މިއަދުގެ ބައްދަލުވުމުގައި ޤާނޫނު ނަންބަރު 2000/4 (ޢާއިލާއާބެހޭ ޤާނޫނު) ގެ ދަށުން އެކުލަވާލާފައިވާ ޢާއިލާއާބެހޭ ގަވާއިދުގައި ކުއްޖާގެ ޢުމުރުން 18 އަހަރު ފުރެންދެން ކުއްޖާގެ ޚަރަދަށާއި ކުއްޖާގެ ބެލުމުގެ ޚަރަދުގެ ގޮތުގައި މިހާރު ކަނޑައަޅާފައިވާ ޢަދަދުތަކާ ގުޅިގެން ކަންބޮޑުވުން ފާޅުކުރައްވައި، ހުށަހަޅުއްވާފައިވާ މައްސަލައާ ގުޅޭގޮތުން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން އަދި ފެމިލީ ކޯޓުގެ ބޭފުޅުންނާ ބައްދަލުކުރެއްވިއެވެ. އެގޮތުން، ޢާއިލާއާބެހޭ ގަވާއިދަށް ގެންނަ އިސްލާޙުތަކާ ގުޅޭގޮތުން އޮގަސްޓު މަހުގެ ތެރޭގައި ކަމާގުޅޭ އިދާރާތަކާއެކު ބޭއްވޭ ބައްދަލުވުންތައް ނިންމުމަށްފަހު، އެ ގަވާއިދު އެޓަރނީ ޖެނެރަލް އޮފީހަށް ފޮނުވާނެކަމަށާއި އަދި ސެޕްޓެމްބަރު މަހުގެ ތެރޭގައި ގަވާއިދު ގެޒެޓުކުރެވޭނެކަމަށް ލަފާކުރައްވާކަމަށް މިނިސްޓްރީން މަޢުލޫމާތު ދެއްވާފައިވެއެވެ. އަދި އެ ގަވާއިދު ގެޒެޓްކުރެއްވުމުގެ ކުރިން ކޮމިޓީއާ ހިއްސާކުރެއްވުމަށް ކޮމިޓީން އެދިވަޑައިގެންނެވިއެވެ.

އެއަށްފަހު، އެޑިއުކޭޝަން މިނިސްޓްރީން އެކުލަވާލާފައިވާ ގަވާއިދުތަކާއި އުސޫލުތަކުގައި ބަޔާންކުރާ ގޮތުން ސްކޫލްތަކުން ފާހަގަކުރާ ރަސްމިއްޔާތުތަކަށް ޝަރަފުވެރި މެހެމާނުންގެ ގޮތުގައި ރައްޔިތުންގެ މަޖިލީހުގެ މެންބަރުންނަށް ބައިވެރިވެވަޑައިނުގެންނެވޭތީ، އެކަން ބެއްލެވުމަށް ވިލުފުށި ދާއިރާގެ މެންބަރު ޙަސަން ވަޙީދު ހުށަހަޅުއްވައި، މަނަދޫ ދާއިރާގެ މެންބަރު ޙުސްނީ މުބާރިކް ތާއިދުކުރެއްވިއެވެ. އެހެންކަމުން މިކަމުގައި މިނިސްޓްރީ އޮފް އެޑިއުކޭޝަން އިން ކަނޑައަޅުއްވާފައިވާ އުސޫލަކީ ކޮބާކަން ސާފުކުރެއްވުމަށް އިދާރީ މޭޒާ ޙަވާލުކުރެއްވިއެވެ.

ފަހު ކަމެއްގެ ގޮތުން، އިސްދޫ ދާއިރާގެ މެންބަރު އިސްމާއީލް ޝަފީޢު ހުށަހަޅުއްވާފައިވަނީ ދިވެހިރާއްޖޭގެ ރިސޯޓުތަކަށް ޒިޔާރަތްކުރާ ފަތުރުވެރިން އެ ރިސޯޓުތަކުގެ ކައިރީގައި ހުންނަ މީހުން ދިރިއުޅޭ ރަށްރަށުގައި ހިންގާ ގެސްޓްހައުސްތަކުން ފޯރުކޮށްދޭ އެކްސްކަރޝަންގެ ޚިދުމަތްތައް ރިސޯޓުތަކަށް އެނގުމަކާނުލައި ބޭނުންކުރަމުންދާތީ، އެފަދަ ޙާލަތްތަކުގައި ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރެއްވުމަށްޓަކައި އިތުރަށް ކުރެވިދާނެ ކަންކަން ބެލުމަށެވެ. މި ހުށަހެޅުއްވުމަށް މަނަދޫ ދާއިރާގެ މެންބަރު ޙުސްނީ މުބާރިކް ތާއިދުކުރެއްވުމުން މި މައްސަލައާ ގުޅޭގޮތުން މަޢުލޫމާތު ސާފުކުރެއްވުމަށްވެސް ނިންމެވިއެވެ.