މިއަދުގެ ބައްދަލުވުމުގައި ފުރަތަމަ ކަމަކަށް އޮތީ ދިވެހިރާއްޖެއަށް ދިމާވެފައިވާ ކުނި މެނޭޖްކުރުމުގެ މައްސަލައާ ގުޅިގެން، މިނިސްޓްރީ އޮފް ކްލައިމެޓް ޗޭންޖް، އެންވަޔަރަމަންޓް އެންޑް އެނަރޖީ އަދި ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ ކަމާގުޅޭ ބޭފުޅުންނާ ބައްދަލުކުރުމެވެ. އެގޮތުން މާލެއާއި ރަށްރަށުގައި ކުނި މެނޭޖުކުރުމަށް ރާވާފައިވާ ޕްލޭންތަކާއި އެ މަސައްކަތްތަކުގެ ޓައިމްލައިނާއި އާމްދަނީއެއް ނުވަތަ މަންފާއެއް ލިބޭނެ ގޮތަކަށް ކުނި މެނޭޖުކުރުމާއި އަދި ކުނި މެނޭޖުކުރުމުގައި ދިމާވާ ގޮންޖެހުންތަކާ ގުޅޭގޮތުން ކޮމިޓީގެ މެންބަރުން ކުރެއްވި ސުވާލުތަކަށް މިނިސްޓަރ އޮފް ކްލައިމެޓް ޗޭންޖް، އެންވަޔަރަމަންޓް އެންޑް އެނަރޖީ ޠާރިޤު އިބްރާހީމް އަދި ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ މެނޭޖިންގ ޑިރެކްޓަރ މުޖްތަބާ ޖަލީލް ޖަވާބުދެއްވިއެވެ.

ދެވަނަ ކަމެއްގެ ގޮތުގައި މިސްކިތްތަކުގެ ކަރަންޓު ބިލުތަކަށް ކުރާ ހޭދަ ކުޑަކުރުމަށްޓަކައި، މިސްކިތްތަކުގެ ފުރާޅުތަކުގައި ސޯލާ ޕެނަލް ހަރުކުރުމާ ގުޅޭގޮތުން، މިނިސްޓަރ އޮފް ކްލައިމެޓް ޗޭންޖް، ޠާރިޤު އިބްރާހީމާ ސުވާލުކުރެއްވުމަށް ކޮމިޓީގެ މެންބަރުން ފުރުޞަތު ހުޅުވާލިއެވެ. އެގޮތުން މިސްކިތްތަކުގެ ކަރަންޓު ބިލު ކުޑަކުރުމަށް ކުރައްވަމުންދާ މަސައްކަތްތަކާއި، މިސްކިތްތަކުގެ ފުރާޅުގައި ސޯލާ ޕެނަލް ހަރުކުރުމުގެ މަސައްކަތުގައި ފާއިތުވި 7 އަހަރު ދުވަހު ކުރެވިފައިވާ މަސައްކަތްތަކާއި މިހާރު މަސައްކަތް ގޮސްފައިވާ ހިސާބާ ގުޅޭގޮތުން މެންބަރުން ކުރެއްވި ސުވާލުތަކަށް މިނިސްޓަރ ޖަވާބުދެއްވިއެވެ.

ކޮމިޓީގައި ވޯކިން ކޯރަމް އޮތް ނަމަވެސް ވޯޓިންގ ކޯރަމް ނެތުމުން، އެހެނިހެންގެ ދަށުން އެޖެންޑާކޮށްފައިވާ މަސައްކަތްތައް ދެން އޮންނަ ބައްދަލުވުމެއްގައި ކުރިއަށްގެންދިއުމަށް ނިންމައި މިއަދުގެ ބައްދަލުވުން ނިންމާލެއްވިއެވެ.