މިއަދުގެ ބައްދަލުވުމުގައި، އައިލެންޑް އޭވިއޭޝަން ސަރވިސަސް ލިމިޓެޑް، ރީޖަނަލް އެއަރޕޯޓްސް ކޮމްޕެނީ ލިމިޓެޑް އަދި މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ ޙާލަތާ ގުޅޭގޮތުން ކޮމިޓީން އެކުލަވާލާފައިވާ ރިވިއު ރިޕޯޓުގައިވާ ތިރީގައިވާ ނިންމުންތަކާއެކު ރިޕޯޓް ފާސްކުރެއްވުމަށް ފޭދޫ ދެކުނު ދާއިރާގެ މެންބަރު އިބްރާހީމްދީދީ ހުށަހަޅުއްވައި ގައްދޫ ދާއިރާގެ މެންބަރު މުޙައްމަދު ޢަލީ ތާޢީދުކުރެއްވިއެވެ. ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން މި ހުށަހެޅުއްވުން ވަނީ ފާސްވެފައެވެ.

1.1.  ދެމެހެއްޓެނިވި ގޮތެއްގައި ދިވެހި ރައްޔިތުންނަށް ހެޔޮ އަގުގައި ޓިކެޓް ފޯރުކޮށްދިނުމަށް އައިލެންޑް އޭވިއޭޝަން ސަރވިސަސް ލިމިޓެޑަށް ދިމާވެފައިވާ އެންމެ ބޮޑު ގޮންޖެހުމަކީ މަތިންދާބޯޓަށް އަޅާ ޖެޓް ފިއުލް ދިވެހިރާއްޖޭގެ އެއަރޕޯޓުތަކުގައި އަގުބޮޑުވުންކަމަށާއި އެހެންކަމުން ސަރަޙައްދީ އެހެން އެއަރޕޯޓުތަކުގެ އަގުތަކަށް ރިޢާޔަތްކޮށް، ޖެޓް ފިއުލްގެ އަގު ކުޑަކުރެވޭނެ ގޮތަކާ ގުޅޭގޮތުން އެ ކުންފުންޏާ މަޝްވަރާކޮށް ގޮތެއް ނިންމުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑާއި މިނިސްޓްރީ އޮފް ފިނޭންސްއަށް ދެންނެވުމަށް؛

1.2.  2001 އިން ފެށިގެން ޖީ.އެމް.އާރު އާ ވެލާނާ އިންޓަރނޭޝަނަލް އެއަރޕޯޓް ޙަވާލުކުރުމާ ހަމައަށް އެއަރޕޯޓުގެ ގްރައުންޑް ހޭންޑްލިންގގެ ވިޔަފާރިއާއި ކާގޯ ވިޔަފާރިއަކީ އައިލެންޑް އޭވިއޭޝަންގެ ޙިއްޞާ އޮވެގެން ކުރަމުން އައި ދެ ވިޔަފާރިކަމަށާއި، އެ ވިޔަފާރިތައް އިޔާދަކޮށްދެވިފައި ނެތުމާއެކު، 2012 އިން ފެށިގެން 2023 އާ ހަމައަށް ގްރައުންޑް ހޭންޑްލިން ވިޔަފާރިން 1.6 (އެކެއް ޕޮއިންޓް ހައެއް) ބިލިއަން ރުފިޔާގެ އާމްދަނީއެއް ކުންފުންޏަށް ގެއްލިފައިވާކަމަށާއި އަދި ކާގޯ ވިޔަފާރިން 1.9 (އެކެއް ޕޮއިންޓް ނުވައެއް) ބިލިއަން ރުފިޔާގެ އާމްދަނީއެއް ހަމަ އެ މުއްދަތުގައި ކުންފުންޏަށް ގެއްލިފައިވާކަމަށް އައިލެންޑް އޭވިއޭޝަން ސަރވިސަސްއިން މަޢުލޫމާތު ދީފައިވާތީ، މި ވިޔަފާރިތަކުގެ ޙިއްޞާ އެ ކުންފުންޏަށް ދެވޭނެ ގޮތްތަކެއް އޮތްތޯ ބަލައި، ދިރާސާކުރުމަށް މިނިސްޓްރީ އޮފް ފިނޭންސް އަދި މޯލްޑިވްސް އެއަރޕޯޓްސް ކޮމްޕެނީ ލިމިޓެޑަށް ދެންނެވުމަށް؛

