މިއަދުގެ ބައްދަލުވުމުގައި ޤާނޫނު ނަންބަރު: 2/2008 (ވަޒީފާއާބެހޭ ޤާނޫނު) އަށް ... ވަނަ އިސްލާހު ގެނައުމުގެ ބިލު ދިރާސާކުރަން ފެއްޓެވިއެވެ. އެގޮތުން މާއްދާއަކުން މާއްދާއަކުން ބިލު ދިރާސާކުރުމުގެ މަސައްކަތް ކުރެއްވިއެވެ. އެގޮތުން ބިލުގެ 65 ވަނަ މާއްދާގެ (ހ) ގައިވާ އިބާރާތް "ދިވެހިރާއްޖޭގައި މަސައްކަތް ކުރުމުގެ ހުއްދަ" އުނިކުރުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހެޅުއްވިއެވެ. ނަމަވެސް ނުރަސްމީކޮށް ދެކެވުނު ވާހަކަތަކަށްފަހު މާއްދާ އޮތްގޮތަށް ބޭވުމަށް ނިންމެވިއެވެ. އަދި މިގޮތަށް ނިންމެވުމުން އެއްވެސް މެންބަރަކު އިއުތިރާޒް ނުކުރައްވާތީ އޮތް ގޮތައް ބޭއްވުމަށް ނިންމެވިއެވެ. 

އެއަށްފަހު ބިލުގެ 65 ވަނަ މާއްދާގެ (ނ) ގައިވާ "ވަޒީފާއަދާކޮށްގެން ނުވާނެއެވެ." މި އިބާރާތް "ވަޒީފާ އަދާކުރުމަކީ މަނާކަމެކެވެ." މިގޮތަށް އިޞްލާޙު ކުރެއްވުމަށް ހަނިމާދޫ ދާއިރާގެ މެންބަރު އަބްދުލްޣަފޫރު މުސާ ހުށަހަޅުއްވައި، މާމިގިލި ދާއިރާގެ މެންބަރު ޤާސިމް އިބްރާހީމް ތާއީދު ކުރެއްވިއެވެ.މި ހުށަހެޅުން ވަނީ ކޮމިޓީއަށް ހާޒިރުވެ ވަޑައިގެންތިއްބެއްވި މެންބަރުންގެ އިއްތިފާޤުން ފާސްވެފައެވެ.

އެއަށްފަހު 1-65 (ހ) ގައިވާ "ކަނޑައެޅިދާނެއެވެ" މި އިބާރާތް "ކަނޑައަޅަންވާނެއެވެ" މިގޮތަށް އިޞްލާޙު ކުރުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި ތުޅާދޫ ދާއިރާގެ މެންބަރު ޢަބްދުލްޙަންނާން އަބޫބަކުރު ތާއީދު ކުރެއްވިއެވެ. މި ހުށަހެޅުން ވަނީ ކޮމިޓީއަށް ހާޒިރުވެ ވަޑައިގެންތިއްބެއްވި މެންބަރުންގެ އިއްތިފާޤުން ފާސްވެފައެވެ.

އެއަށްފަހު 1-65 (ށ) ގައިވާ "ކަނޑައެޅިދާނެއެވެ" މި އިބާރާތް "ކަނޑައަޅަންވާނެއެވެ" މިގޮތަށް އިޞްލާޙު ކުރުމަށާއި ކޮމިޓީއަށް ލިބިފައިވާ ކޮމެންޓްއަށް ރިއާޔަތްކޮށް "ކޮންމެ ދާއިރާއަކަށް ކަނޑައެޅޭ ކޯޓާ ތަކުގެ އަދަދާއި އަދި ކޯޓާ ދޫކުރެވިފައިވާ މިންވަރު އެނގޭނެހެން، ކޮންމެ އަހަރަކު ދެ ފަހަރު ޢާއްމުކުރުމަށް ކަނޑައަޅައި މާއްދާ އިޞްލާޙު ކުރުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި މާފަންނު އުތުރު ދާއިރާގެ މެންބަރު މުޙައްމަދު ނާޡިމް ތާއީދު ކުރެއްވިއެވެ. މި ހުށަހެޅުން ވަނީ ކޮމިޓީއަށް ހާޒިރުވެ ވަޑައިގެންތިއްބެއްވި މެންބަރުންގެ އިއްތިފާޤުން ފާސްވެފައެވެ.

