މިއަދުގެ ބައްދަލުވުމުގައި، މޯލްޑިވްސް މީޑިއާ ކައުންސިލްގެ މުވައްޒަފުންގެ މުސާރައަށް ހެޔޮ ބަދަލެއް ގެނެސްދެއްވުމަށް އެދި ފޮނުއްވާފައިވާ މައްސަލައާ ގުޅޭގޮތުން މަޝްވަރާކުރެއްވުމަށްފަހު، މުވައްޒަފުންގެ މުސާރައާ ގުޅޭގޮތުން ނޭޝަނަލް ޕޭ ކޮމިޝަނާ ގުޅިގެން ޙައްލެއް ހޯދުމަށް އެ ކައުންސިލަށް ދެންނެވުމަށް ކޮމިޓީން ނިންމާފައިވެއެވެ.

ކާޓިޔުންސް އިންޓަރނޭޝަނަލް ޕްރައިވެޓް ލިމިޓެޑަށް ރޯޑް ޑިވެލޮޕްމަންޓް ކޯޕަރޭޝަން ލިމިޓެޑުން ދައްކަންޖެހޭ ފައިސާ ދައްކަމުންނުދާކަމަށް ބަޔާންކޮށް އެ ކުންފުނިން ފޮނުއްވާފައިވާ މައްސަލައާ ގުޅޭގޮތުން މަޝްވަރާކުރެއްވުމަށްފަހު، ކަމާ ގުޅުންހުރި އިދާރާތަކާ ގުޅިގެން ޙައްލެއް ހޯދުމަށް އެ ފަރާތަށް ދެންނެވުމަށް ކޮމިޓީން ނިންމާފައިވެއެވެ.

އެއަށްފަހު، ދިވެހިރާއްޖޭގެ ރަށްތައް ޕްރޮމޯޓް ކުރުމަށް ޕްރައިވެޓް ސެކްޓަރގެ އޭޖެންސީއަކުން ތައިލޭންޑްގައި ބޭއްވުމަށް އިންތިޒާމްކުރާ ރޯޑްޝޯއެއްގައި ލޯކަލް ކައުންސިލްތަކުން ބައިވެރިވުމާ ގުޅޭގޮތުން ލޯކަލް ގަވަރމަންޓް އޮތޯރިޓީން ފޮނުއްވާފައިވާ މަޢުލޫމާތު މެންބަރުންނާ ހިއްސާކުރެއްވިއެވެ.

އޭގެ އިތުރުން، ޕޮލިސް ކޯޕަރޭޓިވް ސޮސައިޓީ (ޕޮލްކޯ) ގެ ކޮރަޕްޝަނާ ގުޅޭގޮތުން ވިސްލްބްލޯވަރެއް ފޮނުއްވާފައިވާ މައްސަލައާ ގުޅޭގޮތުން މަޝްވަރާކުރެއްވުމަށްފަހު، މި މައްސަލަ ދިރާސާކުރުމަށް ފުލުހުންގެ ހައުސިންގ ޕްރޮޖެކްޓުގެ ޚާއްޞަ އޮޑިޓް ރިޕޯޓު ދިރާސާކުރަން ހޮއްވެވި ސަބް-ކޮމިޓީއަށް ފޮނުވުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވި ހުށަހެޅުން ކޮމިޓީގެ އިއްތިފާޤުން ފާސްވިއެވެ.