1.3.  2023 ވަނަ އަހަރުވެސް އައިލެންޑް އޭވިއޭޝަން ސަރވިސަސް ލިމިޓެޑަށް 78.93 (ހަތްދިހަ އަށެއް ޕޮއިންޓް ނުވައެއް ތިނެއް) މިލިއަން ރުފިޔާގެ ޑިސްކައުންޓް ދީފައިވާކަމަށާއި، ޤައުމީ އެއަރލައިންއަށް ވުމުން އެ ކުންފުންޏަށް ޚާއްޞަ ޢިނާޔަތްތަކެއް ދެމުންގެންދާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން ފާހަގަކޮށްފައިވާތީ، މިފަދަ ޑިސްކައުންޓްތައް ޑޮމެސްޓިކް ދަތުރުތަކުގެ ޓިކެޓްތަކަށް ލެވޭނެ ނިޒާމެއް ޤާއިމުކުރަމަށާއި، އައިލެންޑް އޭވިއޭޝަން ސަރވިސަސް ލިމިޓެޑުގެ އޮޕަރޭޝަނަލް ޚަރަދުކުޑަކޮށް، އަދި މީގެ އިތުރުންވެސް ޑޮމެސްޓިކް ދަތުރުތަކުގެ ޓިކެޓްތަކަށް ހެޔޮބަދަލެއް ގެނައުމަށް ކުރެވިދާނެ ކަންކަން މޯލްޑިވްސް އެއަރޕޯޓްސް ކޮމްޕެނީ ލިމިޓެޑާ މަޝްވަރާކޮށް، ޑޮމެސްޓިކް ދަތުރުތަކުގެ ޓިކެޓްތަކުގެ އަގު ހެޔޮކުރެވޭނެ ގޮތްތަކެއް ހޯދުމަށް އައިލެންޑް އޭވިއޭޝަން ސަރވިސަސްއަށް ދެންނެވުމަށް؛

1.4.  ރީޖަނަލް އެއަރޕޯޓްތަކުގައި ސީޕްލޭން ޓަރމިނަލްތައް ޒަމާނީ ފެންވަރަށް ތަރައްޤީކޮށް، ސީޕްލޭން ޚިދުމަތުގެ ފެންވަރު ރަނގަޅުކޮށް، ސަރުކާރުގެ ކުންފުނިތަކުން ސީޕްލޭންގެ ވިޔަފާރި ފުޅާކުރުމަށް ކުރަންޖެހޭ އެންމެހާ މަސައްކަތްތަކެއް ކުރުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑާއި އައިލެންޑް އޭވިއޭޝަން ސަރވިސަސް ލިމިޓެޑަށް ދަންނަވާ، އަދި ދިވެހިރާއްޖޭގައި ސީޕްލޭން ވިޔަފާރީ ފުޅާކޮށް އަދި މާކެޓް ކެޕްޗަރކުރުމަށް ދެ ކުންފުނި ގުޅިގެން ކުރިޔަށް ގެންދެވޭނެ ކަންކަން ޕްލޭންކޮށް، ހާސިލުކުރުމަށް ކަނޑައަޅާފައިވާ އަމާޒުތަށް ހިމެނޭ މެދުރާސްތާގެ ޕްލޭނެއް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީއަށް ޙިއްޞާކުރުމަށް އެ ދެ ކުންފުންޏަށް ދެންނެވުމަށް؛

1.5.  އެއަރޕޯޓްތައް ތަރައްޤީކޮށް ރީޖަނަލް އެއަރޕޯޓްސް ކޮމްޕެނީ ލިމިޓެޑާ ޙަވާލުކުރެވޭއިރު، ޑިޒައިން މައްސަލަތަކާއި، ސިވިލް އޭވިއޭޝަންގެ މިންގަނޑުތަކަށް ނުފެތުން ފަދަ ބޮޑެތި މައްސަލަތައް ގިނަ އެއަރޕޯރޓްތަކުގައި ފާހަގަކުރެވޭތީ، އެކަން ޙައްލުކުރުމަށް ކުންފުނިން އިތުރު ޚަރަދުތަކެއް ކުރަންޖެހޭތީ، އެއަރޕޯޓުތަކުގެ ޑިޒައިން މަރުޙަލާގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑާ މަޝްވަރާކޮށްގެން މަސައްކަތްތައް ކުރިއަށްގެންދެވުމަށް މިނިސްޓްރީ އޮފް ކޮންސްޓަރަކްޝަން އެންޑް އިންފްރާސްޓްރަކްޗަރއަށް ދެންނެވުމަށް؛