އެއަށްފަހު 1-65 (ބ) ގެ 4 އަށް މޯލްޑިވްސް ޓްރޭޑް ޔޫނިއަން އަދި މޯލްޑިވްސް ހެލްތް ޕްރޮފެޝަނަލްސް ޔޫނިއަންއިން ފޮނުއްވާފައިވާ އިޞްލާޙު ބަލައިގަންނަން ފެނިވަޑައިނުގަންނަވާ ކަމަށާއި ބިލުގައި މިހާރު މާއްދާ އޮތްގޮތަށް ބޭއްވުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި މާމިގިލި ދާއިރާގެ މެންބަރު ޤާސިމް އިބްރާހީމް ތާއީދު ކުރެއްވިއެވެ. މި ހުށަހެޅުން ވަނީ ކޮމިޓީއަށް ހާޒިރުވެ ވަޑައިގެންތިއްބެއްވި މެންބަރުންގެ އިއްތިފާޤުން ފާސްވެފައެވެ.

އެއަށްފަހު 1-65 (ބ) ގެ 5 އަށް މޯލްޑިވްސް ޓްރޭޑް ޔޫނިއަން އަދި މޯލްޑިވްސް ހެލްތް ޕްރޮފެޝަނަލްސް ޔޫނިއަންއިން ފޮނުއްވާފައިވާ އިޞްލާޙު ބަލައިގަންނަން ފެނިވަޑައިނުގަންނަވާ ކަމަށާއި ބިލުގައި މިހާރު މާއްދާ އޮތްގޮތަށް ބޭއްވުމަށް މާފަންނު އުތުރު ދާއިރާގެ މެންބަރު މުޙައްމަދު ނާޡިމް ހުށަހަޅުއްވައި މާމިގިލި ދާއިރާގެ މެންބަރު ޤާސިމް އިބްރާހީމް ތާއީދު ކުރެއްވިއެވެ. މި ހުށަހެޅުން ވަނީ ކޮމިޓީއަށް ހާޒިރުވެ ވަޑައިގެންތިއްބެއްވި މެންބަރުންގެ އިއްތިފާޤުން ފާސްވެފައެވެ.

އެއަށްފަހު 1-65 (ޅ) އަދި (ކ) ބިލުގައި އޮތް ގޮތަށް ބޭއްވުމަށް މާފަންނު އުތުރު ދާއިރާގެ މެންބަރު މުޙައްމަދު ނާޡިމް ހުށަހަޅުއްވައި މާމިގިލި ދާއިރާގެ މެންބަރު ޤާސިމް އިބްރާހީމް ތާއީދު ކުރެއްވިއެވެ. މި ހުށަހެޅުން ވަނީ ކޮމިޓީއަށް ހާޒިރުވެ ވަޑައިގެންތިއްބެއްވި މެންބަރުންގެ އަޣްލަބިއްޔަތުން ފާސްވެފައެވެ.

އެއަށްފަހު 4-65 (ނ) ގައި ބަޔާންކޮށްފައިވާ ފީ ކަމަށްވާ 2000 (ދެހާސް) ރުފިޔާ އުނިކުރުމަށާއި މި ޤާނޫނުގެ ދަށުން ހަދާ ގަވާއިދުގައި ފީ ހިމެނުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހެޅުއްވިއެވެ. ނަމަވެސް މި ހުށަހެޅުމަށް ތާއީދު ލިބިފައި ނުވެއެވެ. އަދި ބިލުގައި މިހާރު އޮތް ގޮތަށް މާއްދާ ބޭވުމަށް ނިންމެވިއެވެ.

އަދި 4-65 (ބ) އަށް 2 އިޞްލާހެއް ވަނީ ހުށަހެޅިފައެވެ. އެއީ؛

1. މާފަންނު އުތުރު ދާއިރާގެ މެންބަރު މުޙައްމަދު ނާޡިމް ހުށަހަޅުއްވައި ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ތާއީދުކުރެއްވީ %30 (ތިރީސް އިންސައްތަ) އަށް ވުރެ އިތުރުވެގެން ނުވާނެކަމަށް ބަޔާންކޮށްފައިވާތީ އެ އިންސައްތަ %10 (ދިހަ އިންސައްތަ) އަށް ކުޑަކުރުމަށް؛ އަދި
2. މާމިގިލި ދާއިރާގެ މެންބަރު ޤާސިމް އިބްރާހީމް ހުށަހެޅުއްވީ މި މާއްދާގެ (ރ) އަދި (ބ) އުނިކުރުމަށް (މި ހުށަހެޅުމަށް ތާއީދު ލިބިފައި ނުވޭ)

އެއަށްފަހު ކޮމިޓީން ނިންމެވީ ބިލުގައި ވާ ފީތަކާގުޅޭ ގޮތުން އަދި އިތުރަށް މެންބަރުން ވިސްނެވުމަށްފަހު ދެން އޮންނަ ބައްދަލުވުމެއްގައި މި މާއްދާއަށް ގޮތެއް ނިންމެވުމަށެވެ.