Committee Meeting - People's Majlis of Maldives

ޚުލާސާ

މިއަދުގެ ބައްދަލުވުމުގައި، ތިމާވެއްޓަށް ގެއްލުން ލިބޭ ފަދަ އެކިއެކި މައްސަލަތަކާ ގުޅިގެން ޖޫރިމަނާކޮށްފައިވާ ފަރާތްތަކުން ޖޫރިމަނާ ފައިސާ ނުދައްކާ މައްސަލައާ ގުޅިގެން އެންވަޔަރަންމަންޓަލް ޕްރޮޓެކްޝަން އޭޖެންސީ (އީ.ޕީ.އޭ)ގެ ކަމާގުޅޭ ބޭފުޅުންނާ ބައްދަލުކުރެއްވިއެވެ. މި ބައްދަލުވުމުގައި އީ.ޕީ.އޭއިން މަސައްކަތްތައް ކުރިއަށްގެންދާ ގޮތާއި، ޖޫރިމަނާ ފައިސާގެ އަދަދު ކަނޑައަޅާ ގޮތާއި، މިހާތަނަށް ކުރެވިފައިވާ ބައެއް މަސައްކަތްތަކާ ގުޅޭގޮތުން އީ.ޕީ.އޭއިން ކޮމިޓީއާ މަޢުލޫމާތު ހިއްސާކުރެއްވިއެވެ.

އަދި އީ.ޕީ.އޭގެ ނިންމުންތައް އިސްތިއުނާފުކުރުމުގައި މިނިސްޓަރަށް ދެއްވާފައިވާ ދައުރާއި އީ.ޕީ.އޭގެ ނިންމުންތައް ތަންފީޒުކުރުމުގައި ޚާއްސަކޮށް ޖޫރިމަނާގެ ފައިސާ ދައުލަތަށް ހޯދުމުގައި ހުރި ގޮންޖެހުންތަކާއި ގާނޫނާއި ގަވާއިދުތަކަށް ގެންނަން ފެންނަ ބަދަލުތަކާ މެދު މެންބަރުން ކުރެއްވި ސުވާލުތަކަށް އީ.ޕީ.އޭގެ ބޭފުޅުން ޖަވާބުދެއްވިއެވެ.

އެއަށްފަހު، ރާއްޖޭގެ ރަށްރަށުން ރުއްގަސް ނެގުމުގައި މިހާރު ޢަމަލުކުރަމުން އަންނަ ގޮތާ މެދު ކޮމިޓީ މެންބަރުންގެ ހުރި ބައެއް ކަންބޮޑުވުންތަކާ ގުޅިގެން މުގައްރިރު ކުރެއްވި ސުވާލަށް ޖަވާބުދެއްވައި، އެ ކަމުގައި އީ.ޕީ.އޭއިން ޢަމަލުކުރަމުން އަންނަ ގޮތުގެ މަޢުލޫމާތު ކޮމިޓީއާ ހިއްސާކުރެއްވިއެވެ. އެއަށްފަހު މިއަދުގެ ކޮމިޓީ ބައްދަލުވުން ނިންމާލެއްވިއެވެ.