މިއަދުގެ ބައްދަލުވުމުގައި އެންމެ ފުރަތަމަ މަޝްވަރާކުރައްވާފައިވަނީ ހދ. ކުޅުދުއްފުށި މަސްޖިދުލް ޙަޟާރަތުގެ ބެލެނިވެރި ފަރާތެއްނެތި ވީރާނާ ވަމުންދާތީ، އެ މިސްކިތުގެ ޙާލަތު ރަނގަޅުކޮށްދިނުމަށް އެދި އަމިއްލަ ފަރާތަކުން ރައްޔިތުންގެ މަޖިލީހަށް ކޮޕީކޮށް، މިނިސްޓްރީ އޮފް އިސްލާމިކް އެފެއާޒްއަށް ފޮނުއްވާފައިވާ ސިޓީއަކާ ގުޅޭގޮތުންނެވެ. މިއީ އިސްލާމިކް މިނިސްޓްރީގެ މެންޑޭޓުގައި ހިމެނޭ ކަމެއް ނޫންކަމަށާއި މި މައްސަލަ ހުށަހަޅަންވާނީ ކުޅުއްދުއްފުށީ ސިޓީ ކައުންސިލަށް ކަމަށް ކޮމިޓީން ފާހަގަކުރައްވާފައިވެއެވެ. މިއީ ކޮޕީ ސިޓީއަކާ ގުޅޭ މައްސަލައެއް ކަމުގައިވާތީ މި މައްސަލަ ފައިލްކުރުމަށް ކޮމިޓީން ނިންމަވާފައިވެއެވެ.

ދެވަނަ އަށް ކޮމިޓީން މަޝްވަރާކުރައްވާފައިވަނީ ޅ. ނައިފަރުގައި ހިނަވާ ގެއެއް އެޅުމާ ގުޅޭގޮތުން އަމިއްލަ ފަރާތަކުން ފޮނުއްވާފައިވާ ކޮޕީ ސިޓީއަކާ ގުޅޭ ގޮތުންނެވެ. މި މައްސަލަ ވެސް ފައިލްކުރުމަށް ކޮމިޓީން ނިންމަވާފައިވެއެވެ.

ދެން ކޮމިޓީން މަޝްވަރާކުރައްވާފައިވަނީ މޯލްޑިވްސް ބެޑްމިންޓަން އެސޯސިއޭޝަނާ ގުޅޭގޮތުން ރިވައިވަލް ސްޕޯޓްސް ކްލަބުން ފޮނުއްވާފައިވާ މައްސަލައާ ގުޅޭގޮތުންނެވެ. އެ ގޮތުން މާފަންނު ހުޅަނގު ދާއިރާގެ މެންބަރު މުޙައްމަދު މުޞްތަފާ އިބްރާހިމް ހުށަހަޅުއްވައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ތާޢީދުކުރައްވާފައިވަނީ، އެމައްސަލާގައި ކަން ހިނގާފައިވާ ގޮތް ސާފުކުރެއްވުމަށް މޯލްޑިވްސް ބެޑްމިންޓަން އެސޯސިއޭޝަން އަދި މިނިސްޓްރީ އޮފް ސްޕޯޓްސް، ފިޓްނަސް އަދި ރެކްރިއޭޝަނަށް ސިޓީ ފޮނުއްވުމަށެވެ. އެއްވެސް މެންބަރަކު އިޢުތިރާޒު ނުކުރައްވާތީ ކޮމިޓީން މިގޮތަށް މައްސަލަ ކުރިއަށް ގެންދަން ނިންމަވާފައިވެއެވެ.

