މިއަދުގެ ބައްދަލުވުމަށް އެޖެންޑާ ކޮށްފައިވާ ކަންކަމުގެ ތެރެއިން ފުރަތަމަ ކަމަކަށް ކުރިއަށް ގެންދެވީ، ހިޔުމަން ރައިޓްސް ކޮމިޝަން އޮފް ދަ މޯލްޑިވްސްއިން ބަލަމުންގެންދާ ވަޒީފާއާބެހޭ މައްސަލަތަކެއްގައި ލޭބަރ ރިލޭޝަންސް އޮތޯރިޓީއިން އެ ކޮމިޝަނަށް މަޢުލޫމާތު ޙިއްޞާކޮށްފައިނުވާތީއާއި އަދި އެއްބާރުލުންނުދޭކަމަށް ބަޔާންކޮށް އެ ކޮމިޝަނުން ފޮނުއްވާފައިވާ މައްސަލަ.

އެގޮތުން، ހުޅުވާލި ފުރުޞަތުގައި، އެ މައްސަލައަކީ 19 ވަނަ ރައްޔިތުންގެ މަޖިލީހަށް ހުށަހެޅިފައިވާ މައްސަލައެއްކަމަށްވީ ހިނދު، އަދި އެ މައްސަލައަށް އެކަށީގެންވާ ޙައްލެއް ލިބިފައިވައި އޮތުމަކީވެސް އެކަށީގެންވާކަމެއްކަމަށް ބެލެވޭތީ، މި ކޮމިޓީން އެ މައްސަލަ ކުރިއަށް ގެންދެވުމުގެ ކުރިން އެމައްސަލައިގެ މިހާރުގެ ޙާލަތު ބެއްލެވުމަށްޓަކައި އެ ކޮމިޝަނަށް ސިޓީއަކުން ދަންނަވައިގެން މަޢުލޫމާތު ސާފުކުރެއްވުމަށް އިހަވަންދޫ ދާއިރާ މެންބަރު އަޙްމަދު ނަޞީރު ހުށަހަޅައި ފުވައްމުލަކު މެދު ދާއިރާގެ މެންބަރު ޢަލީ ފަޒާދު ތާއީދުކުރެއްވިއެވެ.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލު ތިރީގައިއެވަނީއެވެ.

ވޯޓުގެ ނަތީޖާ: އެ މައްސަލައަށް އެކަށީގެންވާ ޙައްލެއް ލިބިފައިވާކަން ނުވަތަ ނޫކަން، އަދި އެ މައްސަލައިގެ މިހާރުގެ ޙާލަތާ ގުޅޭ މަޢުލޫމާތު ހޯއްދެވުމަށް ހިޔުމަން ރައިޓްސް ކޮމިޝަނަށް ސިޓީ ފޮނުވުމަށް.

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 8

ފެންނަކަމަށް ވޯޓު ދެއްވި މެންބަރުންގެ ޢަދަދު : 7

(ހެންވޭރު ހުޅަނގު ދާއިރާ މެންބަރު ޢަލީ އިބްރާހީމް، ގަލޮޅު ދެކުނު ދާއިރާ މެންބަރު މީކާއީލު އަޙްމަދު ނަސީމް، އިހަވަންދޫ ދާއިރާ މެންބަރު އަޙްމަދު ނަޞީރު، ދިއްދޫ ދާއިރާ މެންބަރު ޢަބްދުއްލަޠީފް މުޙައްމަދު، ދަނގެތީ ދާއިރާ މެންބަރު އަބްދުﷲ ރަޝީދު، ފުވައްމުލަކު މެދު ދާއިރާ މެންބަރު ޢަލީ ފަޒާދު، ފެލިދޫ ދާއިރާ މެންބަރު އާދަމް ޒާހިރު)

ނުފެންނަކަމަށް ވޯޓު ދެއްވި މެންބަރުންގެ ޢަދަދު: ނެތް

ވަކިގޮތަކަށް ވޯޓުދޭން ބޭނުންނުވާކަމަށް ވޯޓުދެއްވި މެންބަރުންގެ ޢަދަދު: ނެތް

ވޯޓުގައި ބައިވެރިވި މެންބަރުންގެ ޢަދަދު: 7

ފާސްވުމަށް ބޭނުންވާ ޢަދަދު: 4

ނިންމުން: ހުށަހެޅުން ފާސްވެފައި.

އެހެންކަމުން، މި މައްސަލައަށް އެކަށީގެންވާ ޙައްލެއް ލިބިފައިވާކަން ނުވަތަ ނޫކަން، އަދި އެ މައްސަލައިގެ މިހާރުގެ ޙާލަތާ ގުޅޭ މަޢުލޫމާތު ހޯއްދެވުމަށް ހިޔުމަން ރައިޓްސް ކޮމިޝަން އޮފް ދަ މޯލްޑިވްސްއަށް ސިޓީ ފޮނުވުމަށް ހާޒިރުވެ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ނިންމެވިއެވެ.

