މިއަދުގެ ބައްދަލުވުމުގައި، ފެނަކަ ކޯޕަރޭޝަން ލިމިޓެޑްގެ 2022 ވަނަ އަހަރާއި 2023 ވަނަ އަހަރުގެ މާލީ ބަޔާންތަކުގެ އޮޑިޓް ރިޕޯޓުތައް ނިންމުން ލަސްވެފައިވާ މައްސަލައާ ގުޅޭގޮތުން އެ ކޯޕަރޭޝަނުން ފޮނުވާފައިވާ ސިޓީތަކާއި އޮޑިޓަރ ޖެނެރަލްގެ އޮފީހުން ފޮނުވާފައިވާ ސިޓީއާ ގުޅޭގޮތުން މަޝްވަރާކުރައްވައި، އެ ކޯޕަރޭޝަނުން އޮޑިޓް ނިންމުމުގެ މަސައްކަތް ކުރިއަށްގެންދަވާކަމަށް ބަޔާންކުރައްވާފައިވާތީ، މައްސަލަ ފައިލްކުރުމަށް ނިންމެވިއެވެ.

އެއަށްފަހު، މޯލްޑިވްސް ކަރެކްޝަނަލް ސަރވިސްގެ ޕްރިޒަން ކޯޕަރޭޓިވް ސޮސައިޓީގެ ތެރޭގައި އިންތިހާއަށް ކޮރަޕްޝަންގެ ޢަމަލުތައް ހިންގަމުންދާކަމަށް ބަޔާންކުރައްވައި ވިސްލްބްލޯވަރެއް ހުށަހެޅުއްވާފައިވާ މައްސަލައިގައި، އެ ސޮސައިޓީގެ ބޭފުޅުންނާ ބައްދަލުކުރެއްވުމަށް ނިންމެވިއެވެ.

މީގެ އިތުރުން، މިނިސްޓްރީ އޮފް ފިނޭންސް އެންޑް ޕްލޭނިންގ ގެ އިސްވެރިއެއް ހިންގާފައިވާކަމަށް ތުހުމަތުކުރެވޭ ކޮރަޕްޝަންގެ މައްސަލައާ ގުޅޭގޮތުން މަޝްވަރާކުރެއްވުމަށްފަހު، އެހެން ބައްދަލުވުމެއްގައި މި މައްސަލަ އަލުން އެޖެންޑާކުރުމަށް ނިންމެވިއެވެ.

ޤާނޫނު ނަންބަރު 32/2024 (ބޭރު ފައިސާއާބެހޭ ޤާނޫނު) އާއި، މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ނަންބަރު 220-TD/CIR/2020/05 ސަރކިއުލާއާއި، މޯލްޑިވްސް މަނިޓަރީ އޮތޯރިޓީގެ ނަންބަރު 2024/R-12 ގަވާއިދާ ބައެއް ފުށުއެރުންތައް ހުރުމުގެ ސަބަބުން، ވިޔަފާރި ހިންގުމަށް ގޮންޖެހުންތަކެއް ކުރިމަތިވަމުންދާކަމަށް ބަޔާންކުރައްވައި މިޝަން 2 މޯލްޑިވްސް ޕްރައިވެޓް ލިމިޓެޑް އަދި މިޝަން 4 މޯލްޑިވްސް ޕްރައިވެޓް ލިމިޓެޑުން ފޮނުއްވާފައިވާ ސިޓީތަކާ ގުޅޭގޮތުން މަޝްވަރާކުރެއްވުމަށްފަހު، މި މައްސަލައާ ގުޅޭ މަޢުލޫމާތު މޯލްޑިވްސް އިންލެންޑް ރެވެނިއު އޮތޯރިޓީ އަދި މޯލްޑިވްސް މަނިޓަރީ އޮތޯރިޓީން ހޯދުމަށް ނިންމެވިއެވެ.

އެއަށްފަހު އެހެނިހެން ކަންތައްތަކުގެ ތެރެއިން، އަންނަނިވި ހުށަހެޅުންތައް ހުށަހަޅުއްވައި، އެ މަޢުލޫމާތު ހޯދުމަށް އެއްވެސް މެންބަރަކު އިޢުތިރާޒުކުރައްވާފައިނުވާތީ، ގުޅުންހުރި އިދާރާތަކުން އެ މަޢުލޫމާތުތައް ހޯދުމަށް ނިންމެވިއެވެ.