މިނިސްޓްރީ އޮފް ހެލްތުން ކޮމިޝަނަރ ޖެނެރަލް އޮފް ކަސްޓަމްސްއަށް ފޮނުއްވާފައިވާ ސިޓީގައި "ސެޒޭޝަން" ފަރުވާއަށް ބޭނުންކުރާ ޕެޗު ފަދަ ތަކެތި މަސްތުވާތަކެތީގެ މާނައިން އިސްތިސްނާކުރައްވާފައި ނުވާތީ އެކަން ހިނގާފައިވާގޮތް ބައްލަވައިދެއްވުން އެދި ފޮނުއްވާފައިވާ ސިޓީއާއި އާސަންދައާއި އެންސްޕާ މެދުވެރިކޮށް ޚިދުމަތް ހޯދުމުގައި ރައްޔިތުންނަށް ދިމާވާ ދަތިތަކަށް ހައްލެއް ހޯއްދަވައިދެއްވުމަށް އެދި ފޮނުއްވާފައިވާ ސިޓީއާ ގުޅިން އެ މައްސަލަތައް ހުށަހަޅުއްވާފައިވާ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ވިދާޅުވެފައިވަނީ އެކަންތައް މިހާރު ހައްލުވެފައަވާތީ މައްސަލަ އިތުރަށް ކުރިއަށް ގެންދެއްވުމަށް ބޭނުންފުޅުނުވާކަމަށެވެ. އެހެންކަމުން، އެ މައްސަލަތައް ފައިލް ކުރުމަށް ކޮމިޓީން ނިންމެވިއެވެ.

ސިއްޙީ ޚިދުމަތްތައް ލިބިގަތުމުގައި ޢާންމުންނަށް ދިމާވާ ދަތިތައް ހައްލުކޮށްދެއްވުމަށް ރައްޔިތުންގެ މަޖިލީހުން ކޮށްދެވޭނީ ކޮންކަންތައްތަކެއްކަން ބައްލަވައިދެއްވުން އެދި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ފޮނުއްވާފައިވާ ސިޓީއާ ގުޅިގެން މަޢުލޫމާތު ސާފުކުރެއްވުމަށް އާސަންދަ ކޮމްޕެނީ ލިމިޓެޑަށާއި މާލޭ ގްރޫޕް އޮފް ހޮސްޕިޓަލަށް ސިޓީ ފޮނުވުމަށްފަހު އެ ފަރާތްތަކާ ބައްދަލުކުރުމަށް ކޮމިޓީން ނިންމަވާފައިވެއެވެ.

ވިހެއުމާ ގުޅިގެން ސިވިލް ސަރވިސްގެ ގަވާއިދުގެ ދަށުން މުވައްޒަފުންނަށް ލިބިދޭ 6 މަސްދުވަހުގެ ޗުއްޓީގެ މުއްދަތުގެ ތެރޭގައި ދަރިފުޅު މަރުވެއްޖެނަމަ، ޗުއްޓީ ކުރުކޮށް ވަޒީފާއަށް ނިކުންނަން ޖެހޭކަމަށް ބަޔާންކުރައްވައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ފޮނުއްވާފައިވާ މައްސަލައަކީ މިނިވަން މުއައްސަސާ ކޮމިޓީގެ މެންޑޭޓުގެ ތެރޭގައި ހިމެނޭކަމެއް ކަމަށް ފެނިވަޑައިގަންނަވާތީ، އެ މައްސަލަ މިނިވަން މުއައްސަސާ ކޮމިޓީއަށް ފޮނުވުމަށް ކޮމިޓީން ނިންމަވާފައިވެއެވެ.

ދެން ކޮމިޓީން މަޝްވަރާކުރައްވާފައިވަނީ 6 ފެބުރުވަރީ 2025 ގައި، ގއ.ވިލިނގިލި، ޒަމާނީވިލާ ފާތިމަތު ޝިއުނާއާއި އޭނާގެ ދަރިފުޅު ނިޔާވި މައްސަލައިގައި ސަރުކާރުގެ މުއައްސަސާތަކުގެ އިޙުމާލު އޮތްކަން ފާހަގަވާކަމަށް ބަޔާންކޮށް އެމް.ޑީ.ޕީގެ އަންހެނުންގެ ރޫޙުން ހުށަހަޅުއްވާފައިވާ މައްސަލައާ ގުޅޭގޮތުންނެވެ. އެގޮތުން، އެ މައްސަލައާ ގުޅޭ މަޢުލޫމާތު ސާފުކުރެއްވުމަށް މޯލްޑިވްސް ޕޮލިސް ސަރވިސް އަދި މިނިސްޓްރީ އޮފް ހެލްތަށް ސިޓީ ފޮނުއްވުމަށް ކޮމިޓީން ނިންމަވާފައިވެއެވެ.

