މިއަދުގެ ބައްދަލުވުމުގައި ކުރިއަށްގެންދެވީ ކޮމިޓީއަށް ހުށަހެޅިފައިވާ މައްސަލަތައް ދިރާސާކުރެއްވުމެވެ.

އެގޮތުން އެންމެ ފުރަތަމަ ކުރިޔަށް ގެންދެވީ، ރައްޔިތުންގެ މަޖިލިސް މެންބަރުންނަށް ކަނޑައަޅުއްވާފައިވާ ހެލްތް އިންޝުއަރެންސް ސްކީމުގައި ރައްޔިތުންގެ މަޖިލިސް މެންބަރުންގެ މަންމަ އާއި ބައްޕަ ހިމަނައްވައިދެއްވުން އެދި، އަދި ރައްޔިތުންގެ މަޖިލިސް މެންބަރުންނަށް ފޯރުކޮށްދެވޭ ވީ.އައި.ޕީ ޚިދުމަތުގައި މައިންބަފައިންނާއި ދަރިންވެސް ހިމަނައްވައިދެއްވުމަށް އެދި ވެލިދޫ ދާއިރާގެ މެންބަރު މުޙައްމަދު ޢައްބާސް ފޮނުއްވާފައިވާ މައްސަލަ ދިރާސާކުރުމެވެ. މިގޮތުން، މި މައްސަލައާމެދު ކޮމިޓީގެ މެންބަރުންގެ މެދުގައި މަޝްވަރާކުރުމަށްފަހު، ރައްޔިތުންގެ މަޖިލީހުގެ މެންބަރުންނަށް ފޯރުކޮށްދޭ އިންޝުއަރެންސްގެ ޚިދުމަތަކީ ޤާނޫނަކުން ފޯރުކޮށްދޭ ޚިދުމަތަކަށްވެފައި، އެ ޤާނޫނުގައި ދައުލަތުން އިންޝުއަރެންސް ފޯރުކޮށްދޭ ފަރާތްތަކުގެ ތެރޭގައި މައިންބަފައިން ނުހިމެނޭކަމަށާއި، ނަމަވެސް ރައްޔިތުންގެ މަޖިލީހުގެ އިދާރާއިން ފޯރުކޮށްދޭ އިންޝުއަރެންސް ޕެކޭޖުގައި މެންބަރުންނަށް މެންބަރުން އަމިއްލަފުޅަށް އިންޝުއަރެންސް ޕްރިމިއަމް އެއްފަހަރާ ދެއްކުމުން މައިންބަފައިން ހިމަނުއްވައިދެއްވާކަން ފާހަގަކުރެއްވިއެވެ. އެހެންކަމުން، މިކަން ވެލިދޫ ދާއިރާގެ މެންބަރު މުޙައްމަދު ޢައްބާސް އަށް އެންގުމަށް ކޮމިޓީން ނިންމެވިއެވެ. މީގެއިތުރުން، ރައްޔިތުންގެ މަޖިލިސް މެންބަރުންނަށް ފޯރުކޮށްދެވޭ ވީ.އައި.ޕީ ޚިދުމަތުގައި މައިންބަފައިންނާއި ދަރިންވެސް ހިމަނައްވައިދެއްވުމަށް ވެލިދޫ ދާއިރާގެ މެންބަރު މުޙައްމަދު ޢައްބާސް އެދިލައްވާފައިވާތީ އެކަމާމެދު މަޝްވަރާކުރެއްވުމަށްފަހު، ރައްޔިތުންގެ މަޖިލިސް މެންބަރުންނަށް ފޯރުކޮށްދެވޭ ވީ.އައި.ޕީގެ ޚިދުމަތް މިހާރުވެސް އެ ފަރާތްތަކަށް ލިބޭކަމަށް ކޮމިޓީގެ މެންބަރުން ފާހަގަކުރެއްވިއެވެ.

އެއަށްފަހު ކުރިއަށް ގެންދެވީ، ރައްޔިތުންގެ މަޖިލީހަށް ހުށަހެޅޭ ޖިންސީ ފުރައްސާރައިގެ މައްސަލަތައް ތަޙުޤީޤުކުރުމުގައި، ރައްޔިތުންގެ މަޖިލީހުގައި ތިއްބަވާ އަންހެން މެންބަރުން ޝާމިލްކޮށްދެއްވުމަށް ނުވަތަ ފަންނީ އެހީތެރިކަން ރައްޔިތުންގެ މަޖިލީހުން ބޭރުން ހޯދުމަކީ މުހިންމު ކަމެއް ކަމަށާއި، މަޖިލީހުގެ ގަވާއިދުގެ މަތިން މި ކަންތައް ކުރިއަށް ގެންދެވޭނެ ގޮތް ހައްދަވައިދެއްވުމަށް އެދި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ފޮނުއްވާފައިވާ ސިޓީ ދިރާސާކުރެއްވުމެވެ. މި މައްސަލައާމެދު ކޮމިޓީގައި މަޝްވަރާކުރެއްވުމަށްފަހު، މިކަމަކީ ޤާނޫނީ ގޮތުން ކުރެވޭނެކަމެއް ނޫންކަމަށާއި، އެހެންނަމަވެސް މިފަދަ މައްސަލައެއް ބަލަމުންދާ ކޮމިޓީއެއްގެ ބައްދަލުވުމަށް، އަންހެން މެންބަރުން ހިމެނުމަށް އެ މައްސަލަ ހުށަހެޅި ފަރާތުން އެދިއްޖެނަމަ، ރައްޔިތުންގެ މަޖިލީހުގެ ގަވާއިދުގެ 151 ވަނަ މާއްދާގެ (ހ) ގެ ދަށުން އެކަންކުރެވޭނެ އިންތިޒާމް ހަމަޖެހިފައިވާކަމަށް އެ މެންބަރަށް ދެންނެވުމަށް ކޮމިޓީން ނިންމެވިއެވެ. މީގެ އިތުރުން، ޖިންސީ ފުރައްސާރައިގެ މައްސަލަތައް ތަޙުޤީޤުކުރުމުގައި ފަންނީ އެހީތެރިކަން ރައްޔިތުންގެ މަޖިލީހުން ބޭރުން ހޯދުމަށް ބޭނުންވެއްޖެ ހިނދެއްގައި، އެކަން ކުރެވޭނެ ފުރުޞަތުވެސް ކޮމިޓީތަކަށް ލިބިގެންވާ ކަމަށް ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް އަށް ދެންނެވުމަށް ކޮމިޓީން ނިންމެވިއެވެ.