މިއަދުގެ ބައްދަލުވުމަކީ ހުވަދުއަތޮޅު ދެކުނުބުރީ ހޯނޑެއްދޫ ކައުންސިލްގެ އިދާރާއިން 10 އޮކްޓޫބަރު 2024 ގައި ފޮނުއްވާފައިވާ ސިޓީ ގުޅޭގޮތުން މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްގެ ބޭފުޅުންނާ ބައްދަލުކުރުމަށް ބޭއްވުނު ބައްދަލުވުމަކަށްވީ ނަމަވެސް، ރައީސުލްޖުމްހޫރިއްޔާ އޮފީހުގައި ކުރިއަށް ގެންދަވާ ކެބިނެޓް ބައްދަލުވުމުގައި މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް ބައިވެރިވެވަޑައިގަންނަވަން ޖެހިވަޑައިގަތުމުގެ ސަބަބުން މިއަދުގެ ބައްދަލުވުން ފަސްކޮށްދެއްވުމަށް އެދިވަޑައިގެންފައިވާތީ، އެ މައްސަލަ އެހެން ދުވަހަކަށް އެޖެންޑާކުރުމަށް ނިންމަވައި، ކޮމިޓީގައި ނުނިމި ހުރި މަސައްކަތްތަކާ ގުޅޭގޮތުން މަޝްވަރާކުރުން ކުރިއަށް ގެންދެވިއެވެ.

އެގޮތުން، ޓެކްސީ ފްލީޓެއް ތަޢާރަފުކުރަން ސަރުކާރުން ނިންމި ނިންމުމާ ގުޅިގެން ހުރި ކަންބޮޑުވުންތައް ހިއްސާކުރުމަށް އެދި ޑްރައިވަރސް އެސޯސިއޭޝަން އޮފް މޯލްޑިވްސްއިން ފޮނުއްވާފައިވާ މައްސަލައާ ގުޅޭގޮތުން ކޮމިޓީން ގޮތެއް ނިންމެވުމަށް ހުޅުވާލި ފުރުޞަތުގައި، 3 ހުށަހެޅުމެއް ހުށަހެޅިއެވެ.

1. މި މައްސަލަ ހައްލުކުރުމުގެ ގޮތުން، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އަދި ޑްރައިވަރސް އެސޯސިއޭޝަން އޮފް މޯލްޑިވްސްއާ އެކުގައި ބައްދަލުވުމެއް ބާއްވައި މި މައްސަލައަށް ގޮތެއް ނިންމެވުމަށް ތިނަދޫ އުތުރު ދާއިރާ މެންބަރު ސަޢުދުﷲ ޙިލްމީ ހުށަހަޅުއްވައި ކެންދޫ ދާއިރާ މެންބަރު މަޢުރޫފް ޛާކިރު ތާއިދުކުރެއްވި ހުށަހެޅުން.

2. މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އަދި ޑްރައިވަރސް އެސޯސިއޭޝަން އޮފް މޯލްޑިވްސްއާ އެކުގައި ބޭއްވުނު ބައްދަލުވުމުގައި ސާފުކުރެވުނު މަޢުލޫމާތުގެ އަލީގައި މި މައްސަލައަށް ގޮތެއް ނިންމެވުމަށް މައްޗަންގޮޅި މެދު ދާއިރާ މެންބަރު އަޙްމަދު ޟަމީރު ހުށަހަޅުއްވައި ވެލިދޫ ދާއިރާ މެންބަރު މުޙައްމަދު ޢައްބާސް ތާއިދުކުރެއްވި ހުށަހެޅުން. (މި ހުށަހެޅުން ހުށަހެޅުއްވި މެންބަރު ވަނީ، މި ހުށަހެޅުން އަނބުރާ ގެންދަވާފައެވެ)

3. މި މައްސަލައާ ގުޅިގެން ޑްރައިވަރސް އެސޯސިއޭޝަން އޮފް މޯލްޑިވްސް އިން މިމައްސަލާގައި ބޭނުންވާ ޙައްލަކީ ކޮބާކަމާއި، ޚިދުމަތް ހަރުދަނާ ކުރުމަށް އެފަރާތުން އެދޭ ކަންކަމާއި، ގަވާއިދުތައް ހަރުދަނާކުރުމަށް ކުރަންޖެހޭ މަސައްކަތްތަކަކީ ކޮބައިތޯ ލިޔުމުން އެ އެސޯސިއޭޝަނުން ސާފުކުރުމަށްފަހު މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޖަވާބެއް ހޯދުމަށް ހޯރަފުށި ދާއިރާ މެންބަރު ޢަލީ މޫސާ ހުށަހަޅުއްވައި މައްޗަންގޮޅި މެދު ދާއިރާ މެންބަރު އަޙްމަދު ޟަމީރު ތާއިދުކުރެއްވި ހުށަހެޅުން.

