މިއަދުގެ ބައްދަލުވުމުގައި ފުރަތަމަ ކަމަކަށް ކުރިއަށް ގެންދެވީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 129 ވަނަ މާއްދާގެ (ހ) ގެ ދަށުން ވަޒީރުންގެ މަޖިލީހުގެ މެންބަރެއްގެ ގޮތުގައި، މިނިސްޓްރަ އޮފް ޓޫރިޒަމް އެންޑް އެންވަޔަރަންމަންޓްގެ މަޤާމަށް ރައީސުލްޖުމްހޫރިއްޔާ ޢައްޔަންކުރައްވާފައިވާ ގ.ނޫމަރާހިޔާ، އަލްފާޟިލް ޠާރިޤު އިބްރާހީމްގެ ނަންފުޅު، އެ މާއްދާގެ (ރ) ގައިވާ ގޮތުގެމަތީން ރައްޔިތުންގެ މަޖިލީހުގެ ރުހުން ހޯއްދެވުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލަ ދިރާސާކުރެއްވުމުގެ މަސައްކަތެވެ. އެގޮތުން، މެންބަރުންނަށް ފުރުޞަތު ހުޅުވާލުމުން، ދެންނެވުނު މައްސަލައިގައި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން، އެންޓި-ކޮރަޕްޝަން ކޮމިޝަން އަދި މޯލްޑިވްސް ކަރެކްޝަނަލް ސަރވިސްއިން ދެންނެވުނު ފަރާތުގެ ކުށުގެ ރެކޯޑު ސާފުކޮށް އަދި ރައީސުލްޖުމްހޫރިއްޔާގެ އޮފީހާއި އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ޙިއްޞާކުރައްވާފައިވާ މަޢުލޫމާތުން، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 130 ވަނަ މާއްދާގައި ވަޒީރުންގެ މަޖިލީހުގެ މެންބަރުންގައި ފުރިހަމަވާންވާނެކަން ބަޔާންކޮށްފައިވާ ޝަރުޠުތައް ރައީސުލްޖުމްހޫރިއްޔާ ޢައްޔަންކުރައްވާފައިވާ ފަރާތުގެ ކިބައިގައި ފުރިހަމަވާތީއާއި އަދި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 136 ވަނަ މާއްދާގެ (ހ) ގައި ވަޒީރުންގެ މަޖިލީހުގެ މެންބަރަކު ކޮށްގެންނުވާނޭކަމަށް ބަޔާންކޮށްފައިވާފަދަ އެއްވެސް ކަމެއް އެފަރާތުން ކުރައްވަމުން ނުގެންދަވާކަން ސާފުވާތީ، ރައީސުލްޖުމްހޫރިއްޔާ ޢައްޔަންކުރައްވާފައިވާ ފަރާތަށް ރައްޔިތުންގެ މަޖިލީހުން ރުހުންދިނުމަށް ކޮމިޓީއަށް ފެންނަކަމަށް، ހެންވޭރު ހުޅަނގު ދާއިރާގެ މެންބަރު ޢަލީ އިބްރާހީމް ހުށަހަޅުއްވައި ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ތާއީދުކުރެއްވިއެވެ. މި ހުށަހެޅުމާމެދު ކޮމިޓީގެ މެންބަރުންނަށް ފެންނަ ގޮތަކަށް ވޯޓުދިނުމަށް ހުޅުވާލުމުން، ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.

ދެވަނަ ކަމަކަށް ކުރިއަށް ގެންދެވީ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުން، 17 ނޮވެންބަރު 2023 ގައި އުފައްދަވާފައިވާ ވުޒާރާތަކުގެ ތެރެއިން މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓާއި، މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ، އަދި، މިނިސްޓްރީ އޮފް ހެލްތްގެ މަސައްކަތުގެ ދާއިރާއަށް ގެންނެވި ބަދަލުތައް ރައްޔިތުންގެ މަޖިލީހުން ފާސްކުރެއްވުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލަ ދިރާސާކުރުމުގެ މަސައްކަތެވެ. އެގޮތުން، މެންބަރުންނަށް ފުރުޞަތު ހުޅުވާލުމުން، 3 ވުޒާރާއެއްގެ މަސައްކަތުގެ ދާއިރާއަށް ގެންނެވި ބަދަލުތައް ރައީސުލްޖުމްހޫރިއްޔާ ފޮނުއްވާފައިވާ ގޮތަށް ރައްޔިތުންގެ މަޖިލީހުން ފާސްކުރުމަށް ކޮމިޓީއަށް ފެންނަކަމަށް ފުވައްމުލަކު މެދު ދާއިރާގެ މެންބަރު ޢަލީ ފަޒާދު ހުށަހަޅުއްވައި މައްޗަންގޮޅި ދެކުނު ދާއިރާގެ މެންބަރު މުޞްޠަފާ ޙުސައިން ތާއީދުކުރެއްވިއެވެ. މި ހުށަހެޅުމާމެދު ކޮމިޓީގެ މެންބަރުންނަށް ފެންނަ ގޮތަކަށް ވޯޓުދިނުމަށް ހުޅުވާލުމުން، ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އަޣްލަބިއްޔަތުން މި ހުށަހެޅުން ފާސްވިއެވެ.

