީ ހިމަންދޫ ކައުންސިލްގެ އިދާރާއިން 02 މޭ 2023 ގައި ފޮނުއްވާފައިވާ ޤަރާރު ދިރާސާކުރެއްވުމަށްފަހު، މި މައްސަލައަކީ ކޮމިޓީގެ މެންޑޭޓުގެ ތެރޭގައި ހިމެނޭ ކަމެއް ނޫންކަމަށާއި، އެހެންކަމުން ނޭޝަނަލް ޕޭ ކޮމިޝަނާއި ގުޅިގެން މި މައްސަލައަށް ޙައްލެއް ހޯއްދެވުމަށް އެ ކައުންސިލަށް ދެންނެވުމަށް ނިންމެވިއެވެ.

މީގެ އިތުރުން، ކައުންސިލްތަކުގެ ބަޖެޓް އެކުލަވާލުމުގައި ކައުންސިލްތަކުން ކުރައްވާ މަސައްކަތްތައް ބައްލަވާ ރައްޔިތުންނަށް ދެއްވާ ޚިދުމަތްތަކަށް ރިޢާޔަތްކޮށް ބަޖެޓް ފާސްކުރައްވާއިރު ހިންގުންތެރި ކައުންސިލްތަކުގެ އަގު ވަޒަންކުރުމުގެ ގޮތުން ކައުންސިލުން ހުށަހަޅާ ބަޖެޓްގެ އިތުރުން ހިންގުންތެރި ކައުންސިލްތަކަށް ބަޖެޓު އިތުރުކޮށްދެވޭނެ އިންތިޒާމް ހަމަޖައްސައިދެއްވުމަށް އެދި ކެނދިކުޅުދޫ ކައުންސިލުން 17 ޑިސެންބަރު 2023 ގައި ފޮނުއްވާފައިވާ ސިޓީއާ ގުޅޭގޮތުން މަޝްވަރާކުރެއްވުމަށްފަހު، މިނިސްޓްރީ އޮފް ފިނޭންސްއާ ގުޅިގެން މި މައްސަލައަށް ޙައްލެއް ހޯއްދެވުމަށް އެ ކައުންސިލަށް ދެންނެވުމަށް ނިންމެވިއެވެ.

ރައްޔިތުންގެ މަޖިލީހުން ކަނޑައަޅަންޖެހޭ މުސާރައާއި ޢިނާޔަތްތަކުގެ އޮނިގަނޑު މުރާޖަޢާކޮށް އަލުން އެކުލަވާލާ ނިންމިގޮތުގެ ރިޕޯޓުގައި ހިމަނުއްވާފައިވާ ޗިލްޑްރަންސް އޮންބަޑްސްޕަރސަންގެ މުސާރައާ ގުޅިގެން ފާހަގަކުރެވިފައިވާ ކަންކަން ބަޔާންކޮށް ޗިންޑްރަންސް އޮމްބަޑްސްޕަރސަންގެ އޮފީހުން 26 މާރިޗު 2024 ގައި ފޮނުއްވާފައިވާ މައްސަލައާ ގުޅޭގޮތުން މަޝްވަރާކުރެއްވިއެވެ. އެގޮތުން، ސަރުކާރުގެ ޚަރަދު ކުޑަކުރުމުގެ ސިޔާސަތުގެ ދަށުން، ރައްޔިތުންގެ މަޖިލީހުން ކަނޑައަޅަންޖެހޭ މުސާރައާއި ޢިނާޔަތްތަކަށް އެއްވެސް ބަދަލެއް ގެންނަވަން ނޭޝަނަލް ޕޭ ކޮމިޝަނުން ނިންމަވާފައިވާނަމަ، އެކަމުގެ ތަފްޞީލީ މަޢުލޫމާތު ހޯދުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހެޅުއްވިއެވެ. އަދި މި ހުށަހެޅުމަށް ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ތާޢީދުކުރެއްވިއެވެ.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓު: މައްސަލައާ ގުޅޭ މަޢުލޫމާތު ނޭޝަނަލް ޕޭ ކޮމިޝަނުން ހޯދުމަށް.

 ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 7

ފެންނަކަމަށް ވޯޓު ދެއްވި މެންބަރުންގެ ޢަދަދު : 6

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 6

ފާސްވުމަށް ބޭނުންވާ ޢަދަދު: 4

ނިންމުން: ހުށަހެޅުން ފާސްވެފައި.

އެހެންކަމުން، މި މައްސަލައާ ގުޅޭ މަޢުލޫމާތު ނޭޝަނަލް ޕޭ ކޮމިޝަނުން ހޯދުމަށް ނިންމެވިއެވެ.