އެއަށްފަހު، ކޮމިޓީން އެދިފައިވާ އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަނުގެ ޚާއްސަ އޮޑިޓާއި، ބިންވެރިޔާ ސްކީމުގެ ދަށުން ހުޅުމާލެއިން ގޯތި ދޫކުރުމާ ގުޅިގެން ހައުސިންގ ޑިވެލޮޕްމަންޓް ކޯޕަރޭޝަނަށް ލިބިފައިވާ މާލީ ގެއްލުންތަކާގުޅޭ ޚާއްސަ އޮޑިޓާ ގުޅޭގޮތުން އޮޑިޓަރ ޖެނެރަލްގެ އޮފީހުން ފޮނުއްވާފައިވާ މެއިލްއާއި، ކޮމިޓީން އެދިފައިވާ ސިފައިންނަށް ބޯހިޔާވަހިކަން ދިނުމަށް ސިފައިންގެ ކޯޕަރޭޓިވް (ސިފްކޯ) އިން ހިންގި 300 ހައުސިންގ ޔުނިޓްގެ މަޝްރޫޢުގެ ޚާއްޞަ އޮޑިޓާއި ސިފްކޯގެ 2024 ވަނަ އަހަރުގެ ފައިނޭންޝަލް އަދި ކޮމްޕްލަޔަންސް އޮޑިޓާ ގުޅޭގޮތުން އޮޑިޓަރ ޖެނެރަލްގެ އޮފީހުން ފޮނުއްވާފައިވާ ސިޓީ މެންބަރުންނާ ހިއްސާކުރެއްވިއެވެ.

އަދި، ކޮމިޓީން ދިވެހި ފުލުހުންގެ ޚިދުމަތަށް ފޮނުވާފައިވާ އާސަންދަ ކޮމްޕެނީ ލިމިޓެޑުން ހޮސްޕިޓަލެއް އެޅުމަށްޓަކައި ނޯތް ކޯސްޓް ކޮންޓްރެކްޓަރސް ޕްރައިވެޓް ލިމިޓެޑާ ޙަވާލުކުރުމަށްފަހު ކޮށްފައިވާ ޚަރަދުތަކާ ގުޅޭގޮތުން ދިވެހި ފުލުހުންގެ ޚިދުމަތުން ފޮނުއްވާފައިވާ ސިޓީ ކޮމިޓީއާ ހިއްސާކުރެއްވިއެވެ.

އޭގެ އިތުރުން، ކޮވިޑް-19 އާ ގުޅިގެން މިނިސްޓްރީ އޮފް ހެލްތުން، އެގްޒެކިއުޓަރސް ޖެނެރަލް ޓްރޭޑިންގއާ ޙަވާލުކޮށްގެން ގެނައުމަށް މަސައްކަތްކުރި 75 ވެންޓިލޭޓަރުގެ ތެރެއިން ގިނަ ޢަދަދެއްގެ ވެންޓިލޭޓަރުތަކެއް ދައުލަތަށް ލިބިފައިނުވާތީއާއި، ވެންޓިލޭޓަރުތަކަށް ބަދަލު ހޯދުމަށް އެޓަރނީ ޖެނެރަލްގެ އޮފީހުން މިހާތަނަށް ކޮށްފައިވާ މަސައްކަތްތަކުން އެއްވެސް ކުރިއެރުމެއް ލިބިފައިނުވާތީ، މި މައްސަލައިގައި އެގްޒެކިއުޓަރސް ޖެނެރަލް ޓްރޭޑިންގއާ ދެކޮޅަށް ޖިނާއީ ދަޢުވާއެއް ކުރެވިދާނެތޯ ބެއްލެވުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހަޅުއްވައި، ހުޅުމާލެ ދެކުނު ދާއިރާގެ މެންބަރު އަޙްމަދު ޝަމްހީދު ތާޢީދުކުރެއްވައި، ކޮމިޓީގެ އިއްތިފާޤުން ފާސްވިއެވެ.

އޭގެ އިތުރުން، މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވަރކްސް އިން ދިވެހިރާއްޖޭގެ 36 ރަށަކަށް ޢީދު ބޮކި ހޯދުމަށް މި އަހަރުގެ ދައުލަތުގެ ބަޖެޓުން 28 (އަށާވީސް މިލިއަން) ރުފިޔާ ޚަރަދުކުރެއްވުމަށް ނިންމަވާފައިވާ މައްސަލަ ކޮމިޓީން ދިރާސާކުރުމަށް ފެންނަކަމަށް ގެމަނަފުށި ދާއިރާގެ މެންބަރު އަސަދުﷲ ޝިހާބް ހުށަހަޅުއްވައި، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ތާޢީދުކުރެއްވި ހުށަހެޅުން ކޮމިޓީގެ އިއްތިފާޤުން ފާސްވިއެވެ.