މިއަދުގެ ބައްދަލުވުމުގައި، އޮޑިޓަރ ޖެނެރަލްގެ އޮފީހުގެ 2025 ވަނަ އަހަރަށް ލަފާކުރާ ބަޖެޓު ދިރާސާކުރެއްވިއެވެ. އެގޮތުން، އެ އޮފީހުން ހުށަހަޅުއްވާފައިވާގޮތަށް އޮޑިޓަރ ޖެނެރަލްގެ އޮފީހުގެ 2025 ވަނަ އަހަރަށް ލަފާކޮށް ހުށަހަޅާފައިވާ ބަޖެޓްގެ ރިކަރަންޓް ޚަރަދާއި އޮފީސް ހިންގުމަށް ބޭނުންވާ ހަރުމުދާ ހޯދުމަށް ކުރާ ޚަރަދުގެ ގޮތުގައި 80,497,312 (އަށްޑިހަ މިލިއަން ހަތަރު ލައްކަ ނުވަދިހަ ހަތް ހާސް ތިން ސަތޭކަ ބާރަ) ރުފިޔާކަމަށާއި، އަދި ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ގޮތުގައި މިނިސްޓްރީ އޮފް ފިނޭންސްއިން އިސްލާޙުކުރެއްވިގޮތަށް 34،000،000 (ތިރީސް ހަތަރު މިލިއަން) ރުފިޔާކަމުގައި ކަނޑައަޅުއްވައި، 2024 ވަނަ އަހަރަށް ރައްޔިތުންގެ މަޖިލީހުން އޮޑިޓަރ ޖެނެރަލްގެ އޮފީހަށް ފާސްކުރާ މުޅި ޖުމްލަ ބަޖެޓްގެ ޢަދަދަކީ 114,497,312 (އެއް ސަތޭކަ ސާދަ މިލިއަން ހަތަރު ލައްކަ ނުވަދިހަ ހަތް ހާސް ތިން ސަތޭކަ ބާރަ) ރުފިޔާކަމަށް ފާސްކުރުމަށް ކޮމިޓީ ރިޕޯޓް މަޖިލީހުގެ ތަޅުމަށް ފޮނުވުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވައި، ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ތާޢީދުކުރެއްވި ހުށަހެޅުން ކޮމިޓީގެ އިއްތިފާޤުން ފާސްވިއެވެ.

އެއަށްފަހު، ކްރިމިނަލް ކޯޓުގެ ހާލަތު ގޯސްވެ އެކޯޓު ހިންގަމުންދިޔަ ޢިމާރާތް ބޭނުންނުކުރެވޭ ވަރަށް ހަލާކުވުމުގެ ސަބަބުން އެކޯޓަށް ދާއިމީ ޢިމާރާތެއް ހަމަޖެހެންދެން، ކްރިމިނަލް ކޯޓު ހިންގުން ހުޅުމާލެ ކޮވިޑް ފެސިލިޓީގެ ގޮތުގައި ކުރިން ބޭނުންކޮށްފައިވާ 4 ބުރީގެ ޢިމާރާތަށް ބަދަލުކުރުމަށް ނިންމުމާ ގުޅިގެން އެކަމުގެ މަސައްކަތްތައް ފެށުމަށްފަހު، ކުރިމަތިވަމުން އަންނަ މައްސަލަތަކާއި ދިމާވާ ގޮންޖެހުންތަކާގުޅޭގޮތުން މަޝްވަރާކުރުމަށް ޖުޑީޝިއަރީ ކޮމިޓީއާއި މާލިއްޔަތު ކޮމިޓީއާއެކު ބައްދަލުވުމެއް ހަމަޖައްސަވައިދެއްވުމަށް އެދި ޖުޑީޝަލް ސަރވިސް ކޮމިޝަނުން ފޮނުއްވާފައިވާ ސިޓީއާ ގުޅޭގޮތުން މަޝްވަރާކުރެއްވިއެވެ. އެ ކޮމިޝަނުން އެދިފައިވާ ފަދައިން ޖުޑީޝިއަރީ ކޮމިޓީއާއެކު ޖޮއިންޓް ކޮމިޓީ ބައްދަލުވުމެއްގެ ގޮތުގައި އެ ކޮމިޝަނާ ބައްދަލުވުމެއް ބޭއްވުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވި ހުށަހެޅުން ކޮމިޓީގެ އިއްތިފާޤުން ފާސްވިއެވެ.