1.6.  މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އަދި ރީޖަނަލް އެއަރޕޯޓްސް ކޮމްޕެނީ ލިމިޓެޑް އެއްކޮށްލުމުން ސަރަޙައްދީ އެއަރޕޯޓްތަކުގެ އާމްދަނީ އިތުރުކުރުމަށް ބޭނުންވާ މަޝްރޫޢުތަކަށް ފައިނޭސްކުރުމަށް ފަސޭހަވެ، ޖުމުލަ ގޮތެއްގައި ގޮތެއްގައި އެއަރޕޯޓްތަކުގެ އާމްދަނީ އިތުރުވެ، ދައުލަތުގެ ބަޖެޓުން ރީޖަނަލް އެއަރޕޯޓްސް ކޮމްޕެނީ ލިމިޓެޑަށް ކުރަންޖެހޭ އޮޕަރޭޝަނަލް ޚަރަދުތައް ކުޑަ ކުރެވޭނެކަމުން، އެ ދެ ކުންފުނި އެއްކޮށްލުމުގެ މަސައްކަތް އަވަސްކޮށް، އެ މަސައްކަތްތައް ނިންމާނެ ތާވަލެއް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީއަށް ޙިއްޞާކުރުމަށް އެ ދެ ކުންފުންޏަށާއި މިނިސްޓްރީ އޮފް ފިނޭންސަށް ދެންނެވުމަށް؛

1.7.   މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އަދި ރީޖަނަލް އެއަރޕޯޓްސް ކޮމްޕެނީ ލިމިޓެޑް އެއްކޮށްލާއިރު، ކްރޮސް-ސަބްސިޑައިޒްކުރުމުގެ ފުރުޞަތު ފަހިވާ ގޮތަށް، ދެ ކުންފުނީގެ މި ވަގުތު ހުރި އިކުއިޕްމަންޓްސް، ޓެކްނޮލޮޖީ، އަދި މުވައްޒަފުން ފަދަ ވަސީލަތްތައް ޑުޕްލިކޭޓްނުވާނޭ ފަދަ ގޮތަކަށް އެއްކޮށްލައި، ކުންފުނިތަކުގެ އެފިޝިއަންސީ އޮޕްޓިމައިޒްކުރުމާއެކު އެކި އެކި މަރުޙަލާތައް ސްޓްރީމްލައިންކޮށް ސަރަޙައްދީ އެއަރޕޯޓްތަކުގެ ޚިދުމަތްތައް ރަނގަޅުކުރާނޭ ގޮތުގެ ޕްލޭނެއް އެކުލަވާލައި، ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީއަށް ޙިއްޞާކުރުމަށް އެ ދެ ކުންފުންޏަށް ދެންނެވުމަށް؛

1.8.  މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އަދި ރީޖަނަލް އެއަރޕޯޓްސް ކޮމްޕެނީ ލިމިޓެޑް އެއްކޮށްލާއިރު، ޕްރޮކިއުމަންޓް ޚަރަދާއި، އެއަރޕޯޓް މެއިންޓެނަންސް އަދި އިންޖިނިއަރުން ފަދަ ފަންނީ މަޤާމުތަކުގައި މަސައްކަތްކުރައްވާ ފަރާތްތަކުގެ ބޭނުން އެންމެ އެދެވޭ ގޮތެއްގައި ބޭނުންކޮށް، ޖުމުލަ ޚަރަދު ކުޑަކޮށް، އިކޮނޮމީސް އޮފް ސްކޭލް ހާސިލުކޮށް، ސަރަޙައްދީ އެއަރޕޯޓްތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށް އެކުލަވާލެވިފައިވާ މަގު ޗާޓް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީއަށް ޙިއްޞާކުރުމަށް އެ ދެ ކުންފުންޏަށް ދެންނެވުމަށް؛