Committee Meeting - People's Majlis of Maldives

ޚުލާސާ

މިއަދުގެ ބައްދަލުވުމުގައި ކުރިއަށްގެންދެވީ 93/4 (ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނު)ގެ އިމްޕެކްޓް އެސެސްމެންޓެއް ހެދުމާއި ކްލައިމެޓް ގަވަރނެންސާ ގުޅޭގޮތުން ޓްރާންސްޕޭރެންސީ މޯލްޑިވްސްއިން އަލަށް ފަށާ ކްލައިމެޓް ޕްރޮޖެކްޓާ ގުޅޭ މަޢުލޫމާތު ހިއްސާކުރުމަށް ޓްރާންސްޕޭރެންސީ މޯލްޑިވްސްގެ އެދުމުގެ މަތިން އެ ޖަމިއްޔާގެ ބޭފުޅުންނާ ބައްދަލުކުރެއްވުމެވެ. މި ބައްދަލުވުމުގައި، ތިމާވެށި ހިމާޔަތްކުރުމުގެ ގާނޫނަށް ގެންނަންޖެހޭ ބަދަލުތައް ގެނައުމާ ގުޅޭ ގޮތުންނާއި، ކްލައިމެޓް ގަވަރނެންސާއި، ޓްރާންސްޕޭރެންސީ މޯލްޑިވްސްއިން މިހާތަނަށް ތިމާވެށީގެ ދާއިރާގައި ކުރައްވާފައިވާ މަސައްކަތްތަކާއި އަދި ދިމާވާ ގޮންޖެހުންތަކާ ގުޅޭ މަޢުލޫމާތު ކޮމިޓީއާ ޙިއްސާކުރިއެވެ.

އަދި ޓްރާންސްޕޭރެންސީ މޯލްޑިވްސްއިން ތިމާވެއްޓާ ގުޅުންހުރި ކަންކަމުގައި ކޮމިޓީއާ އެކު މަސައްކަތްކުރުމަށް ޝައުގުވެރިކަން ހުރިކަން ހިއްސާކުރުމުން، ކޮމިޓީގެ މުގައްރިރު ވަނީ އެ ދަޢުވަތު ގަބޫލުކުރައްވައި، ކޮމިޓީގެ ދާއިރާއާ ގުޅުންހުރި މަސައްކަތްތަކުގައި ކޮމިޓީގެ ފަރާތުން އެންމެ ފުރިހަމަ ގޮތުގައި އެއްބާރުލުން ދެއްވާނެ ކަމުގެ ޔަގީންކަން ދެއްވާފައެވެ.