މީގެ އިތުރުން، އޮޑިޓަރ ޖެނެރަލްގެ އޮފީހުން 2025 ވަނަ އަހަރުގެ ތެރޭގައި ކުރިއަށް ގެންދިއުމަށް ރާވާ އޮޑިޓްތައް ހިމަނައިގެން އެ އަހަރަށް ކަނޑައަޅާ އެނުއަލް ވަރކް ޕްލޭން ތައްޔާރުކުރުމުގެ މަސައްކަތް ކުރަމުންދާތީ، މި ވަރކް ޕްލޭންގައި ހިމަނައިގެން ދައުލަތުގެ ވަކި އިދާރާއެއްގެ ނުވަތަ ސަރުކާރުން ހިންގާ ވަކި ޕްރޮގްރާމެއް ނުވަތަ ޕްރޮޖެކްޓެއްގެ ޚާއްސަ އޮޑިޓެއް ކުރިއަށް ގެންދިއުމަށް ބޭނުންވާނަމަ އެކަން އަންގަވާދެއްވުމަށް އެދި އެ އޮފީހުން ފޮނުއްވާފައިވާ ސިޓީއާ ގުޅޭގޮތުން، ކޮމިޓީން ބޭނުންވެއްޖެ ހިނދެއްގައި، ޚާއްޞަ އޮޑިޓެއް ކުރުމަށް އެ އޮފީހަށް ކޮމިޓީން އަންގަވައިފިނަމަ، އެ އޮޑިޓެއް ނުވަތަ އޮޑިޓްތަކެއް ކުރެއްވުމަށް ވަރކް ޕްލޭންގައި އެލޮކޭޝަންއެއް ހިމަނުއްވަން އެ އޮފީހަށް ދެންނެވުމަށް ނިންމެވިއެވެ.

އެއަށްފަހު، މިނިސްޓްރީ އޮފް ފިނޭންސްއިން ފޮނުއްވާފައިވާ ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް (އެޗް.ޑީ.ސީ) އަށް ބޭނުންވާ ވާރކިންގ ކެޕިޓަލް އަދި ޑްރެޖިންގ، ރިކްލެމޭޝަން އެންޑް ޝޯރ ޕްރޮޓެކްޝަން އޮފް ތިލަފުށި ފޭސް 2 ގެ މަޝްރޫޢުގެ އެޑްވާންސް ޕޭމަންޓްގެ 50 އިންސައްތައަށް ބޭނުންވާ ފައިނޭންސިންގ ހަމަޖެއްސުމަށް ހަބީބް ބޭންކް ލިމިޓެޑް (އެޗް.ބީ.އެލް) އިން ނަގާފައިވާ 200 މިލިއަން ދިވެހި ރުފިޔާގެ ލޯނު ފެސިލިޓީއަށް ދޫކޮށްފައިވާ ގެރެންޓީއާގުޅޭ މަޢުލޫމާތާއި، އޭޝިއަން ޑިވެލޮޕްމަންޓް ބޭންކް (އޭ.ޑީ.ބީ) އިން ކުރިއަށްގެންދާ ސްޓްރެންތެނިންގ ފިސްކަލް ސަސްޓެއިނަބިލިޓީ އެންޑް މެނޭޖްމަންޓް ޕްރޮގްރާމް (ސަބް ޕްރޮގްރާމް 2) އަށް ކޯ-ފައިނޭންސިންގ ހަމަޖެއްސުމަށް އޭޝިއަން އިންފްރާސްޓަރަކްޗަރ އިންވެސްޓްމަންޓް ބޭންކް (އޭ.އައި.އައި.ބީ) އާއި ދިވެހި ސަރުކާރާ ދެމެދު ވެފައިވާ 15 މިލިއަން އެމެރިކާ ޑޮލަރުގެ ލޯނު އެގްރީމަންޓްގެ މަޢުލޫމާތު މެންބަރުންނާ ހިއްސާކުރެއްވިއެވެ.

އަދި އޮޑިޓަރ ޖެނެރަލާއި، އެ ބޭފުޅާގެ އަނބި ދަރީންގެ މާލީ ބަޔާން މެންބަރުންނާ ހިއްސާކުރެއްވިއެވެ.

މީގެ އިތުރުން، އޮޑިޓަރ ޖެނެރަލްގެ އޮފީހުގެ 2023 ވަނަ އަހަރުގެ އޮޑިޓްކޮށް ނިންމުމަށް އިތުރު ވަގުތު ބޭނުންވާކަމަށް ބަޔާންކުރައްވައި ކޭ.ޕީ.އެމް.ޖީއިން ފޮނުއްވާފައިވާ މެއިލްއާ ގުޅޭގޮތުން މަޝްވަރާކުރެއްވުމަށްފަހު، އެ އޮފީހުން އެދިފައިވާ ފަދައިން 22 އޮކްޓޫބަރު 2024 ގެ ނިޔަލަށް ސުންގަޑި އިތުރުކޮށްދެއްވުމަށް ނިންމެވިއެވެ.