މި ބައްދަލުވުމުގައި ފުރަތަމަ ކުރިއަށް ގެންދެވީ ކޮމިޓީގެ މަސްއޫލިއްޔަތުގެ ދާއިރާގައި ހިމެނޭ އިދާރާތަކުން ފޮނުއްވާފައިވާ އަހަރީ ރިޕޯޓުތައް ދިރާސާކުރެއްވުމުގެ މަސައްކަތް ކުރިއަށްގެންދަވާނެ ގޮތަކާމެދު މަޝްވަރާކުރެއްވިއެވެ. އެގޮތުން، ތިނަދޫ އުތުރު ދާއިރާގެ މެންބަރު ސަޢުދުﷲ ޙިލްމީ ހުށަހަޅުއްވީ، އޮޑިޓަރ ޖެނެރަލްގެ އޮފީހުން ކޮމިޓީއާ ހިއްސާކުރައްވާފައިވާ ކީ ޕަރފޯމެންސް އިންޑިކޭޓަރސްއަށް ރިޢާޔަތްކޮށް އަހަރީ ރިޕޯޓުތަކުގެ ޙުލާޞާއެއް އިދާރީ މޭޒުން ތައްޔާކުރުމަށްފަހު ކޮމިޓީއާ ހިއްސާކުރުމަށެވެ. އެ ހުށަހެޅުއްވުމަށް އެއްވެސް މެންބަރަކު އިޢުތިރާޒްނުކުރައްވާތީ އެ ހުށަހެޅުއްވުމާ އެއްގޮތަށް ކުރިއަށް ގެންދެވުމަށް ނިންމެވިއެވެ.

މި ބައްދަލުވުމުގައި ދެން ކުރިއަށް ގެންދެވީ ޤާނޫނު ނަންބަރު 2021/7 (ދިވެހިރާއްޖޭގެ މަތީ ތަޢުލީމާއި ތަމްރީނުގެ ޤާނޫނު) އަށް ... ވަނަ އިޞްލާޙު ގެނައުމުގެ ބިލާ ގުޅޭގޮތުން ކޮމިޓީން ދެން ޢަމަލުކުރައްވާނެ ގޮތަކާމެދު މަޝްވަރާކުރެއްވުމެވެ. އެއަށްފަހު ނިންމެވީ އެކި ފަރާތްތަކުން ބިލަށް ހުށަހަޅުއްވާފައިވާ އިޞްލާޙުތަކާއި ޚިޔާލުތަކަށް ރިޢާޔަތްކުރެއްވުމާއެކު ބިލު ފުރިހަމަކުރުމަށެވެ.

މީގެ އިތުރުން ޤާނޫނު ނަންބަރު 2021/7 (ދިވެހިރާއްޖޭގެ މަތީ ތަޢުލީމާއި ތަމްރީނުގެ ޤާނޫނު) އަށް ... ވަނަ އިޞްލާޙު ގެނައުމުގެ ބިލާ ގުޅޭގޮތުން ގަލޮޅު އުތުރު ދާއިރާގެ މެންބަރު އިބްރާހީމް މުޙައްމަދު ފޮނުއްވާފައިވާ ސިޓީއާމެދު ކޮމިޓީގެ މެންބަރުން މަޝްވަރާކުރެއްވިއެވެ. އެގޮތުން ހޯރަފުށި ދާއިރާގެ މެންބަރު ޢަލީ މޫސާ ހުށަހަޅުއްވީ، އެ ސިޓީގައި ފާހަގަކުރައްވާފައިވާ ގަވާއިދު، ކޮމިޓީން ދިރާސާކުރެއްވުމަށެވެ. އެ ހުށަހެޅުއްވުމަށް އެއްވެސް މެންބަރަކު އިޢުތިރާޒްކުރައްވާފައި ނުވާތީ އެގޮތައް ކުރިޔަށް ގެންދެވުމަށް ނިންމެވިއެވެ.