މިއަދުގެ ބައްދަލުވުމުގައި ފުރަތަމަ ކަމަކަށް ކުރިއަށް ގެންދެވީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުން، "މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް" އުވައިލައި، "މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ" ގެ ނަން "މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ" ގެ ނަމަށް ބަދަލުކޮށް، "މިނިސްޓްރީ އޮފް ފިނޭންސް" ގެ ނަން "މިނިސްޓްރީ އޮފް ފިނޭންސް އެންޑް ޕްލޭނިންގ" ގެ ނަމަށް ބަދަލުކޮށް، "މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ" އުވައިލައި، "މިނިސްޓްރީ އޮފް ޓޫރިޒަމް" ގެ ނަން "މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް" ގެ ނަމަށް ބަދަލުކޮށް "މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ" އާއި، "މިނިސްޓްރީ އޮފް ފިނޭންސް އެންޑް ޕްލޭނިންގ" އަދި "މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް" ގެ މަސައްކަތުގެ ދާއިރާއަށް ގެންނެވި ބަދަލުތައް ރައްޔިތުންގެ މަޖިލީހުން ފާސްކުރެއްވުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލަ ދިރާސާކުރެއްވުމުގެ މަސައްކަތެވެ. އެގޮތުން، މެންބަރުންނަށް ފުރުޞަތު ހުޅުވާލުމުން، 3 ވުޒާރާއެއްގެ މަސައްކަތުގެ ދާއިރާއަށް ގެންނެވި ބަދަލުތައް ރައީސުލްޖުމްހޫރިއްޔާ ފޮނުއްވާފައިވާ ގޮތަށް ރައްޔިތުންގެ މަޖިލީހުން ފާސްކުރުމަށް ކޮމިޓީއަށް ފެންނަކަމަށް ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ހުށަހަޅުއްވައި ހެންވޭރު ހުޅަނގު ދާއިރާގެ މެންބަރު ޢަލީ އިބްރާހީމް ތާޢީދުކުރެއްވިއެވެ.

މި ހުށަހެޅުއްވުމަށް ވޯޓަށް އެއްސެވުމުން އެވަގުތު ކޮމިޓީއަށް ހާޒިރުވެ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ހުށަހެޅުއްވުން ފާސްވިއެވެ.

ދެވަނަ ކަމަކަށް ކުރިއަށް ގެންދެވީ، ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ފޮނުއްވާފައިވާ، ރާއްޖެއިން ބޭރުން އެމް.ބީ.ބީ.އެސް ހެދުމަށްޓަކައި ދޫކުރެވޭ ލޯނުގައި އިންޓާންޝިފް ހެދުމަށްޓަކައި ހޭދަވާ ފައިސާ ލޯނުގެ ތެރޭގައި ހިމެނިފައި ނުވުމާއި ރާއްޖޭގައި އިންޓާންޝިފް ހެދުމަށް އިތުރަށް ފައިސާ ހޭދަކުރަން ޖެހުމާއި އަދި އެފުރުޞަތު އައި.ޖީ.އެމް.އެޗުން ލިބުން ދަތިވެފައިވާތީ، މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް އަދި މިނިސްޓްރީ އޮފް ހެލްތްގެ އިސް ފަރާތްތަކާ ބައްދަލުކުރައްވައި އެކަމުގައި ދިމާވާ ގޮންޖެހުންތަކަކީ ކޮބައިކަން ބަލައި، އެކަންކަމަށް ހައްލެއް ހޯއްދަވައިދެއްވުމަށް އެދި ފޮނުއްވާފައިވާ މައްސަލަ އެވެ. އެގޮތުން، އެ މައްސަލައާ ގުޅޭގޮތުން މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް އަދި މިނިސްޓްރީ އޮފް ހެލްތްއިން ފޮނުއްވާފައިވާ މަޢުލޫމާތު މެންބަރުންނާ ހިއްސާކުރުމަށްފަހު، އެ މަޢުލޫމާތުތަކާމެދު މަޝްވަރާކުރުމަށްފަހު، މި މައްސަލަ އިތުރަށް ދިރާސާކުރުމުގެ ގޮތުން މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް އާއި، މިނިސްޓްރީ އޮފް ހެލްތް އަދި އައި.ޖީ.އެމް.އެޗްގެ ކަމާގުޅުންހުރި ބޭފުޅުންނާ ބައްދަލުކުރައްވައި މަޢުލޫމާތު ސާފުކުރެއްވުމަށް ފުވައްމުލަކު މެދު ދާއިރާގެ މެންބަރު ޢަލީ ފަޒާދު ހުށަހަޅުއްވައި ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ތާއިދުކުރެއްވިއެވެ. 

މި ހުށަހެޅުއްވުމަށް ވޯޓަށް އެއްސެވުމުން އެވަގުތު ކޮމިޓީއަށް ހާޒިރުވެ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ހުށަހެޅުއްވުން ފާސްވިއެވެ.

އެއަށްފަހު ކުރިއަށް ގެންދެވީ، މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި ބައްދަލުކުރައްވައި އެއްގަމު އުޅަނދު ރަޖިސްޓަރީ ކުރުމާ ގުޅޭގޮތުންނާއި އަދި އެ މިނިސްޓްރީގެ މެންޑޭޓްގެ ތެރެއިން އެކުލަވާލާފައިވާ ޕޮލިސީތަކާ ގުޅޭގޮތުން މަޢުލޫމާތު ސާފުކުރުމަށް އެދި ހުށަހަޅުއްވާފައިވާ މައްސަލަ ހުޅުމާލެ ދެކުނު ދާއިރާގެ މެންބަރު ޑޮކްޓަރ އަޙްމަދު ޝަމްހީދު ހުށަހަޅުއްވާފައިވާ މައްސަލައެވެ. މި މައްސަލައާ ގުޅޭގޮތުން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ފޮނުއްވާފައިވާ މަޢުލޫމާތުތަކާމެދު މަޝްވަރާކުރިއެވެ. ނަމަވެސް ޖަލްސާގެ ވޯޓު ގަޑި ޖެހުމާ ގުޅިގެން، މި މައްސަލަ އެހެން ދުވަހަކަށް އެޖެންޑާ ކުރުމަށް ނިންމަވައި، ބައްދަލުވުން ނިންމަވާލެއްވިއެވެ.