މިއަދުގެ ބައްދަލުވުމުގައި، އޮޑިޓަރ ޖެނެރަލްގެ އޮފީހުން ރިޓަޔަރކުރެއްވި އިރު އެ އޮފީހުން ރިޓަޔަރމަންޓުގެ ކަންތައް ނިންމަވާދެއްވުމުގައި ޢަމަލު ކޮށްފައިވާގޮތުން، މިނިވަން މުއައްސަސާތަކުގެ ވަޒީފާއިން ރިޓަޔަރކުރައްވާ ބޭފުޅުންނަށް ލިބޭގޮތަށް ހަމަޖެހިފައިވާ ޢިނާޔަތަކުން މަޙްރޫމްވެފައިވާކަމަށް ބަޔާންކޮށް ޢަމިއްލަ ފަރާތަކުން ފޮނުއްވާފައިވާ މައްސަލައާ ގުޅޭގޮތުން މަޝްވަރާކުރެއްވިއެވެ. އެގޮތުން މި މައްސަލައިގައި ކަންހިނގާފައިވާގޮތާއި ގުޅޭގޮތުން އޮޑިޓަރ ޖެނެރަލްގެ އޮފީހުން މަޢުލޫމާތު ހޯދުމަށާއި، އަދި އެ ފަރާތަށް ރިޓަޔަރމަންޓް ޢިނާޔަތް ލިބުމުން މަޙްރޫމްވެގެން ދިޔަކަމާއި، ގެއްލިފައިވާ ޙައްޤު އަނބުރާ އިޢާދަވާނެ ގޮތަކަށް ފިޔަވަޅު އަޅުއްވައިދެއްވުމަށް އެދި ވަޒީފާއާބެހޭ ޓްރައިބިއުނަލް ނުވަތަ އެހެންވެސް ތަޙުޤީޤީ އިދާރާއަކަށް މައްސަލަ ހުށަހަޅުއްވާފައިވޭތޯ މަޢުލޫމާތު ސާފުކުރުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، ގެމަނަފުށި ދާއިރާގެ މެންބަރު އަސަދުﷲ ޝިހާބް ތާޢީދުކުރެއްވިއެވެ. މި ހުށަހެޅުން ކޮމިޓީގެ އިއްތިފާޤުން ފާސްވިއެވެ.

އެއަށްފަހު، އާސަންދަ ކޮމްޕެނީ ލިމިޓެޑުން ހޮސްޕިޓަލްއެއް އެޅުމަށްޓަކައި ނޯތް ކޯސްޓް ކޮންޓްރެކްޓަރސް ޕްރައިވެޓް ލިމިޓެޑްއާ ޙަވާލުކުރުމަށްފަހު އެ ކޮންޓްރެކްޓް ބާތިލްކުރުމާ ގުޅިގެން ބަދަލުގެގޮތުގައި ފައިސާ ދޭންޖެހުނުކަމަށާއި، 2022 ވަނަ އަހަރު ހޮސްޕިޓަލްގެ ބަދަލުގައި އޮފީސް ޢިމާރާތެއް އެޅުމަށް އެ ކުންފުންޏާ ޙަވާލުކުރުމަށްފަހު އެޑްވާންސްގެ ގޮތުގައި ފައިސާ ދައްކާފައިވީނަމަވެސް މަސައްކަތް ކުރިއަށް ނުދާ މައްސަލައާ ގުޅޭގޮތުން މަޝްވަރާކުރެއްވުމަށްފަހު، މި މައްސަލައިގައި ކަންހިނގާފައިވާގޮތުގެ ޖިނާއީ ތަޙްޤީޤެއް ކޮށްދެއްވުމަށް އެދި، މި މައްސަލަ ދިވެހި ފުލުހުންގެ ޚިދުމަތަށް ހުށަހެޅުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހަޅުއްވައި، ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ތާޢީދުކުރެއްވިއެވެ. މި ހުށަހެޅުން ކޮމިޓީގެ އަޣްލަބިއްޔަތުން ފާސްވިއެވެ.

އަދި ނޯތް ކޯސްޓް ކޮންޓްރެކްޓަރސް ޕްރައިވެޓް ލިމިޓެޑްއަކީ ޙަވާލުކުރައްވާފައިވާ މަސައްކަތް ފުރިހަމަކުރުމުގެ ޤާބިލުކަން ނެތް ފަރާތެއްކަމަށް ދޭހަވާގޮތަށް އާސަންދަ ކޮމްޕެނީ ލިމިޓެޑްގެ ސިޓީގައި ބަޔާންކުރައްވާފައިވާތީ، އެ ގޮތަށް އެ ކުންފުނިން ޤަބޫލުކުރައްވާނަމަ އެއްބަސްވުން އުވާލުމާމެދު ގޮތެއް ނިންމުމުށާއި، ކޮންޓްރެކްޓަރަށް ދެއްވާފައިވާ އެޑްވާންސް ޕޭމަންޓު ރިކަވަރކުރުމަށް އަޅަންޖެހޭ ފިޔަވަޅުތައް އެޅުމަށް އެ ކުންފުންޏަށް ލަފާދެއްވުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހަޅުއްވައި، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ތާޢީދުކުރެއްވިއެވެ. މި ހުށަހެޅުން ކޮމިޓީގެ އަޣްލަބިއްޔަތުން ފާސްވިއެވެ.