ދެވަނަ ކަމަކަށް ކުރިއަށް ގެންދެވީ، ޙައްޖު ކޯޕަރޭޝަންގެ ފަރާތުން ޙައްޖަށް ދިއުމަށްޓަކައި 2019 ވަނަ އަހަރު، އެ ކޯޕަރޭޝަނަށް އެއްފަހަރާ ފައިސާ ދައްކާފައިވީނަމަވެސް، 2023 ވަނަ އަހަރުވެސް ޙައްޖައް ދިއުމުގެ ފުރުޞަތު ލިބިދީފައި ނުވާކަމަށާއި، އެހެންނަމަވެސް 2023 ވަނަ އަހަރު އެ ކޯޕަރޭޝަނަށް ފައިސާދައްކާފައިވާ އެރަށުގެ ފަރާތްތަކަށް 2024 ވަނަ އަހަރު ޙައްޖަށް ދިއުމުގެ ފުރުޞަތު މިނިސްޓްރީ އޮފް އިސްލާމިކް އެފެއާރޒްއިން ދެއްވާފައިވާކަން ބަޔާންކޮށް، ފޮނުވާފައިވާ މައްސަލަ. އެގޮތުން، ދެންނެވުނު މައްސަލައާ ގުޅޭ ސިޓީ މިނިސްޓްރީ އޮފް އިސްލާމިކް އެފެއާޒްއަށް ފޮނުއްވާފައިވާތީ، އެ މިނިސްޓްރީން އެ ފަރާތަށް ދެއްވާފައިވާ ޖަވާބާއި މައްސަލައާ ގުޅޭ އެންމެހައި ލިޔެކިޔުންތައް ހޯއްދެވުމަށް މިނިސްޓްރީ އޮފް އިސްލާމިކް އެފެއާރޒްއާއި މޯލްޑިވްސް ޙައްޖު ކޯޕަރޭޝަން ލިމިޓެޑްއަށް ސިޓީ ފޮނުވުމަށް ފުވައްމުލަކު މެދު ދާއިރާގެ މެންބަރު ޢަލީ ފަޒާދު ހުށަހަޅައި އިހަވަންދޫ ދާއިރާ މެންބަރު އަޙްމަދު ނަޞީރު ތާއީދުކުރެއްވިއެވެ.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލު ތިރީގައިއެވަނީއެވެ.

ވޯޓުގެ ނަތީޖާ: މައްސަލަ ހުށަހެޅި ފަރާތަށް މިނިސްޓްރީ އޮފް އިސްލާމިކް އެފެއާރޒްއިން ދެއްވާފައިވާ ޖަވާބާއި މައްސަލައާ ގުޅޭ އެންމެހައި ލިޔެކިޔުންތައް ހޯއްދެވުމަށް މިނިސްޓްރީ އޮފް އިސްލާމިކް އެފެއާޒް އަދި މޯލްޑިވްސް ޙައްޖު ކޯޕަރޭޝަން ލިމިޓެޑްއަށް ސިޓީ ފޮނުވުމަށް.

ކޮމިޓީގެ ޖުމްލަ މެންބަރުންގެ ޢަދަދު :11

ހާޒިރުވެ ތިއްބެވި މެންބަރުންގެ ޢަދަދު: 9

ފެންނަކަމަށް ވޯޓު ދެއްވި މެންބަރުންގެ ޢަދަދު : 8

(ހެންވޭރު ހުޅަނގު ދާއިރާ މެންބަރު ޢަލީ އިބްރާހީމް، މައްޗަންގޮޅި ދެކުނު ދާއިރާ މެންބަރު މުޞްޠަފާ ޙުސައިން، ގަލޮޅު ދެކުނު ދާއިރާ މެންބަރު މީކާއީލު އަޙްމަދު ނަސީމް، އިހަވަންދޫ ދާއިރާ މެންބަރު އަޙްމަދު ނަޞީރު، ދިއްދޫ ދާއިރާ މެންބަރު ޢަބްދުއްލަޠީފް މުޙައްމަދު، ދަނގެތީ ދާއިރާ މެންބަރު އަބްދުﷲ ރަޝީދު، ފުވައްމުލަކު މެދު ދާއިރާ މެންބަރު ޢަލީ ފަޒާދު، ފެލިދޫ ދާއިރާ މެންބަރު އާދަމް ޒާހިރު)

ނުފެންނަކަމަށް ވޯޓު ދެއްވި މެންބަރުންގެ ޢަދަދު: 0

ވަކިގޮތަކަށް ވޯޓުދޭން ބޭނުންނުވާކަމަށް ވޯޓުދެއްވި މެންބަރުންގެ ޢަދަދު: ނެތް

ވޯޓުގައި ބައިވެރިވި މެންބަރުންގެ ޢަދަދު: 8

ފާސްވުމަށް ބޭނުންވާ ޢަދަދު: 5

ނިންމުން: ހުށަހެޅުން ފާސްވެފައި.

އެހެންކަމުން، މައްސަލަ ހުށަހެޅި ފަރާތަށް މިނިސްޓްރީ އޮފް އިސްލާމިކް އެފެއާރޒްއިން ދެއްވާފައިވާ ޖަވާބާއި މައްސަލައާ ގުޅޭ އެންމެހައި ލިޔެކިޔުންތައް ހޯއްދެވުމަށް މިނިސްޓްރީ އޮފް އިސްލާމިކް އެފެއާޒް އަދި މޯލްޑިވްސް ޙައްޖު ކޯޕަރޭޝަން ލިމިޓެޑްއަށް ސިޓީ ފޮނުވުމަށް ކޮމިޓީއަށް ހާޒިރުވެ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްކުރެއްވިއެވެ.

އެހެނިހެން ކަންކަމުގެ ތެރެއިން މައްސަލައެއް ހުށަހެޅުއްވުމަށް މެންބަރުންނަށް ފުރުޞަތު ހުޅުވާލެއްވުމުން އެއްވެސް މެންބަރަކު މައްސަލައެއް ހުށަހަޅުއްވާފައި ނުވާތީ، މިއަދުގެ ބައްދަލުވުން ނިންމާލެއްވިއެވެ.