މިއަދުގެ ބައްދަލުވުމުގައި، ޤާނޫނު ނަންބަރު 8/2009 (ދިވެހިރާއްޖޭގެ ޕެންޝަނާބެހޭ ޤާނޫނު) ގައި ބަޔާންކޮށްފައިވާ ރިޓަޔަރމަންޓް ޕެންޝަން ސްކީމުގެ ދަށުން ލިބިދޭ ޕެންޝަން ޢިނާޔަތުގެ ބޭރުން ފޯރުކޮށްދޭ އެހެނިހެން ރިޓަޔަރމަންޓް ޢިނާޔަތްތަކާ ގުޅޭގޮތުން މަޝްވަރާކުރުމަށް މޯލްޑިވްސް ޕެންޝަން އެޑްމިނިސްޓްރޭޝަން އޮފީސް އަދި ސިވިލް ސަރވިސް ކޮމިޝަންގެ ބޭފުޅުންނާ ބައްދަލުކުރެއްވިއެވެ.

އެގޮތުން، ޕެންޝަން ޤާނޫނުގެ ބޭރުން ހިންގާ ސްކީމުތަކާ ގުޅިގެން، އެކަމަށް ކުރަން ޖެހޭ ހޭދަ ބޮޑުވެ، ތަފާތު ކުރުން ބޮޑު ނިޒާމެއް އުފެދިފައި އޮތުމަކީ އެންމެ ބޮޑު ކަންބޮޑުވުން ކަމަށާއި، ކޮންޓްރިބިއުޓް ކުރެވޭ ނިޒާމެއް އުފައްދާފައި އޮތް އިރު އޭގެ ބޭރުން އެއްވެސް ކޮންޓްރިބިއުޝަނަކާ ނުލައި ހިންގާ ސްކީމުގެ ސަބަބުން، ޕެންޝަން ޤާނޫނުގެ ތެރެއިން ހިންގާ ސްކީމުގައި ބައިވެރިވަން ބޭނުންވާ މީހުން މަދުވާނެ ކަމަށް މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ފާހަގަކުރެއްވިއެވެ. މީގެ އިތުރުން، ޕެންޝަން ޤާނޫނު ވުޖޫދަށް އައިތާ 15 އަހަރުވީ އިރު، އެ ސްކީމުގެ ބޭރުން ވަކި ވަކި މުއައްސަސާތަކުން ހިންގާ ސްކީމުތަކުން ދޭ ފައިދާތައް އުވާލާ އިރު، ކުއްލިއަކަށް އުވާލުމުގެ ބަދަލުގައި މެދުމިނުގެ ހައްލުތަކެއް ހޯދަން ޖެހޭ ކަމަށްވެސް އެ އޮފީހުން ފާހަގަކުރެއްވިއެވެ.

ޕެންޝަނަކީ ރިޓަޔާކުރުމުން ލިބޭ އެއްޗަކަށް ވާއިރު، ބައެއް މީހުން ސިވިލް ސާވިސްއިން ރިޓަޔާވުމަށްފަހު ސިވިލް ސާވިސް ނޫން އެހެން މުއައްސަސާތަކުގައި ވެސް މަސައްކަތްކުރައްވާކަމަށާއި، އެއީ އެއްވެސް ހާލެއްގައި ހަމަޖެހޭ އުސޫލެއް ނޫން ކަމަށާއި، ގާނޫނުގެ ތެރެއިން އެކަމަށް ހައްލެއް ލިބެންޖެހޭ ކަމަށް ގަބޫލުކުރައްވާ ކަމަށް ސިވިލް ސަރވިސް ކޮމިޝަނުން ފާހަގަކުރެއްވިއެވެ.

މޯލްޑިވްސް ޕެންޝަން އެޑްމިނިސްޓްރޭޝަން އޮފީސް އަދި ސިވިލް ސަރވިސް ކޮމިޝަނުން ކޮމިޓީއާ ޙިއްޞާކުރެއްވި މަޢުލޫމާތުގެ އަލީގައި، ވަކި ވަކި އިދާރާތަކުން ޕެންޝަން ސްކީމުތައް ހިންގުމުގެ ބަދަލުގައި އެ ހުރިހާ ބާރެއް ޕެންޝަން ޤާނޫނުގެ ތެރެއިން ޕެންޝަން އެޑްމިނިސްޓްރޭޝަން އޮފީހާ ހަވާލުކުރުމަށް، ޤާނޫނަށް ގެންނަން ޖެހޭ ބަދަލުތަކުގެ މަސައްކަތްތައް ރާވާނެ ގޮތުގެ ޓައިމްލައިނެއް ޙިއްޞާކުރުމަށް ކޮމިޓީން އެދިވަޑައިގެންނެވިއެވެ.