މިއަދުގެ ބައްދަލުވުމުގައި ފުރަތަމަ ކުރިއަށް ގެންދެވީ، 19 ވަނަ މަޖިލިސް ނިމުނުއިރު މަސައްކަތް ނުނިމިހުރި ޕެޓިޝަންތައް 20 ވަނަ މަޖިލީހުގެ ޕެޓިޝަން ކޮމިޓީއަށް ނަޤުލުވެފައިވާތީ، އެ ޕެޓިޝަންތައް ދިރާސާކުރުމުގެ މަސައްކަތެވެ.

އެގޮތުން، "ގެދޮރުވެރިޔާ ސްކީމްގެ ދަށުން ފްލެޓް ލިބޭނެކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ރަސްމީ ވެބްސައިޓްގައި ގެޒެޓް ކުރެވިފައިވާ އެންމެހާ ފަރާތްތަކާއި އަދި ކަމުގެ މަސްލަޙަތު އޮތް އެންމެހާ ފަރާތްތަކުގެ ފްލެޓްތައް ބާތިލް ނުކުރުމަށްއެދި ހުށަހަޅުއްވާފައިވާ ޕެޓިޝަން" އާ ގުޅޭގޮތުން ކޮމިޓީގެ މެންބަރުން މަޝްވަރާކުރެއްވިއެވެ. މި މަޝްވަރާއަށްފަހު، ކޮމިޓީގައި އެވަގުތު ހާޒިރުވެވަޑައިގެން ތިއްބެވި މެންބަރުންގެ އިއްތިފާޤުން ނިންމެވީ މި ޕެޓިޝަން ރައްދުވާ ފަރާތަކީ ކުރީގެ ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއަށް ވެފައި، އިތުރު ބޭފުޅުންނާ ބައްދަލުކުރުމުގެ ކުރިން ފުރަތަމަ މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓްގެ ބޭފުޅުންނާ ބައްދަލުކޮށް މި ޕެޓިޝަނުގައި ބަޔާންކޮށްފައިވާ މައްސަލައާ ގުޅިގެން ކުރައްވާފައިވާ މަސައްކަތްތަކުގެ އަދާހަމަ މަޢުލޫމާތު ސާފުކުރެއްވުމަށެވެ.

ދެވަނަ ކަމަކަށް ކުރިއަށް ގެންދެވީ، ބ.ކުޑަރިކިލުގެ އުތުރު ފަރާތުގެ ގޮނޑުދޮށް ލޯކަލް ޓޫރިޒަމަށް ގެސްޓް ހައުސް ޢިމާރާތް ކުރަން ދިނުމަށް ކުޑަރިކިލުގެ ކައުންސިލުން ނިންމަވާފައިވާތީ އެކަމާ ދެކޮޅަށް ހުށަހަޅާ ޕެޓިޝަން ދިރާސާކުރެއްވުމެވެ. އެގޮތުން މި ޕެޓިޝަނާ ގުޅޭގޮތުން ކޮމިޓީގެ މެންބަރުންގެ މެދުގައި ކުރެވުނު މަޝްވަރާގެ އަލީގައި، އެވަގުތު ހާޒިރުވެވަޑައިގެން ތިއްބެވި މެންބަރުންގެ އިއްތިފާޤުން ނިންމެވީ، ބ.ކުޑަރިކިލު ކައުންސިލްއިން އެ ރަށުގެ ލޭންޑް ޔޫސް ޕްލޭން އެކުލަވާލުމުގައި ޢަމަލުކުރައްވާފައިވާ އިޖުރާތުތަކާއި، ލޭންޑް ޔޫސް ޕްލޭން ފާސްކުރެއްވުމަށް ބާއްވާފައިވާ ކައުންސިލް ބައްދަލުވުންތަކާއި އަދި ރައްޔިތުންނާއެކު ބާއްވާފައިވާ ބައްދަލުވުންތަކުގެ ޔައުމިއްޔާއާއި، ކަމާގުޅޭ އެންމެހާ ލިޔެކިޔުންތައް އެ ކައުންސިލުން ހޯދެއްވުމަށެވެ.

އެއަށްފަހު ކޮމިޓީގެ ބައްދަލުވުން ނިންމަވާލެއްވެވިއެވެ.