މިއަދުގެ ބައްދަލުވުމުގައި ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އެކުލަވާލަންޖެހޭ ގަވާއިދުތަކާ ގުޅިގެން މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ ބޭފުޅުންނާއެކު މަޝްވަރާކުރައްވާފައިވެއެވެ. އެގޮތުން އެ މިނިސްޓްރީގެ ފަރާތުން، "ފަތުރުވެރިންނަށް މޫދު ކުޅިވަރު އަދި މޫދާ ގުޅުންހުރި އަދި ފެނުގައި ހިންގޭ އެކިއެކި ކުޅިވަރުތަކާއި ހަރަކާތްތައް އަދި އެކްސްކަރޝަން ކުޅިވަރުތަކުގެ ހަރަކާތްތަކުގެ ޚިދުމަތްދިނުމާ ގުޅޭ ގަވާއިދު" ގެ ގޮތުގައި އާ ގަވާއިދެއް އެކުލަވާލެއްވުމުގެ މަސައްކަތް ކުރައްވަމުންގެންދަވާކަމަށް ދަންނަވާފައިވާތީ، އެ ގަވާއިދުގައި ހިމެނިފައިވާ ކަންކަމާ ގުޅިގެން މަޝްވަރާކުރައްވާފައިވެއެވެ. އަދި އެ ގަވާއިދުގައި ހިމެނިފައިވާ ކަންކަމާއި އަދި ދިވެހިރާއްޖޭގެ ރިސޯޓުތަކަށް ޒިޔާރަތްކުރާ ފަތުރުވެރިން އެ ރިސޯޓުތަކުގެ ކައިރީގައި ހުންނަ މީހުން ދިރިއުޅޭ ރަށްރަށުގައި ހިންގާ ގެސްޓްހައުސްތަކުން ފޯރުކޮށްދޭ އެކްސްކަރޝަންގެ ޚިދުމަތްތައް ރިސޯޓުތަކަށް އެނގުމަކާނުލައި ބޭނުންކުރަމުންދާ ޙާލަތްތަކުގައި ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރެއްވުމަށްޓަކައި އިތުރަށް ކުރެވިދާނެ ކަންކަމާ ގުޅޭގޮތުންވެސް ވަނީ މަޝްވަރާކުރައްވާފައެވެ. އަދި "ފަތުރުވެރިންނަށް މޫދު ކުޅިވަރު އަދި މޫދާ ގުޅުންހުރި އަދި ފެނުގައި ހިންގޭ އެކި އެކި ކުޅިވަރުތަކާއި ހަރަކާތްތައް އަދި އެކްސްކަރޝަން ކުޅިވަރުތަކުގެ ހަރަކާތްތަކުގެ ޚިދުމަތްދިނުމާ ގުޅޭ ގަވާއިދު" ގެ ގޮތުގައި އެކުލަވާލާ އާ ގަވާއިދު ވަރަށް އަވަހަށް ނިންމައި ގެޒެޓްކުރެވޭނެކަމަށް މިނިސްޓްރީން ވަނީ މައުލޫމާތު ދެއްވާފައެވެ.