މިއަދުގެ ބައްދަލުވުމުގައި، އޮފީސް ޢިމާރާތެއް ބިނާކުރުމަށް އާސަންދަ ކޮމްޕެނީ ލިމިޓެޑް އިން ނޯތް ކޯސްޓް ކޮންޓްރެކްޓަރސް ޕްރައިވެޓް ލިމިޓެޑާ އާއެކު ވެފައިވާ އެއްބަސްވުމާ ގުޅޭ މައްސަލައާ ގުޅޭގޮތުން ކޮމިޓީއާ ބައްދަލުކުރެއްވުމަށް އެދި ނޯތް ކޯސްޓް ކޮންޓްރެކްޓަރސް ޕްރައިވެޓް ލިމިޓެޑުން ފޮނުއްވާފައިވާ ސިޓީއާ ގުޅޭގޮތުން މަޝްވަރާކުރެއްވިއެވެ. އެގޮތުން މި މައްސަލައާ ގުޅޭގޮތުން ކޯސްޓް ކޮންޓްރެކްޓަރސް ޕްރައިވެޓް ލިމިޓެޑާއި، އާސަންދަ ކޮމްޕެނީ ލިމިޓެޑް އަދި ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް އާ ބައްދަލުކުރެއްވުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވައި، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ތާޢީދުކުރެއްވި ހުށަހެޅުން ކޮމިޓީގެ އިއްތިފާޤުން ފާސްވިއެވެ.

އެއަށްފަހު، ކޮމިޓީން އެދިފައިވާ ފެނަކަ ކޯޕަރޭޝަން ލިމިޓެޑުގެ ޚާއްޞަ އޮޑިޓަށް ބޭނުންވާ މަޢުލޫމާތާއި ލިޔެކިޔުންތައް ލިބުމުގައި ހުރި ދަތިތަށް ބަޔާންކުރައްވައި އޮޑިޓަރ ޖެނެރަލްގެ އޮފީހުން ފޮނުއްވާފައި ސިޓީއާ ގުޅިގެން ކޮމިޓީން ފެނަކަ ކޯޕަރޭޝަން ލިމިޓެޑުންނާއި، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ހޯދާފައިވާ މަޢުލޫމާތާއި ގުޅޭގޮތުން މަޝްވަރާކުރެއްވިއެވެ. އެގޮތުން، އެ އޮޑިޓަށް ބޭނުންވާ މަޢުލޫމާތާއި ލިޔެކިޔުންތައް އެ ކުންފުނިން ލިބިފައިވާނަމަ އެކަން އަންގަވައިދެއްވައި، އަދި އެ އޮޑިޓްގެ މަސައްކަތް ނިންމަވައި އޮޑިޓް ރިޕޯޓް ފޮނުއްވޭނެ ތާރީޚެއް އަންގަވައިދެއްވުމަށްއެދި އޮޑިޓަރ ޖެނެރަލްގެ އޮފީހަށް ސިޓީ ފޮނުއްވުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވައި، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ތާޢީދުކުރެއްވި ހުށަހެޅުން ކޮމިޓީގެ އިއްތިފާޤުން ފާސްވިއެވެ.

މީގެ އިތުރުން، ދައުލަތުން އެކި ފަރާތްތަކަށް ބަދަލު ދީފައިވާ މައްސަލައާ ގުޅޭގޮތުން މަޝްވަރާކުރެއްވުމަށްފަހު، 17 ނޮވެންބަރު 2018 އިން ފެށިގެން 17 ނޮވެންބަރު 2023 ގެ ނިޔަލަށް ދައުލަތުން އެކި ފަރާތްތަކަށް ބަދަލުގެ ގޮތުގައި ދެއްވާފައިވާ ފައިސާއާއި ހަރުމުދަލާގުޅޭ ޚާއްޞަ އޮޑިޓެއް ހައްދަވައިދެއްވުމަށް އެދި އޮޑިޓަރ ޖެނެރަލްގެ އޮފީހަށް ސިޓީ ފޮނުވުމަށް ނިންމެވިއެވެ.

އެއަށްފަހު، މިނިސްޓްރީ އޮފް ފިނޭންސްއިން ފޮނުއްވާފައިވާ މިއަހަރުގެ ތިންވަނަ ކުއަރޓަރ ނިމުނުއިރު ދައުލަތަށް ނަގާފައިވާ ލޯނާއި، ދައުލަތުން ސޮވްރިންގ ގެރެންޓީ ދޫކޮށްފައިވާ ލޯނު އަދި ދައުލަތުން ދޫކޮށްފައިވާ ލޯނުގެ ތަފްޞީލް ހިއްސާކުރެއްވިއެވެ.

އެހެނިހެން މައްސަލަތަކުގެ ވަގުތުގައި، ވިޔަފާރި ކުރުމަށް އެކި ފަރާތްތަކަށް ކުއްޔަށް ދޫކޮށްފައިވާ ބިންތަކާއި ޢިމާރާތްތަކުގެ ކުލި ހައުސިންގ ޑިވެލޮޕްމަންޓް ކޯޕަރޭޝަން ލިމިޓަށް ދައްކަމުންނުގެންދާ ފަރާތްތަކާއި، އެ ފަރާތްތަކުން ދައްކަންޖެހޭ ފައިސާގެ ތެރެއިން ދައްކަވާފައިނުވާ ފައިސާގެ ތަފްޞީލު ފޮނުއްވައިދެއްވުމަށް އެދި އެ ކޯޕަރޭޝަނަށް ސިޓީ ފޮނުވުމަށް ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ހުށަހަޅުއްވައި، ބާރަށު ދާއިރާގެ މެންބަރު އިބްރާހީމް ޝުޖާޢު ތާޢީދުކުރެއްވި ހުށަހެޅުން ކޮމިޓީގެ އިއްތިފާޤުން ފާސްވިއެވެ.

އެއަށްފަހު، ދިވެހި ސަރުކާރާއި މެލޭޝިއާގެ ކުންފުންޏެއް ކަމަށްވާ ބެސްޓިނެޓްއާ ދެމެދު ސޮއިކޮށްފައިވާކަމަށް މީޑިއާތަކުގައި ދައުރުވަމުންދާ ސެޓްލްމަންޓް އެއްބަސްވުމުގެ މަޢުލޫމާތު ހޯދުމަށް ހުޅުމާލެ ދެކުނު ދާއިރާގެ މެންބަރު ޑރ.އަޙްމަދު ޝަމްހީދު ހުށަހަޅުއްވައި ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ތާޢީދުކުރެއްވިއެވެ. ނަމަވެސް، މި ހުށަހެޅުން ކޮމިޓިގެ ވޯޓުން ފާހެއް ނުވިއެވެ.

މި ހުށަހަޅުމާއި ގުޅިގެން، މި މައްސަލައަކީ މި ކޮމިޓީގެ މެންޑޭޓްގައި ހިމެނޭ މައްސަލައެއް ނޫންކަމަށާއި، މިފަދަ އެއްބަސްވުންތައް ދިރާސާކުރާނީ ސަލާމަތީ ޚިދުމަތްތަކާބެހޭ ކޮމިޓީން ކަމަށް ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ހުށަހަޅުއްވައި، ބާރަށު ދާއިރާގެ މެންބަރު އިބްރާހީމް ޝުޖާޢު ތާޢީދުކުރެއްވި ހުށަހެޅުން ކޮމިޓީގެ އަޣްލަބިއްޔަތުން ފާސްވިއެވެ.