މިއަދުގެ ބައްދަލުވުމުގައި، އޮޑިޓަރ ޖެނެރަލްގެ އޮފީހުގެ 2024 ވަނަ އަހަރުގެ މާލީ ބަޔާން ކޮމިޓީގެ މެންބަރުންނާ ހިއްސާކުރެއްވިއެވެ.

މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވަރކްސް އިން ދިވެހިރާއްޖޭގެ 36 ރަށަކަށް ޢީދު ބޮކި ހޯދުމަށް މި އަހަރުގެ ދައުލަތުގެ ބަޖެޓުން 28 (އަށާވީސް މިލިއަން) ރުފިޔާ ޚަރަދުކުރެއްވުމަށް ނިންމަވާފައިވާ މައްސަލައާ ގުޅޭގޮތުން އެ މިނިސްޓްރީން ފޮނުއްވާފައިވާ މަޢުލޫމާތާ ގުޅޭގޮތުން މަޝްވަރާކުރެއްވުމަށްފަހު، ޚަރަދުކުރުމަށް ނިންމަވާފައިވާ ފައިސާގެ އިތުރު ތަފްޞީލު ހޯދުމަށް އެ މިނިސްޓްރީއަށް ސިޓީ ފޮނުވުމަށް ނިންމެވިއެވެ.

އެއަށްފަހު، ކޮވިޑް-19 އާ ގުޅިގެން މިނިސްޓްރީ އޮފް ހެލްތުން، އެގްޒެކިއުޓަރސް ޖެނެރަލް ޓްރޭޑިންގއާ ޙަވާލުކޮށްގެން ގެނައުމަށް މަސައްކަތްކުރި 75 ވެންޓިލޭޓަރުގެ ތެރެއިން ގިނަ ޢަދަދެއްގެ ވެންޓިލޭޓަރުތަކެއް ދައުލަތަށް ލިބިފައިނުވާތީއާއި، ވެންޓިލޭޓަރުތަކަށް ބަދަލު ހޯދުމަށް އެޓަރނީ ޖެނެރަލްގެ އޮފީހުން މިހާތަނަށް ކޮށްފައިވާ މަސައްކަތްތަކުން އެއްވެސް ކުރިއެރުމެއް ލިބިފައިނުވާތީ، މި މައްސަލައިގައި އެގްޒެކިއުޓަރސް ޖެނެރަލް ޓްރޭޑިންގއާ ދެކޮޅަށް ޖިނާއީ ދަޢުވާއެއް ކުރެވިދާނެތޯ ކޮމިޓީން އެދުމުން ޕްރޮސިކިއުޓަރ ޖެނެރަލްގެ އޮފީހުން ފޮނުއްވާފައިވާ ލަފާއާ ގުޅޭގޮތުން މަޝްވަރާކުރެއްވިއެވެ. އެގޮތުން، އެ މައްސަލައިގައި އެގްޒެކިއުޓަރސް ޖެނެރަލް ޓްރޭޑިންގއާ ދެކޮޅަށް ތަޚްޤީޤެއް ހިންގުމަށް ކޮމިޓީއަށް ފެންނަކަމަށް ދިވެހި ފުލުހުންގެ ޚިދުމަތަށް ސިޓީ ފޮނުވުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވި ހުށަހެޅުން ކޮމިޓީގައި ތިއްބެވި މެންބަރުންގެ އިއްތިފާޤުން ނިންމެވިއެވެ.

އޭގެ އިތުރުން، ޗާޓަޑް އެކައުންޓަންޓްސް އޮފް ދަ މޯލްޑިވްސްގެ ކޮމިޓީތަކުގެ މެންބަރުންގެ ގޮތުގައި މަސައްކަތްކުރުމަށް ޤާބިލު ދިވެހިން ތިބިނަމަވެސް، އެ ކޮމިޓީތަކަށް ބޭރު ފަރާތްތައް އައްޔަންކުރާ މައްސަލައާ ގުޅޭގޮތުން އިސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް އަދި އޮޑިޓަރ ޖެނެރަލްގެ އޮފީހުގެ ސިޓީއާ ގުޅޭގޮތުން މަޝްވަރާކުރެއްވުމަށްފަހު، އެ އިދާރާތަކުން ދެއްވާފައިވާ މަޢުލޫމާތުގެ އަލީގައި މައްސަލަ ފޮނުވި ފަރާތަށް ޖަވާބުދިނުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވި ހުށަހެޅުން ކޮމިޓީގައި ތިއްބެވި މެންބަރުންގެ އިއްތިފާޤުން ނިންމެވިއެވެ.

އެއަށްފަހު، މާލިއްޔަތު ކޮމިޓީގެ ސަބް-ކޮމިޓީ ތަކަށް މެންބަރަކު ޢައްޔަނުކުރުމުގެ މަސައްކަތް ކުރިއަށްގެންދެވިއެވެ. އެގޮތުން މާލިއްޔަތު ކޮމިޓީގެ ސަބް-ކޮމިޓީ 1 (އޮޑިޓް ރިޕޯޓްތައް ދިރާސާކުރަން ހޮއްވެވި) އަދި މާލިއްޔަތު ކޮމިޓީގެ ސަބް-ކޮމިޓީ 2 (ފުލުހުންގެ ހައުސިންގ ޕްރޮޖެކްޓްގެ ޚާއްޞަ އޮޑިޓް ރިޕޯޓް ދިރާސާކުރަން ހޮއްވެވި) އަށް ހެންވޭރު އުތުރު ދާއިރާގެ މެންބަރު އަޙްމަދު އައިފާން ޢައްޔަނުކުރަން ފެންނަކަމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވައި، ކޮމިޓީގައި ތިއްބެވި މެންބަރުންގެ އިއްތިފާޤުން ނިންމެވިއެވެ.

މޯލްޑިވްސް ކަރެކްޝަނަލް ސަރވިސްގެ މުވައްޒަފުންގެ ޔުނިފޯމު ފެހުމަށް 2023 އަދި 2024 ވަނަ އަހަރުގައި ކޮށްފައިވާ ޚަރަދުތަކާގުޅޭ ދިރާސާކުރަން ފެންނަކަމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވި ހުށަހެޅުން ކޮމިޓީގައި ތިއްބެވި މެންބަރުންގެ އިއްތިފާޤުން ނިންމެވިއެވެ.

އޭގެ އިތުރުން، ކައުންސިލްތަކަށް ކޮންމެ އަހަރަކު ހިލޭ އެހީގެ ގޮތުގައި ލިބޭ ފައިސާގެ ޖުމްލަ ޢަދަދާއި ޚަރަދުކުރެވި ބާކީވެފައިވާ ފައިސާގެ މައްސަލަ ދިރާސާކުރުމަށް ކޮމިޓީގެ ރިޔާސަތުން ހުށަހަޅައި، ކޮމިޓީގެ އެއްވެސް އިޢުތިރާޒުނުކުރައްވާތީ އެ މައްސަލަ ކޮމިޓީން ދިރާސާކުރުމަށް ނިންމެވިއެވެ.