މިބައްދަލުވުމުގައި ފުރަތަމަ ކަމަކަށް ކުރިއަށް ގެންދެވީ، މޯލްޑިވްސް އިންލަންޑް ރެވެނިއު އޮތޯރިޓީގެ 2022 ވަނަ އަހަރު އަދި 2023 ވަނަ އަހަރުގެ އަހަރީ ރިޕޯޓުތަކާއި ޚާއްޞަގޮތެއްގައި އަހަރީ ރިޕޯޓުގައި ހިމެނޭ މަޢުލޫމާތުތަކުގެ ތެރެއިން އެކި ފަރާތްތަކުން އަނބުރާ ދައުލަތަށް ލިބެންޖެހޭކަމަށް ހިސާބުތަކުން ދައްކާ ފައިސާގެ ޖުމްލަ ޢަދަދު ވަރަށް ބޮޑަށް މައްޗަށް ގޮސްފައިވާތީ، އެ ފައިސާ ހޯދުމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ކުރަމުންދާ މަސައްކަތްތަކާއި، އެ ފައިސާ ނުލިބިވާ ސަބަބުތަކާއި އެ ފައިސާ ހޯދުމަށް މީރާއަށް ކުރިމަތިވާ ދަތިތައް ދެނެގަތުމަށް މީރާގެ ކަމާގުޅުންހުރި ބޭފުޅުންނާ ބައްދަލުކުރައްވައި މަޢުލޫމާތު ސާފުކުރެއްވުމެވެ. ކޮމިޝަނަރ ޖެނެރަލް އޮފް ޓެކްސޭޝަން ފާހަގަކުރެއްވިގޮތުގައި އެ މަޤާމާ ހަވާލުވުމަށްފަހު އެންމެ ފުރަތަމައަށް އިސްކަންދެއްވި ކަމަކީ ދައުލަތަށް ނުލިބިހުރި ފައިސާ ހޯދުމަށް ކުރަންޖެހޭ މަސައްކަތްތައް ހަރުދަނާކުރުމުގެ މަސައްކަތެވެ. އެގޮތުން، އެންމެ ބޮޑު ޢަދަދެއް ދައްކަންޖެހޭ 80 ފަރާތަކާ ބައްދަލުކުރުމަށްފަހު، އެ ފަރާތްތަކަށް އެ ފައިސާ ދެއްކޭނީ ކޮން ގޮތަކަށްތޯ މަޝްވަރާކުރުމަށްފަހު، 57 ފަރާތަކަށް އިންސްޓޯލްމަންޓް ޕްލޭނެއްގެ ދަށުން ފައިސާ ދެއްކުމުގެ ފުރުޞަތު ދެވިފައިވާކަމަށް ފާހަގަކުރެއްވިއެވެ. ދައުލަތަށް ނުލިބިހުރި ފައިސާގެ ޖުމްލަ ޢަދަދަކީ 17 ބިލިއަން ރުފިޔާކަމަށާއި އޭގެ ތެރޭގައި ހިމެނެނީ ޓެކްސްގެ ގޮތުގައި ނުލިބި ހުރި ފައިސާގެ 8.2 ބިލިއަން ރުފިޔާއާއި ނޮން-ޓެކްސްގެ 8.7 ބިލިއަން ރުފިޔާއެވެ. ފާއިތުވި 5 މަސް ދުވަސްތެރޭގައި 2 ބިލިއަން ރުފިޔާ ރިކަވަރ ކުރެވިފައިވާކަމަށާއި، ޑިއުސްތައް އިތުރުވެގެން ގޮސްފައިވަނީ ކޮވިޑްގައި ދެވިފައިވާ ލުއިތަކާއެކުކަމަށާއި، ދައުލަތައް ނުލިބިވާ ފައިސާގެ ޢަދަދު އިތުރުވަމުންދާތީ، ފައިސާ ދެއްކޭނެ ގޮތްތައް ބަލައި އެންފޯސްމެންޓް ފޮލިސީތަކަށް ބޮޑެތި ބަދަލުތަކެއް ގެނެވިފައިވާކަމަށާއި، ކޮންޕްލައިންސް ލެވެލް އިތުރުކުރުމަށް މަސައްކަތްތަކެއް ކުރަންޖެހޭކަމަށާއި، މިހާރު ޤާނޫނު އޮތްގޮތުން މީރާގެ މަސައްކަތްތަކައް ދަތިތަކެއް ހުރިކަމަށްވާތީ ޓެކްސްނެގުމާބެހޭ އިދާރީ ޤާނޫނަށް އިޞްލާޙު ގެންނަންޖެހޭކަމަށް ފާހަގަކުރެއްވިއެވެ.

އެއަށްފަހު، ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގެ 4 ވަނަ މާއްދާގެ (ބ) ގެ (2) ވަނަ ނަންބަރުގައިވާ ގޮތުގެމަތިން، މޯލްޑިވްސް އިންލަންޑް ރެވެނިއު އޮތޯރިޓީގެ ޑިރެކްޓަރުންގެ ބޯޑަށް މެންބަރަކު ޢައްޔަންކުރުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލަ ކޮމިޓީން ނިންމާނެ ސުންގަޑިއާއި ނަންފުޅު ފޮނުއްވާފައިވާ ގުޅޭގޮތުން ޢާންމުންގެ ޝަކުވާ ހުށަހެޅުމަށް ފުރުޞަތު ހުޅުވާލާނެ މުއްދަތު ކަނޑައެޅުމާއި އެ ފަރާތްތަކާ އިންޓަރވިއު ކުރިއަށް ގެންދާނެ ދުވަހެއް ކަނޑައެޅުމަށް ހުޅުވާލި ފުރުޞަތުގައި 12 ޑިސެންބަރު 2024 ގެ ނިޔަލަށް މުއްދަތު ކަނޑައެޅުމަށް ހިތަދޫ ދެކުނު ދާއިރާ މެންބަރު އިބްރާހީމް ނާޒިލް ހުށަހަޅައި ތިނަދޫ އުތުރު ދާއިރާ މެންބަރު ސަޢުދުﷲ ޙިލްމީ ތާއީދުކުރައްވައި ހުށަހެޅުއްވިއެވެ. މި ހުށަހެޅުމަށް އެއްވެސް މެންބަރެއް އިޢުތިރާޒުނުކުރާތީ އެ ހުށަހެޅުން ފާސްވީކަމުގައި ނިންމިއެވެ.