މިއަދުގެ ބައްދަލުވުމުގައި، ޤާނޫނު ނަންބަރު 81/6 (މޯލްޑިވްސް މަނިޓަރީ އޮތޯރިޓީގެ ޤާނޫނު) ގެ 6 ވަނަ މާއްދާގެ (3) ވަނަ ނަންބަރުގެ ދަށުން، މޯލްޑިވްސް މަނިޓަރީ އޮތޯރިޓީގެ ގަވަރުނަރު ޢަލީ ޙާޝިމް މަޤާމުން ވަކިކުރުމަށް ރައީސުލްޖުމްހޫރިއްޔާއަށް މަޝްވަރާދިނުމާގުޅޭ މައްސަލައާ ގުޅޭގޮތުން މަޝްވަރާކުރެއްވުމަށްފަހު، މިއަދުގެ ބައްދަލުވުމަށް ގަވަރުނަރު ހާޒިރުވެވަޑައިގެންފައިނުވާތީ، ދެން އަންނަ ބައްދަލުވުމަށް ހާޒިރުވެވަޑައިގަތުމަށް ގަވަރުނަރަށް ދެންނެވުމަށް ފެނިވަޑައިގަންނަވާ މެންބަރުންގެ ވޯޓަށް މުޤައްރިރު އެއްސެވިއެވެ.

މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓު: ދެން ބާއްވާ ބައްދަލުވުމަށް ހާޒިރުވުމުގެ ފުރުޞަތު މޯލްޑިވްސް މަނިޓަރީ އޮތޯރިޓީގެ ގަވަރުނަރު ޢަލީ ޙާޝިމަށް ދެއްވުމަށް.

 ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 8

ފެންނަކަމަށް ވޯޓު ދެއްވި މެންބަރުންގެ ޢަދަދު : 7

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު:

ވޯޓުގައި ބައިވެރިވި މެންބަރުންގެ ޢަދަދު: 7

ފާސްވުމަށް ބޭނުންވާ ޢަދަދު: 4

ނިންމުން: ހުށަހެޅުން ފާސްވެފައި.

އެހެންކަމުން، މާދަމާ، 17 ޖުލައި 2024 ވަނަ ދުވަހު ބޭއްވުމަށް ހަމަޖެހިފައިވާ ކޮމިޓީ ބައްދަލުވުމަށް ވަޑައިގެން ޖަވާބުދާރީވުމަށް މޯލްޑިވްސް މަނިޓަރީ އޮތޯރިޓީގެ ގަވަރުނަރު ޢަލީ ޙާޝިމަށް ދެންނެވުމަށް ނިންމެވިއެވެ.

އެއަށްފަހު، ސޮވްރިން ޑިވެލޮޕްމަންޓް ފަންޑުގެ ބިލާ ގުޅޭގޮތުން ޚިޔާލު ހުށަހެޅުމުގެ ސުންގަޑި އިތުރުކޮށްދެއްވުމަށް އެދި މިނިސްޓްރީ އޮފް ފިނޭންސް އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް އިން ފޮނުއްވާފައިވާ ސިޓީ އާމެދު މަޝްވަރާކުރެއްވުމަށްފަހު، ސޮވްރިން ޑިވެލޮޕްމަންޓް ފަންޑުގެ ބިލު، ދައުލަތުގެ ފިސްކަލް ޒިންމާގެ ބިލު އަދި ދައުލަތުގެ ދަރަންޏާބެހޭ ބިލަށް ޚިޔާލު ހުށަހެޅުމުގެ ސުންގަޑި ޖުލައި މަހުގެ ނިޔަލަށް އިތުރުކުރެއްވުމަށްފަހު، ބިލުގެ މަސައްކަތް ނިންމާނެ ސުންގަޑިއަކީ 07 އޮގަސްޓު 2024 ކަމުގައި ނިންމެވިއެވެ.