1. ސްޓޭޓް އިލެކްޓްރިކް ކޮމްޕެނީ ލިމިޓެޑްގެ މުވައްޒަފުންނަށް ޚާއްޞަކޮށްގެން ކުރިއަށް ގެންދެވި ބޯހިޔާވަހިކަމުގެ މަޝްރޫޢުގެ ދަށުން ހުޅުމާލޭގައި ޢިމާރާތްކޮށްފައިވާ ފްލެޓްތައް ލިބިފައިވާ ފަރާތްތަކުން، ކުލީގެ ގޮތުގައި އެ ކުންފުންޏަށް ދައްކަންޖެހޭ ފައިސާގެ ތެރެއިން މިހާތަނަށް އެ ކުންފުންޏަށް ލިބެންޖެހި ނުލިބިވާ ފައިސާގެ ތަފްޞީލު ހޯދުމަށް ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި، ހެންވޭރު އުތުރު ދާއިރާގެ މެންބަރު އަޙްމަދު އައިފާން ތާޢީދުކުރެއްވިއެވެ.
2. ސްޓޭޓް އިލެކްޓްރިކް ކޮމްޕެނީ ލިމިޓެޑުން ދިވެހިރާއްޖެއަށް ތަޢާރަފުކުރެއްވި ގޮގޯރޯ ބްރޭންޑްގެ ބެޓަރީ ސައިކަލްތަކުގެ ޗާޖަރުގެ ގޮތުގައި، އެ ސައިކަލްތަކަށް ބޭނުންނުކުރެވޭ ޗާޖަރުތަކެއް ދިވެހިރާއްޖެއަށް ގެންނަވާފައިވާކަމުގެ މަޢުލޫމާތު ލިބިފައިވާތީ، އެކަމުގެ މަޢުލޫމާތު ހޯދުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހެޅުއްވިއެވެ.
3. ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑާއެކު ބޭއްވުމަށް ހަމަޖެހިފައިވާ ކޮމިޓީގެ ބައްދަލުވުމުގައި، ކޭ ޕާކް ރެސިޑެންސްގެ ފްލެޓްތައް ނުނިމި ދިގުލައިގެންދާ މައްސަލައިގައި އެ ކުންފުނިން އަޅުއްވަން ގަސްދުކުރައްވާ ފިޔަވަޅުތަކާއި، އެ އެޕާޓްމަންޓްތަކަށް ފައިސާ ދައްކާފައިވާ ފަރާތްތަކަށް އެ އެޕާޓްމަންޓްތައް ލިބިދެވޭނެގޮތަށް ކަންކަން ބައްޓަންކުރެއްވުމަށް އެ ކުންފުނިން މިހާތަނަށް ކުރައްވާފައިވާ މަސައްކަތްތަކާއި، ކުރައްވަމުން ގެންދަވާ މަސައްކަތްތަކާ ގުޅޭގޮތުން މަޝްވަރާކުރުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހެޅުއްވިއެވެ.
4. ސީލައިފްގެ މައްޗަށް ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑުން އުފުއްލެވި މަދަނީ ދަޢުވާ އަނބުރާ ނެންގެވުމާއި، އެ މައްސަލައިގައި އެ ކޯޕަރޭޝަނަށް މާލީ ގޮތުން އެއްވެސް ގެއްލުމެއްވެފައިވާނަމަ، އެކަމުގެ ތަފްޞީލާއި، ސީލައިފްއަށް ފައިސާ ދައްކާފައިވާ ފަރާތްތަކަށް ވިނަރެސް މަޝްރޫޢު އިން ފްލެޓް ދިނުމުގައި އެ ކުންފުނިން ގެންގުޅުއްވި އުސޫލު ދިރާސާކުރުމަށް ގެމަނަފުށި ދާއިރާގެ މެންބަރު އަސަދުﷲ ޝިހާބް ހުށަހަޅުއްވައި، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ތާޢީދުކުރެއްވިއެވެ.