ދެން ކުރިއަށް ގެންދެވީ، ކޮމިޓީއަށް ލިބިފައިވާ އެހެނިހެން މައްސަލަތަކުގެ ތެރެއިން ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ފޮނުއްވާފައިވާ 3 މައްސަލައިގެ މަސައްކަތެވެ. އެގޮތުން، ފަތުރުވެރިން ހަރަކާތްތެރިވާ ސަރަޙައްދުތަކުގައި ނުރައްކާތެރި ހާދިސާތައް ދިމާވަމުންދާކަމަށާއި، ޚާއްޞަކޮށް ޙިމާޔަތް ކުރެވިފައިވާ "މެރިން ޕާކް" ތަކުގައި އެފަދަ ހާދިސާތައް ދިމާވަމުންދާކަން ބަޔާންކުރައްވައި، އެ ސަރަޙައްދުތައް ޙިމާޔަތް ކުރުމުގައި ހުރި ގޮންޖެހުންތައް ދެނެގަނެ އެކަމަށް ހައްލެއް ހޯއްދެވޭނެ ގޮތްތަކަކީ ކޮބައިކަން ބަޔާންކޮށް ހުށަހަޅުއްވާފައިވާ މައްސަލައާއި "ސައުތުއަރި މެރިން ޕްރޮޓެކްޓިވް އޭރިޔާ" (SAMPA) ސަރަޙައްދު ބެލެހެއްޓެވުމުގެ ޒިންމާ ހަވާލުކުރައްވާފައިވާ ފަރާތްކަމުގައިވާ އެންވަޔަރަންމަންޓަލް ޕްރޮޓެކްޝަން އޮތޯރިޓީން އެ ސަރަޙައްދު ބެލެހެއްޓެވުމަށް އުސޫލުތަކެއް ކަނޑައަޅާފައިވީ ނަމަވެސް އެކަން އެންމެ ފުރިހަމައަށް ހިގަމުން ނުދާތީވެ، އެ ސަރަޙައްދު ބެލެހެއްޓެވުމުގެ ކަންކަން އަވަސްކޮށްދެއްވުމަށް އެދި ހުށަހަޅުއްވާފައި މައްސަލައާ ގުޅިގެން މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް އަދި އެންވަޔަރަންމަންޓަލް ޕްރޮޓެކްޝަން އެޖެންސީ (އީ.ޕީ.އޭ) އިން މަޢުލޫމާތު ސާފުކުރެއްވުމަށްފަހު އެ އިދާރާތަކުގެ ބޭފުޅުންނާ ބައްދަލުކުރެއްވުމަށް ފުވައްމުލަކު މެދު ދާއިރާގެ މެންބަރު ޢަލީ ފަޒާދު ހުށަހަޅުއްވައި ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ތާއީދުކުރެއްވިއެވެ. މި ހުށަހެޅުމާމެދު ކޮމިޓީގެ މެންބަރުންނަށް ފެންނަ ގޮތަކަށް ވޯޓުދިނުމަށް ހުޅުވާލުމުން، ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.

އެއަށްފަހު ކުރިއަށް ގެންދެވީ، ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ފޮނުއްވާފައިވާ، ރާއްޖެއިން ބޭރުން އެމް.ބީ.ބީ.އެސް ހެދުމަށްޓަކައި ދޫކުރެވޭ ލޯނުގައި އިންޓާންޝިފް ހެދުމަށްޓަކައި ހޭދަވާ ފައިސާ ލޯނުގެ ތެރޭގައި ހިމެނިފައި ނުވުމާއި ރާއްޖޭގައި އިންޓާންޝިފް ހެދުމަށް އިތުރަށް ފައިސާ ހޭދަކުރަން ޖެހުމާއި އަދި އެފުރުޞަތު އައި.ޖީ.އެމް.އެޗުން ލިބުން ދަތިވެފައިވާތީ، މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް އަދި މިނިސްޓްރީ އޮފް ހެލްތްގެ އިސް ފަރާތްތަކާ ބައްދަލުކުރައްވައި އެކަމުގައި ދިމާވާ ގޮންޖެހުންތަކަކީ ކޮބައިކަން ބަލައި، އެކަންކަމަށް ހައްލެއް ހޯއްދަވައިދެއްވުމަށް އެދި ފޮނުއްވާފައިވާ މައްސަލަ އެވެ. އެގޮތުން ހުޅުވާލި ފުރުޞަތުގައި، މިމައްސަލައާއި ގުޅިގެން މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް އަދި މިނިސްޓްރީ އޮފް ހެލްތުގެ ބޭފުޅުންނާއި ބައްދަލުކުރައްވައި މަޢުލޫމާތު ސާފުކުރެއްވުމަށް ހުޅުމާލެ ދެކުނު ދާއިރާގެ މެންބަރު ޑޮކްޓަރ އަޙްމަދު ޝަމްހީދު ހުށަހަޅުއްވައި ގަލޮޅު ދެކުނު ދާއިރާގެ މެންބަރު މީކާއީލު އަޙްމަދު ނަސީމް ތާއިދުކުރެއްވިއެވެ. މި ހުށަހެޅުމާމެދު ކޮމިޓީގެ މެންބަރުންނަށް ފެންނަ ގޮތަކަށް ވޯޓުދިނުމަށް ހުޅުވާލުމުން، ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.

މި ބައްދަލުވުމުގައި ހުށަހެޅުނު ހުށަހެޅުންތަކަށް މެންބަރުން ވޯޓު ދިންގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.