ދިވެހިރާއްޖޭގައި ޞިއްޙީ ޚިދުމަތްދޭ ބައެއް ހޮސްޕިޓަލްތަކުން، ޕްރައިވެޓް އިންޝުއަރެންސްއިން ބިލަށް ފައިސާދައްކަވާ ފަރާތްތަކުގެ ތެރެއިން އެޑްމިޓްވެގެން ފަރުވާ ހޯއްދަވާ ފަރާތްތަކަށް އާސަންދައިން ފޯރުކޮށްދޭ ޚިދުމަތްތައް ނުލިބޭ ކަމަށް ބުނެ، އެ ފަރާތްތަކުން އަމިއްލައަށް އެ ފައިސާ ދެއްކެވުމަށް ހޮސްޕިޓަލުތަކުން އެދެމުންދާކަމަށާއި ދެންނެވުނު ބިލުތަކަށް އަލުން ފައިސާ ހޯއްދެވުމަޓަކައި ހޮސްޕިޓަލުތަކުން އާސަންދަ ކޮމްޕެނީއަށް ބިލު ހުށަހަޅުއްވައިގެން ފައިސާ ހޯއްދެވުމުގެ މަސައްކަތް ކުރައްވަމުން ގެންދަވާކަމުގެ ޝަކުވާތަކެއް ލިބެމުންދާތީ އެ މައްސަލަ ބަލައިދެއްވުމަށް އެދި މާފަންނު ހުޅަނގު ދާއިރާގެ މެންބަރު މުޙައްމަދު މުޞްތަފާ އިބްރާހީމް ހުށަހަޅުއްވާފައިވެއެވެ. މި ހުށަހެޅުއްވުމަށް އައްޑޫމީދޫ ދާއިރާގެ މެންބަރު ޢަބްދުއްރަޙްމާން ތާޢީދުކުރައްވާފައިވެއެވެ.

ނުކުޅެދުންތެރިކަން ހުންނަ ފަރާތްތަކަށް ވަޒީފާ ލިބުމުގައި ދަތިތަކެއް ދިމާވަމުންދާތީ، އެކަމަށް ހައްލެއް ހޯއްދަވައިދެއްވުމުގެ ގޮތުން ކުރެއްވޭނެކަންކަން ދެނެގަނެ، އެކަމަށް އަވަސް ހައްލެއް ހޯއްދެވުމަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުގެ ކަމާ ގުޅުންހުރި ބޭފުޅުންނާ ބައްދަލުކުރެއްވުމަށް މާފަންނު ހުޅަނގު ދާއިރާގެ މެންބަރު މުޙައްމަދު މުޞްތަފާ އިބްރާހީމް ހުށަހަޅުއްވާފައިވެއެވެ. މި ހުށަހެޅުއްވުމަށް އައްޑޫމީދޫ ދާއިރާގެ މެންބަރު ޢަބްދުއްރަޙްމާން ތާޢީދުކުރައްވާފައިވެއެވެ.

މި ހުށަހެޅުއްވުމަށް ވޯޓަށް އެއްސެވުމުން އެވަގުތު ކޮމިޓީއަށް ހާޒިރުވެ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ހުށަހެޅުއްވުން ފާސްވިއެވެ.

އެންމެ ފަހު ކަމެއްގެ ގޮތުގައި ކޮމިޓީން މަޝްވަރާކުރައްވާފައިވަނީ މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓުން ދޫކުރާ ލޯނު އަދި ސްކޮލަރޝިޕް ދޫކުރައްވާފައިވާ ފަރާތްތަކުގެ ތެރެއިން ގިނަ ފަރާތްތަކަށް ލިބެންޖެހޭ ފައިސާ ނުލިބި ލަސްވަމުންދާތީ، އެ ފަރާތްތަކުގެ ސެމިސްޓަރ ތަކުގެ ފީތައް ނުދެއްކި ލަސްވުމުގެ ސަބަބުން ކިޔެވުމަށް ހުރަސްއެޅެމުންދާކަމުގެ ޝަކުވާތަކެއް ލިބެމުންދާކަން ބަޔާންކޮށް މައްޗަންގޮޅި ދެކުނު ދާއިރާގެ މެންބަރު މުޞްޠަފާ ޙުސައިން ހުށަހަޅުއްވާފައިވާ މައްސަލައާ ގުޅޭގޮތުންނެވެ. އެގޮތުން، އެ މިނސްޓްރީގެ ބޭފުޅުންނާ ބައްދަލުކުރައްވައި، އެކަމާ ގުޅޭގޮތުން މަޢުލޫމާތު ސާފުކުރެއްވުމަށް ކޮމިޓީން ނިންމެވިއެވެ.