ފަނޑިޔާރުންނާއި ރިޓަޔަރ ކުރައްވާފައިވާ ފަނޑިޔާރުންގެ އިންޝުއަރެންސް ޕެކޭޖްތަކުގެ ޕްރިމިއަމް ބޮޑުކޮށްދެއްވައި، އަމާނާ ތަކަފުލް (މޯލްޑިވްސް) ޕީ.އެލް.ސީ އާއެކު ކުރެވިފައިވާ ތިން އަހަރުގެ އެގްރީމެންޓުގެ ބާކީ އޮތް މުއްދަތަށް ފުލް ކަވަރޭޖް ފޯރުކޮށްދިނުމަށް އިތުރަށް ބޭނުންވާ ފައިސާ ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނަށް ލިބޭނެ އިންތިޒާމް ހަމަޖައްސަވައިދެއްވުމަށް އެދި 06 މޭ 2024 ގައި ޖުޑީޝަލް ސަރވިސް ކޮމިޝަނުން ފޮނުއްވާފައިވާ ސިޓީއާ ގުޅޭގޮތުން މަޝްވަރާކުރެއްވިއެވެ. އެގޮތުން، އެކި އެކި ޤާނޫނުތަކުގެ ދަށުން މުސާރައިގެ އިތުރުން ލިބޭ ޢިނާޔަތްތަކުގެ ގޮތުގައި ހިމަނުއްވާފައިވާ ހެލްތް އިންޝުއަރެންސް މިހާރަށްވުރެ ހަރުދަނާކުރެއްވުމަށް ނޭޝަނަލް ޕޭ ކޮމިޝަނުން ގެންގުޅުއްވާ ސިޔާސަތު އެ ކޮމިޝަނުން ސާފުކުރެއްވުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހެޅުއްވިއެވެ. އަދި މި ހުށަހެޅުމަށް ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވިއެވެ.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓު: މައްސަލައާ ގުޅޭ މަޢުލޫމާތު ނޭޝަނަލް ޕޭ ކޮމިޝަނުން ހޯދުމަށް.

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 8

ފެންނަކަމަށް ވޯޓު ދެއްވި މެންބަރުންގެ ޢަދަދު : 7

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 7

ފާސްވުމަށް ބޭނުންވާ ޢަދަދު: 5

ނިންމުން: ހުށަހެޅުން ފާސްވެފައި.

އެހެންކަމުން، މި މައްސަލައާ ގުޅޭ މަޢުލޫމާތު ނޭޝަނަލް ޕޭ ކޮމިޝަނުން ހޯދުމަށް ނިންމެވިއެވެ.

ސިޓީ ކައުންސިލްތަކާއި، އަތޮޅު ކައުންސިލްތައް އަދި ރަށު ކައުންސިލްތަކުގައި މަސައްކަތްކުރާ މުވައްޒަފުންނަށް އެލަވަންސްތަކާއި ޢިނާޔާތްތައް ދިނުމަށްޓަކައި ދައުލަތުގެ މުއައްސަސާތައް ގިންތިކުރުމުގެ މިންގަނޑު ގިންތި 4 އިން ގިންތި 3 އަށް ބަދަލުކުރުމުގެ މަސައްކަތް ކުރިއަށްގެންދަވާ ކަމަށް މިނިސްޓްރީ މަޢުލޫމާތު ދެއްވާފައިވާކަމަށާއި، ދައުލަތުގެ މިނިސްޓަރުންނާއި، ސްޓޭޓް އަދި ޑެޕިއުޓީ މިނިސްޓަރުންނާ އަޅާބަލާއިރު އިންތިޚާބުވެފައިވާ ސިޓީ ކައުންސިލްގެ މޭޔަރުތަކާއި، އަތޮޅު ކައުންސިލްގެ ރައީސްގެ ގިންތިތަކަކީ ކޮބައިކަން ސާފުވެފައިނުވާތީ، އެކަން ސާފުކޮށްދެއްވުމަށް އެދި ތިނަދޫ ސިޓީ ކައުންސިލުން 21 މޭ 2024 ފޮނުއްވާފައިވާ ސިޓީއަކީ ލާމަރުކަޒީ ކޮމިޓީގެ މެންޑޭޓުގެ ތެރޭގައި ހިމެނޭ ކަމެއް ކަމަށްވާތީ، މި މައްސަލަ އެ ކޮމިޓީއަށް ފޮނުވުމަށް ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި، ބާރަށު ދާއިރާގެ މެންބަރު އިބްރާހީމް ޝުޖާޢު ތާޢީދުކުރެއްވިއެވެ.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓު: މައްސަލަ ލާމަރުކަޒީ ކޮމިޓީއަށް ފޮނުވުމަށް.

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 8

ފެންނަކަމަށް ވޯޓު ދެއްވި މެންބަރުންގެ ޢަދަދު : 7

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 7

ފާސްވުމަށް ބޭނުންވާ ޢަދަދު: 5

ނިންމުން: ހުށަހެޅުން ފާސްވެފައި.

އެހެންކަމުން، މި މައްސަލަ ލާމަރުކަޒީ ކޮމިޓީއަށް ފޮނުވުމަށް ނިންމެވިއެވެ.

އެއަށްފަހު، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 212 ވަނަ މާއްދާއިން އޮޑިޓަރ ޖެނެރަލްގެ އޮފީހަށް މަތިކޮށްފައިވާ މަސްއޫލިއްޔަތުތަކާއި ބާރުތަކުގެ މަސައްކަތް އެކަށީގެންވާ ހަލުވި މިނެއްގައި ކުރިއަށް ގެންދިއުމުގައި އެ އޮފީހަށް ދިމާވާ ދަތިތަކާއި ގޮންޖެހުންތަކާ ގުޅޭގޮތުން 15 ޖުލައި 2024 ވާ ހޯމަ ދުވަހު އެ އޮފީހުގެ ބޭފުޅުންނާ ބައްދަލުކުރެއްވުމަށް ނިންމެވިއެވެ.