އެއަށްފަހު، ފެމިލީ ޕްރޮޓެކްޝަން އޮތޯރިޓީއަށް ދިމާވެފައިވާ ޖާގައިގެ ދަތިކަން ހައްލުކޮށްދެއްވުމަށާއި، އޮފީސް ކުލީގެ ގޮތުގައި އޮތޯރިޓީން ހޭދަކުރަންޖެހޭ ބަޖެޓު ކުޑަކުރުމަށްޓަކައި ދައުލަތުގެ އިމާރާތަކުން އެ އޮތޯރިޓީއަށް އޮފީސް ޖާގައެއް ހަމަޖައްސަވައިދެއްވުމަށް އެދި ރައްޔިތުންގެ މަޖިލީހަށް ކޮޕީކުރައްވައި، ރައީސުލްޖުމްހޫރިއްޔާގެ އޮފީހަށް ފޮނުއްވާފައިވާ ސިޓީއާއި، ރައްޔިތުންގެ މަޖިލީހުން ކައުންސިލަރުންގެ މުސާރައާއި ޢިނާޔަތްތައް މުރާޖާކޮށް، އެގޮތުގެ މަތިން މުސާރައާއި ޢިނާޔާތްތައް ދެމުންގެންދިޔަ ނަމަވެސް، އިތުރެވެފައިވާ ފައިސާ ކައުންސިލްގެ ބަޖެޓަށް އިތުރުކޮށްދެއްވާފައި ނުވާކަމަށާއި، އެހެންކަމުން މި އަހަރުގެ ނިޔަލަށް މުވައްޒަފުންނަށް މުސާރަ ދެމުން ނުގެންދެވޭނެކަމަށް ބަޔާންކޮށް ހުވަދުއަތޮޅު ދެކުނުބުރީ ދާންދޫ ކައުންސިލްގެ އިދާރާއިން ރައްޔިތުންގެ މަޖިލީހަށް ކޮޕީކުރައްވައި ލޯކަލް ގަވަރމަންޓް އޮތޯރިޓީއަށް ފޮނުއްވާފައިވާ ސިޓީ ކޮމިޓީއާ ޙިއްޞާކުރެއްވިއެވެ.

މީގެ އިތުރުން، ކޮމިޓީގައި ދިރާސާ ކުރައްވަމުންގެންދަވާ ސޮވްރިން ޑިވެލޮޕްމަންޓް ފަންޑުގެ ބިލާއި، ދައުލަތުގެ ދަރަންޏާބެހޭ ބިލާއި، ދައުލަތުގެ ފިސްކަލް ޒިންމާގެ ބިލު އަދި އިންޝުއަރެންސްގެ ބިލު ދިރާސާކޮށް ކޮމިޓީގެ މަސައްކަތް ނިންމަވާނެ ސުންގަޑި ނޮވެންބަރު 2024 ގެ ނިޔަލަށް އިތުރުކުރުމަށް ނިންމެވިއެވެ.

އެއަށްފަހު، އެހެނިހެން މައްސަލަތަކުގެ ތެރެއިން، ދުންފަތުން ނެގޭ ޓެކްސްއަށް ގެނެވޭ ބަދަލާއި ގުޅިގެން ދުންފަތުގެ ބާވަތްތައްކުގެ ސްމަގްލިންގ އިތުރުވެ، ދައުލަތުގެ އާމްދަނީއަށް ލިބޭ ގެއްލުމުގެ އިތުރުން ޤައުމުގެ ބޯޑަރގެ ސެކިއުރިޓީއާމެދު ސުވާލުއުފެދޭ ކަމަށާއި،  އެހެންކަމުން، މި މައްސަލައިގައި ދައުލަތަށް އާމްދަނީއަށް ލިބޭ ގެއްލުން މި ކޮމިޓީން ދިރާސާކުރުމަށާއި، ބޯޑަރގެ ސެކިއުރިޓީގެ މައްސަލަ ސަލާމަތީ ޚިދުމަތްތަކާބެހޭ ކޮމިޓީގެ ސަމާލުކަމަށް ގެނައުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހެޅުއްވިއެވެ. މި ހުށަހެޅުން ކޮމިޓީގެ އިއްތިފާޤުން ފާސްވިއެވެ.

އެއަށްފަހު، ފުލުހުންގެ ޚިދުމަތް ފުޅާކޮށް ޚިދުމަތުގެ ފެންވަރު ރަނގަޅުކުރުމުގެ ގޮތުން އަތޮޅުތެރޭގެ ގިނަ ރަށްތަކުގައި ޕޮލިސް ސްޓޭޝަނާއި، ޕޮލިސް ޕޯސްޓް އަދި ޑިޓެންޝަން ސެންޓަރު ހެދުމުގެ މަޝްރޫޢުގެ ދަށުން ދިވެހި ފުލުހުންގެ ޚިދުމަތާއި އޭ.ބީ.އެލް އިންދިރާ ޕްރޮޖެކްޓްސް ޖޭ.ވީއާ ދެމެދު ސޮއިކޮށްފައިވާ އެއްބަސްވުމާ ގުޅިގެން ކަންހިނގާފައިވާގޮތް ކޮމިޓީން ދިރާސާކުރުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ތާޢީދުކުރެއްވިއެވެ. މި ހުށަހެޅުން ކޮމިޓީގެ އިއްތިފާޤުން ފާސްވިއެވެ.

މީގެ އިތުރުން، ބޯޑަރ ސެކިއުރިޓީއާ ގުޅޭގޮތުން ސޮއިކުރެވިފައިވާ އެއްބަސްވުމުގެ މައްސަލަ ދިރާސާކުރަން ފެންނަކަމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، ހުޅުމާލެ ދެކުނު ދާއިރާގެ މެންބަރު ޑޮކްޓަރ އަޙްމަދު ޝަމްހީދު ތާޢީދުކުރެއްވި ހުށަހެޅުން ކޮމިޓިގެ ވޯޓުން ފާހެއް ނުވިއެވެ.