މީގެ އިތުރުން، އޭޑީކޭ ހޮސްޕިޓަލުން، ސަރުކާރުގެ ބައެއް މުއައްސަސާތަކަށް ކްރެޑިޓަށް ދީފައިވާ ޚިދުމަތްތަކާއި، އާސަންދައިގެ ދަށުން ދީފައިވާ ޚިދުމަތްތަކާއި އަދި އެންސްޕާގެ ޚިދުމަތްތަކަށް ބިލުކޮށްފައިވާ ފައިސާ ނުލިބި އެތައް މަހެއް ވެފައިވާ މައްސަލައާ ގުޅޭގޮތުން ބައްދަލުވުމެއް ހަމަޖައްސަވާ ދެއްވުމަށްއެދި އޭ.ޑީ.ކޭ ހޮސްޕިޓަލުން ފޮނުއްވާފައިވާ ސިޓީއާ ގުޅޭގޮތުން މަޝްވަރާކުރައްވައި، އެ ހޮސްޕިޓަލުގެ ބޭފުޅުންނާ ބައްދަލުކުރެއްވުމުގެ ކުރިން، އާސަންދަ ކޮމްޕެނީ ލިމިޓެޑް އަދި ނޭޝަނަލް ސޯޝަލް ޕްރޮޓެކްޝަން އެޖެންސީގެ ފަރާތުން ސަރުކާރު މުއައްސަސާތަކަށާއި، އަމިއްލަ ކުންފުނިތަކަށް ދައްކަންޖެހޭ ފައިސާގެ ތެރެއިން މިހާތަނަށް ދައްކަވާފައިނުވާ ފައިސާގެ ތަފްޞީލު ސާފުކުރެއްވުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހެޅުއްވިއެވެ. އަދި މި ހުށަހެޅުމަށް ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ތާޢީދުކުރެއްވިއެވެ.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓު: މައްސަލައާ ގުޅޭ މަޢުލޫމާތު ނޭޝަނަލް ސޯޝަލް ޕްރޮޓެކްޝަން އެޖެންސީ އަދި އާސަންދަ ކޮމްޕެނީ ލިމިޓެޑް އިން ހޯއްދެވުމަށް.

 ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 8

ފެންނަކަމަށް ވޯޓު ދެއްވި މެންބަރުންގެ ޢަދަދު : 7

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު:

ވޯޓުގައި ބައިވެރިވި މެންބަރުންގެ ޢަދަދު: 7

ފާސްވުމަށް ބޭނުންވާ ޢަދަދު: 4

ނިންމުން: ހުށަހެޅުން ފާސްވެފައި.

އެހެންކަމުން، އާސަންދަ ކޮމްޕެނީ ލިމިޓެޑް އަދި ނޭޝަނަލް ސޯޝަލް ޕްރޮޓެކްޝަން އެޖެންސީގެ ފަރާތުން ސަރުކާރު މުއައްސަސާތަކަށާއި، އަމިއްލަ ކުންފުނިތަކަށް ދައްކަންޖެހޭ ފައިސާގެ ތެރެއިން މިހާތަނަށް ދައްކަވާފައިނުވާ ފައިސާގެ ތަފްޞީލު ލިޔުމުން ހޯދުމަށް ކޮމިޓީން ނިންމެވިއެވެ.

އެއަށްފަހު، ފެނަކަ ކޯޕަރޭޝަން ލިމިޓެޑްގެ ކުރީގެ މެނޭޖިންގ ޑިރެކްޓަރ އަލްފާޟިލް އަޙްމަދު ސަޢީދު މުޙައްމަދު ވަކިކުރައްވަން ފެންނަކަމަށް، ކުރީގެ އެންޓި-ކޮރަޕްޝަން ކޮމިޝަނުގެ މެންބަރުން ރައީސުލްޖުމްހޫރިއްޔާއަށާއި، ޕްރައިވަޓައިޒޭޝަން އަދި ކޯޕަރައިޒޭޝަން ބޯޑަށް ލަފާދެއްވާފައިވަނިކޮށް، ފެނަކަ ކޯޕަރޭޝަން ލިމިޓެޑްގެ ކުރީގެ މެނޭޖިންގ ޑިރެކްޓަރ ވަކިނުކުރައްވާ، އެންޓި-ކޮރަޕްޝަން ކޮމިޝަނުގެ 5 މެންބަރުން ވަކިކުރެއްވިކަމަށް ސްޓޭޓް އޯންޑް އެންޓަޕްރައިސަސް ކޮމިޓީން އެންޓި-ކޮރަޕްޝަން ކޮމިޝަނުގެ ބޭފުޅުންނާ ކުރެއްވި ބައްދަލުވުމުގައި މަޢުލޫމާތު ލިބިފައިވާކަމަށާއި، އެ ކަންތައް ހިނގާދިޔަ ގޮތުގެ ޓައިމްލައިނެއް އެންޓި-ކޮރަޕްޝަން ކޮމިޝަން އަދި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ހޯއްދެވުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހެޅުއްވިއެވެ. މި ހުށަހެޅުމަށް އޭދަފުށި ދާއިރާގެ މެންބަރު އަޙްމަދު ސަލީމް ތާޢީދުކުރެއްވިއެވެ.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލް ތިރީގައި އެވަނީއެވެ.

