މިއަދުގެ ބައްދަލުވުމުގައި ކަޅުބިލަމަހުގެ ސިނާޢަތު ތަރައްޤީކުރުމުގެ މަޝްރޫޢުގެ ދަށުން މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް މެރިން ރިސޯސަސްއާއި، ހޮރައިޒަން ފިޝަރީޒް ޕްރައިވެޓް ލިމިޓެޑްއާ ދެމެދު 8 ޑިސެންބަރު 2005 ގައި ސޮއިކޮށްފައިވާ ގދ. ހޯނޑެއްދޫގެ ބިމާއި އެ ބިމާ އިންވެގެން ހިއްކާ ސަރަޙައްދު ކުއްޔަށް ދިނުމާބެހޭ އެއްބަސްވުމުގެ ދަށުން ކުއްޔަށް ނަގާފައިވާ ހުވަދުއަތޮޅު ދެކުނުބުރީ ހޯނޑެއްދޫގެ ބިމުގެ ކުލި ރިވައިޒް ކޮށްދިނުމަށް ކަމާގުޅޭ މިނިސްޓްރީތަކަށް އެކިފަހަރު މަތިން ދެންނެވިފައިވީނަމަވެސް، އެ މައްސަލައަށް ހައްލެއް ލިބިފައިނުވާކަމަށް ބަޔާންކޮށް ހުވަދުއަތޮޅު ދެކުނުބުރީ ހޯނޑެއްދޫ ކައުންސިލްގެ އިދާރާއިން ފޮނުއްވާފައިވާ ސިޓީއާ ގުޅޭގޮތުން މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްގެ ބޭފުޅުންނާއި ބައްދަލުކުރައްވައި މަޢުލޫމާތު ސާފުކުރެއްވިއެވެ.

އެގޮތުން، އެ އެއްބަސްވުމުގެ ދަށުން ބިމުގެ ކުލި ނެގުމަށް ހަމަޖެހިފައިވަނީ ކޮންމެ 5 އަހަރަކުން ރިވައިސްކުރަމުންދާގޮތަށްކަމަށާއި، 2023 ވަނަ އަހަރު ކުލި ރިވައިސްކުރަންޖެހުނު ނަމަވެސް، އެކަންނުކުރެވި އޮތީ، ކުއްޔާ ގުޅޭގޮތުން ހޯޑެއްދޫ ކައުންސިލުގެ ކަންބޮޑުވުންތަކަށް އަދިވެސް ޙައްލެއް ލިބިފައިނުވާތީކަމަށް ފާހަގަކުރެއްވިއެވެ. މިހާރު ހެދިފައިވާ އެއްބަސްވުމުގައިވަނީ އަކަފޫޓަކަށް 15 ލާރިކަމަށާއި، ނަމަވެސް މިހާރު ކައުންސިލުން ހުށަހަޅާ އަގަކީ މަހަކަށް 20 ލާރިއާއި 60 ލާރިއާއި ދެމެދުގެ އަގެއް ކަނޑައަޅައި ދިނުމަށްކަމަށެވެ. މިހާތަނަށް ހޮރައިޒަން ފިޝަރީޒް ލިމެޓުން އަގެއް ހުށަހަޅާފައި ނެތްކަމަށާއި، އޮޕަރޭޝަނަށް ނުގެނެވި އޮތް ފެސިލިޓީއަކުން ކައުންސިލުން ހުށަހަޅާ ވަރުގެ ކުއްޔެއްގައި އެތަނުގެ އޮޕަރޭޝަނެއް ފެއްޓުމަކީ ފީސިބަލްކަމެއްކަމަށް ނުވާނެކަމަށް ފާހަގަކުރެއްވިއެވެ. އަލުން ކުލި ރިވައިޒްކުރެވެންދެން، އަކަފޫޓަކަށް 15 ލާރީގެ ރޭޓުން 2023 އަދި 2024 ވަނަ އަހަރަށް ވާ ކުލީގެ ފައިސާ އެއްކޮށް ކައުންސިލަށް ޖަމާކޮށްފައިވާކަމަށް މިނިސްޓްރީން ފާހަގަކުރެއްވިއެވެ. ހޮރައިޒަން ފިޝަރީޒް ލިމެޓުން ހޯޑެއްދޫގައި ކޯލްޑް ސްޓޯރޭޖް ފެސިލިޓީ ޤާއިމުކުރުމަށް ބޮޑެތި އިންވެސްޓްމަންޓުތަކެއް ކޮށްފައިވާކަމަށާއި، އެތަން އޮޕަރޭޝަނަށް ނުގެނެވި ލަސްވާ މައްސަލައިގައި މިހާރުވެސް މަޝްވަރާކުރެވެމުންދާކަމަށާއި، މިހާރު އެ ފެސިލިޓީން ކުލީގެ މަންފާ ފިޔަވައި އިތުރު މަންފާއެއް އެ ކައުންސިލަށް އަދި އެ ސަރަހައްދަށްވެސް ނުކުރާކަމަށް މިނިސްޓްރީން ފާހަގަކުރެއްވިއެވެ. ހޯޑެއްދޫ ކޯލްޑް ސްޓޯރޭޖް ފެސިލިޓީ އޮޕަރޭޝަނަށް ނުގެނެވުނުނަމަވެސް، ދެކުނުގެ މަސްވެރިކަން ސިނާއަތުގެ ތަރައްޤީއަށް މިހާރުވެސް އަމަލީ މަސައްކަތްތަކެއް ފެށިފައިވާކަމަށާއި އެގޮތުން ތިނަދޫގައި ފެށިފައިވާ މަޝްރޫޢު 2025 އަހަރުގެ މެދު ތެރޭގައި އޮޕަރޭޝަނަށް ގެނެވޭނެކަމަށާއި އަދި ގދ. ފިޔޮރީގެ 3000 މެޓްރިކް ކޯލްސްޓޯރޭޖް ފެސިލިޓީއަކާއި އެކު މަސް ޕްރޮސެސްކުރާ ފެސިލިޓީއެއް ޤާއިމުކުރުމުގެ ޕްރޮޖެކްޓް 2026 ނިމެންވާއިރަށް ނިންމާލެވޭނެކަމަށް މިނިސްޓްރީން ފާހަގަކުރެއްވިއެވެ.