Committee Meeting - People's Majlis of Maldives

ޚުލާސާ

ދިވެހިރާއްޖެއިން ޙައްޖަށް މީހުން ގެންދިއުމުގައި ޢަމަލުކުރައްވަމުން ގެންދަވާގޮތާ ގުޅޭގޮތުން ރައްޔިތުންގެ ކަންބޮޑުވުންތަކެއް ހުރިކަން ފާހަގަކުރައްވަމުން ގެންދަވާތީ، އެކަމުގެ އެންމެ ފުރިހަމަ އަދި ޞައްޙަ މަޢުލޫމާތު ރައްޔިތުންނަށް ފޯރުކޮށްދެއްވުމުގެގޮތުން މިނިސްޓްރީ އޮފް އިސްލާމިކް އެފެއާޒް އަދި މޯލްޑިވްސް ޙައްޖު ކޯޕަރޭޝަންގެ ބޭފުޅުންނާ ބައްދަލުކުރައްވައި މަޢުލޫމާތު ސާފުކޮށް މަޝްވަރާކުރެއްވިއެވެ.

އެގޮތުން، ދިވެހިރާއްޖެއަށް ލިބޭ ޙައްޖު ކޯޓާގެ ތެރެއިން ޙައްޖު ކޯޕަރޭޝަނަށް ލިބޭ ކޯޓާއާމެދު އެ ކޯޕަރޭޝަނުން ޢަމަލުކުރަމުން ގެންދާ ގޮތާއި އަދި ޙައްޖުގެ ޚިދުމަތަށް ނަގާ އަގު ދަށްކުރުމަށްޓަކައި އެ ކޯޕަރޭޝަނުން ކުރައްވަމުންގެންދަވާ މަސައްކަތްތަކާއި އަދި އެ ކޯޕަރޭޝަނަށް ލިބޭ އާމްދަނީން ޚަރަދުތައް މެނޭޖުކުރެވޭ ފައިދާވާ ކުންފުންޏަކަށް އެ ކޯޕަރޭޝަން ހެއްދެވުމަށްޓަކައި ކުރައްވަމުންގެންދަވާ މަސައްކަތްތަކާ ގުޅޭގޮތުން މަޝްވަރާކުރައްވާފައިވެއެވެ. އަދި މީގެ އިތުރުން ޙައްޖުގެ ޚިދުމަތްތައް ފޯރުކޮށްދިނުމުގައި އެ ކޯޕަރޭޝަނަށް ދިމާވާ މައިގަނޑު ގޮންޖެހުންތަކާއި އަދި އެ ކޯޕަރޭޝަންގެ މަސައްކަތްތައް އިތުރަށް ތަރައްޤީކޮށް ހަރުދަނާކުރެއްވުމަށްޓަކައި ކުރައްވަމުން ގެންދަވާ މަސައްކަތްތަކާއި ގުޅޭގޮތުންވެސް މަޝްވަރާކުރައްވާފައިވެއެވެ.