ވޯޓު: ފެނަކަ ކޯޕަރޭޝަން ލިމިޓެޑްގެ ކުރީގެ މެނޭޖިންގ ޑިރެކްޓަރ ވަކިކުރައްވަން ފެންނަކަމަށް ލަފާދެއްވާފައިވަނިކޮށް އެންޓި-ކޮރަޕްޝަން ކޮމިޝަނުގެ 5 މެންބަރުން ވަކިކުރެއްވި މައްސަލައިގެ ޓައިމްލައިނެއް އެންޓި-ކޮރަޕްޝަން ކޮމިޝަން އަދި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ސާފުކުރެއްވުމަށް.

 ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 8

ފެންނަކަމަށް ވޯޓު ދެއްވި މެންބަރުންގެ ޢަދަދު : 7

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު:

ވޯޓުގައި ބައިވެރިވި މެންބަރުންގެ ޢަދަދު: 7

ފާސްވުމަށް ބޭނުންވާ ޢަދަދު: 4

ނިންމުން: ހުށަހެޅުން ފާސްވެފައި.

އެހެންކަމުން، ފެނަކަ ކޯޕަރޭޝަން ލިމިޓެޑްގެ ކުރީގެ މެނޭޖިންގ ޑިރެކްޓަރ ވަކިކުރައްވަން ފެންނަކަމަށް ލަފާދެއްވާފައިވަނިކޮށް އެންޓި-ކޮރަޕްޝަން ކޮމިޝަނުގެ 5 މެންބަރުން ވަކިކުރެއްވި މައްސަލައިގެ ޓައިމްލައިނެއް އެންޓި-ކޮރަޕްޝަން ކޮމިޝަން އަދި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ސާފުކުރެއްވުމަށް ކޮމިޓީން ނިންމެވިއެވެ.

މީގެއިތުރުން، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 212 ވަނަ މާއްދާއިން އޮޑިޓަރ ޖެނެރަލްގެ އޮފީހަށް މަތިކޮށްފައިވާ މަސްއޫލިއްޔަތުތަކާއި ބާރުތަކުގެ މަސައްކަތް އެކަށީގެންވާ ހަލުވި މިނެއްގައި ކުރިއަށް ގެންދިއުމަށް، އެ އޮފީހަށް ދިމާވާ ދަތިތަކާއި ގޮންޖެހުންތަކަކީ ކޮބައިކަން ދެނެގަތުމަށް މާލިއްޔަތު ކޮމިޓީއާއެކު ބޭއްވުނު ބައްދަލުވުމުގައި، އެ އޮފީހުގެ ފަރާތުން ފާހަގަކުރެއްވި އިދާރީގޮތުން ދިމާވާ ގޮންޖެހުންތަކާއި، ޤާނޫނީ ގޮތުން ދިމާވާ ގޮންޖެހުންތަކާއި، އަދި އެ ގޮންޖެހުންތަކަށް ޙައްލެއް ގެނައުމަށް އޮޑިޓަރ ޖެނެރަލް ހުށަހަޅުއްވާ ކަންކަން ލިޔުމުން ފޮނުއްވައިދެއްވުމަށް އެ އޮފީހަށް ދެންނެވުމަށް ނިންމެވިއެވެ.