މިއަދުގެ ބައްދަލުވުމުގައި ކުރިއަށް ގެންދެވީ ތ. ވިލުފުށީގައި އިމާރާތްކޮށްފައިވާ ހައުސިން ޔުނިޓުތަކާއި، ކައުންސިލުން ދޫކޮށްފައިވާ ގޯތިތަކާއި ކުއްޔަށް ދޫކޮށްފައިވާ ވިޔަފާރި ބިންތަކަށް ބޭނުންވާ ފެނާއި ނަރުދަމާއާއި ކަރަންޓުގެ ޚިދުމަތް ދިނުމަށްޓަކައި ރަށުގައި އަޅާފައިވާ ނެޓްވަރކުގެ މަސައްކަތް ވީއެންމެ އަވަހަކަށް ފެށޭނެ ގޮތެއް ހައްދަވައިދެއްވުމަށް އެދި ހުށަހަޅާފައިވާ މައްސަލަ ދިރާސާކުރުމެވެ. އެގޮތުން އެ މައްސަލައިގެ އަދާހަމަ މަޢުލޫމާތު ފޯރުކޮށްދިނުމަށް އެދި، ކަމާ ގުޅޭ މުއައްސަސާތަކަށް ކޮމިޓީން ފޮނުވާފައިވާ ސިޓީތަކަށް ޖަވާބު ދެއްވި މުއައްސަސާތަކުން ދެއްވި ޖަވާބުތައް ކޮމިޓީން ދިރާސާކޮށް، އެ ސިޓީތަކުގައިވާ މަޢުލޫމާތަށް ރިއާޔަތްކޮށް، އެ ކައުންސިލަށް ސިޓީއަކުން ޖަވާބުދިނުމަށް ނިންމެވިއެވެ. ކޮމިޓީން މަޢުލޫމާތު ހޯދުމަށް ސިޓީ ފޮނުވި މުއައްސަސާތަކުގެތެރެއިން މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ ޖަވާބު ކޮމިޓީ ފެށުމާ ހަމައަށް ލިބިފައެއް ނުވެއެވެ.

ދެން، އެއަށްފަހު ކުރިއަށްގެންދެވީ، ޔޫ އެންޑް މީ ރިސޯޓުން ގިރިއަކަށް ކުނި އަޅާ ކަމަށް ބުނެ ރައްޔިތުންގެ މަޖިލީހުގެ ވިސްލްބްލޯވަރ ޕްރޮޓެކްޝަން ކޮމިޓީއަށް ހުށަހަޅާފައިވާ މައްސަލަ އިތުރަށް ދިރާސާކުރުމުގެ މަސައްކަތެވެ. އެގޮތުން، އެ މައްސަލަ އިތުރަށް ދިރާސާކުރުމަށް، ކޮމިޓީން އެ ރިސޯޓަށް ޒިޔާރަތްކުރުމަށް ކުރިން ނިންމަވާފައިވާ ނިންމެވުމާ އެއްގޮތަށް، އެ ރިސޯޓަށް ދިއުމުގެ އިންތިޒާމު ހަމަޖެއްސުމާ ގުޅޭގޮތުން އެ ރިސޯޓަށް ސިޓީއެއް ފޮނުވުމަށް ވެސް ކޮމިޓީން ނިންމެވިއެވެ.

އެއަށްފަހު މިއަދުގެ ކޮމިޓީން ނިންމި ނިންމުންތަކާމެދު އެއްވެސް މެންބަރެއްގެ އިޢުތިރާޒެއް އޮތް ތޯ އެހުމަށްފަހު، އެއްވެސް މެންބަރަކު އިޢުތިރާޒު ނުކުރައްވާތީ، އެ ގޮތަށް ނިންމެވިއެވެ.