ހުށަހެޅުމަށް ތާއީދު ލިބިފައިވާ ތަރުތީބުން ފުރަތަމަ ވޯޓަށް އެއްސެވީ ޑްރައިވަރސް އެސޯސިއޭޝަން އޮފް މޯލްޑިވްސް އިން ހުށަހަޅުއްވާފައިވާ މައްސަލަ ހައްލުކުރުމުގެ ގޮތުން، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އަދި ޑްރައިވަރސް އެސޯސިއޭޝަން އޮފް މޯލްޑިވްސްއާ އެކުގައި ބައްދަލުވުމެއް ބާއްވައި މި މައްސަލައަށް ގޮތެއް ނިންމެވުމަށް ހުށަހެޅުނު ހުށަހެޅުއްވުމަށެވެ. މި ހުށަހެޅުމަށް ދެކޮޅަށް ލިބުނު ވޯޓު އެއްވަރުވުމުން ކޮމިޓީގެ މުޤައްރިރު ވަނީ މި ހުށަހެޅުމަށް ފެންނަ ކަމަށް ވޯޓު ދެއްވާފައެވެ.

އެހެންކަމުން، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އަދި ޑްރައިވަރސް އެސޯސިއޭޝަން އޮފް މޯލްޑިވްސްއާ އެކުގައި ބައްދަލުވުމެއް ބާއްވައި މިމައްސަލައަށް ގޮތެއް ނިންމެވުމަށް ކޮމިޓީގެ އަޣުލަބިއްޔަތުން ފާސްވިއެވެ.

އެއަށްފަހު އެހެނިހެން މައްސަލަ ހުށަހެޅުމަށް ހުޅުވާލި ފުރުޞަތުގައި، ކާޑެއްދޫ އެއަރޕޯޓަކީ އިޤްތިޞާދީ ގޮތުން ދިވެހިރާއްޖެއަށް ގިނަ މަންފާތަކެއް ލިބޭނެ އަދި އެއަރޕޯޓަކުން އުފެދުންތެރި މަސައްކަތްތަކެއް ކުރެވި އާމްދަނީ އިތުރުކުރެވިގެންދާނެ ފަދަ ތަނަކަށް ހެދެން އޮތް ތަނެއް ކަމުގައި ވީނަމަވެސް، އެ އެއަރޕޯޓު ހިންގާ ފަރާތުން އެ އެއަރޕޯޓު ތަރައްޤީކޮށްފައިނުވާކަމަށާއި، އެއަރޕޯޓްގެ މެއިންޓެނަންސް މަސައްކަތް އެންމެ އެކަށީގެންވާ މިންވަރަށް ކޮށްފައިނުވާކަމަށާއި، އެއަރޕޯޓުގެ ޢިމާރާތުގެ ފެންވަރާއި އެ އެއަރޕޯޓުން ދެމުންދާ ޚިދުމަތްތައް އެންމެ އެކަށީގެންވާގޮތަށް ލިބެމުންނުދާތީ، އިޤްތިޞާދީ ގޮތުން ލިބެންޖެހޭ ނަފާ އެންމެ ރަނގަޅަށް ލިބެމުންނުދާކަމަށް ފާހަގަކުރައްވައި އެކަން ބައްލަވައިދިނުމަށް އެދި ތިނަދޫ އުތުރު ދާއިރާ މެންބަރު ސަޢުދުﷲ ޙިލްމީ މައްސަލައެއް ހުށަހެޅުއްވިއެވެ.

މި މައްސަލަ ހުށަހެޅުމާއި ގުޅިގެން މައްސަލައާ ގުޅޭގޮތުން މަޝްވަރާކުރުމަށް ހުޅުވާލި ފުރުޞަތުގައި، ކާޑެއްދޫ އެއަރޕޯޓު ހިންގާ ފަރާތް ކަމުގައިވާ ވިލާ އެއަރގެ ބޭފުޅުންނާ ބައްދަލުކުރުމަށްފަހު، އެ އެއަރޕޯޓުގެ ޙާލަތު ދެނެގަތުމަށް އެ އެއަރޕޯޓަށް ޒިޔާރަތްކުރަންޖެހޭކަމަށް ފާހަގަކުރެވޭނަމަ، ކޮމިޓީން ކާޑެއްދޫ އެއަރޕޯޓަށް ޒިޔާރަތްކުރުމަށް ނިންމެވިއެވެ.