މިބައްދަލުވުމުގައި ޓޫރިސްޓް ރިޒޯޓް އަދި ހޮޓާތަކުގައި މަސައްކަތްކުރަމުންދާ މުވައްޒަފުން ތަބާވާންޖެހޭ ގްރޫމިންގ އަދި ހެދުންއެޅުމުގެ އުސޫލުތައް ހުރި ގޮތުގެ ސަބަބުން ބުރުގާ އެޅުމަށާއި، ޑީސެންޓްކޮށް ތުނބުޅި މަތިމަސް ބެހެއްޓުމަށް މުވައްޒަފުންނަށް ކުރިމަތިވާ ހުރަސްތައް ނައްތާލައި، ފަތުރުވެރިކަމުގެ ޞިނާޢަތުގައި މަސައްކަތްކުރާ މުވައްޒަފުންނާގުޅޭ ގްރޫމިންގ އަދި ހެދުންއެޅުމުގެ ޢާންމު މިންގަނޑެއް ނުވަތަ އުސޫލެއް އެކުލަވާލުމަށް ސަރުކާރަށް ގޮވާލައްވައި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މަޢުރޫފް ޛާކިރު ހުށަހަޅުއްވާފައިވާ ޤަރާރާ ގުޅޭގޮތުން ވަޒީފާގެ މާޙަލުގައި މުވައްޒަފުން ހިފަހައްޓަންޖެހޭ ގްރޫމިންގ މިންގަނޑުތަކާއި، ހެދުންއެޅުމުގައި ޢަމަލުކުރަންޖެހޭ އަސާސީ އުސޫލެއް ނުވަތަ ގަވާއިދެއް ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ ދަށުން އެކުލަވާލެއްވޭނެތޯއާއި، އެފަދަ އުސޫލެއް ނުވަތަ ގަވާއިދެއް އެކުލަވާލެއްވުމުގައި ކުރިމަތިވެދާނެ ޤާނޫނީ ގޮންޖެހުންތަކާއި ހުރަސްތަކާމެދު މަޝްވަރާކުރެއްވުމަށް މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ކަމާގުޅުންހުރި ބޭފުޅުންނާ ބައްދަލުކުރައްވައި މަޢުލޫމާތު ސާފުކުރެއްވިއެވެ. އެގޮތުން، ވަޒީފާގެ މާޙަލުގައި މުވައްޒަފުން ހިފަހައްޓަންޖެހޭ ގްރޫމިންގ މިންގަނޑުތަކާއި، ހެދުންއެޅުމުގައި ޢަމަލުކުރަންޖެހޭ އަސާސީ އުސޫލެއް ނުވަތަ ގަވާއިދެއް ހެދުމުގެ ބާރު ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) އިން ލިބިދީފައިނުވާކަމަށާއި، ވަކި ސެކްޓަރ އަކަށް ޚާއްޞަކޮށް ހެދުންއެޅުމުގައި ޢަމަލުކުރަންޖެހޭ އަސާސީ އުސޫލެއް ނުވަތަ ގަވާއިދެއް އެކުލަވާނުލެވޭނެކަމަށާއި، ގަވާއިދެއް އެކުލަވާލާނަމަ، އެކުލަވާލަންވާނީ ހުރިހާ ސެކްޓަރތައް ހިމެނޭގޮތަށްކަމަށާއި، އެފަދަ ގަވާއިދެއް އެކުލަވާލެވޭނީ ޤާނޫނުން ބާރުލިބިގެންކަމަށް މިނިސްޓްރީއިން ފާހަގަކުރެއްވިއެވެ.