މިއަދުގެ ބައްދަލުވުމުގައި ފުރަތަމަ ކަމަކަށް ކުރިއަށް ގެންދެވީ، ޤާނޫނު ނަމްބަރު 2021/9 (ކްލައިމެޓް އިމާޖެންސީ ޤާނޫނު) ތަންފީޒުކުރެވެމުންދާ މިންވަރާ ގުޅޭގޮތުން 19 ވަނަ މަޖިލީހުގެ ސަބް ކޮމިޓީން އެކުލަވާލައިފައިވާ ރިޕޯޓާމެދު މަޝްވަރާކުރުމެވެ. އެގޮތުން، އެ ރިޕޯޓާ މެދު މެންބަރުންގެ ޚިޔާލަށް ހުޅުވާލުމުން، އެ ރިޕޯޓުގެ 6 ވަނަ މާއްދާގެ ދަށުން ފާހަގަކޮށްފައިވާ 15 ނުކުތާގައި ބަޔާންކޮށްފައިވާ ކަންކަން މިހާރު ހާސިލުވެފައިވާ މިންވަރު ބެލުމަށް، އެ ރިޕޯޓު ކަމާ ގުޅޭ މިނިސްޓްރީއަށް ފޮނުވުމަށް ގެމަނަފުށި ދާއިރާގެ މެންބަރު އަސަދުﷲ ޝިހާބް ހުށަހެޅުއްވައި، ފުނަދޫ ދާއިރާގެ މެންބަރު މުޙައްމަދު މަމްދޫޙް ތާއީދުކުރެއްވިއެވެ. ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.

އެއަށްފަހު، އެހެނިހެންގެ ދަށުން ކުރިއަށްގެންދެވީ، ކޮމިޓީން މިހާރު ބަލަމުން އަންނަ މައްސަލައެއް ކަމަށްވާ ޔޫ އެންޑް މީ ރިސޯޓާ ގުޅޭގޮތުން ކޮމިޓީއަށް ލިބިފައިވާ ވިސްލްބްލޯވަރ މައްސަލައެވެ. އެގޮތުން، އެ ރިސޯޓުން ކުނި ނައްތާލުމުގައި ޢަމަލުކުރާ ގޮތުގެ މަޢުލޫމާތު ސާފުކުރުމަށް އެ ރިސޯޓަށް ޒިޔާރަތްކުރުމަށް ކޮމިޓީން ކުރިން ނިންމާފައިވާ ނިންމެވުމާ އެއްގޮތަށް އެ ރިސޯޓަށް ކޮމިޓީން ޒިޔާރަތްކުރާނެ ތާރީޚަކީ 23 ޖުލައި 2025 ކަމަށް ކަނޑައެޅުމަށާއި އެ ޒިޔާރަތުގައި ކޮމިޓީގެ ފަރާތުން ބައިވެރިވެވަޑައިގަންނަވާނީ މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު، މާފަންނު ހުޅަނގު ދާއިރާގެ މެންބަރު މުޙައްމަދު މުޞްޠަފާ އިބްރާހީމް އަދި ކެޔޮދޫ ދާއިރާގެ މުޙައްމަދު ނިއުޝާދު ކަމަށް ނިންމެވުމަށް ގެމަނަފުށި ދާއިރާގެ މެންބަރު އަސަދުﷲ ޝިހާބް ހުށަހެޅުއްވައި، ފުނަދޫ ދާއިރާގެ މެންބަރު މުޙައްމަދު މަމްދޫޙް ތާއީދުކުރެއްވިއެވެ.

ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.