މިއަދުގެ ބައްދަލުވުމުގައި އެންމެ ފުރަތަމަ މޯލްޑިވްސް ކަރެކްޝަނަލް ސަރވިސްގެ މަދަނީ މުވައްޒަފުން ހުށަހަޅުއްވާފައިވާ ޕެޓިޝަނާ ގުޅޭގޮތުން ކޮމިޓީގެ މެންބަރުން މަޝްވަރާކުރެއްވިއެވެ. އެގޮތުން، މި ޕެޓިޝަނާ ގުޅޭގޮތުން މިނިސްޓްރީ އޮފް ފިނޭންސް އެންޑް ޕްލޭނިންގ އަދި މޯލްޑިވްސް ކަރެކްޝަނަލް ސަރވިސްގެ އިސް މުވައްޒަފުންނާ ބައްދަލުކޮށް ލިބުނު މަޢުލޫމާތުގެ އަލީގައި، ނޭޝަނަލް ޕޭ ކޮމިޝަނުން ދައުލަތުގެ މުވައްޒަފުންގެ މުސާރަ އެއްހަމަ ކުރުމުގެ މަސައްކަތް އެކި ފިޔަވަހިތަކަށް ބައްސަވައިގެން ކުރައްވަމުން ގެންދަވާކަމަށާއި، ފިސްކަލް ޙާލަތު ތަންދޭ މިންވަރަކުން އެކި ފަންނުތަކުގެ މުވައްޒަފުން އެ އޮނިގަނޑަށް ހިޖްރަކުރެވެމުންދާނެ ކަމަށާއި، އަދި އެ މަސައްކަތުގެ ތެރެއިން ޕެޓިޝަނުގައި ފާހަގަކުރައްވާފައިވާ މައްސަލައަށް ޙައްލެއް ލިބިގެންދާނެކަމަށް، މިނިސްޓްރީ އޮފް ފިނޭންސް އެންޑް ޕްލޭނިންގއިން މަޢުލޫމާތު ދެއްވާފައިވާތީ، އެކަން ޕެޓިޝަން ހުށަހެޅުއްވެވި ފަރާތްތަކަށް އެންގުމަށް ވައިކަރަދޫ ދާއިރާގެ މެންބަރު ޙުސައިން ޒިޔާދު ހުށަހެޅުއްވިއެވެ. މި ހުށަހެޅުއްވުމަށް މަޑަވެލި ދާއިރާގެ މެންބަރު މުޙައްމަދު ޝަމީޒް ތާއީދުކުރެއްވިއެވެ. އަދި މި ހުށަހެޅުއްވުމަށް ވޯޓަށް އެއްސެވުމުން އެވަގުތު ކޮމިޓީގައި ހާޒިރުވެވަޑައިގެން ތިއްބެވި މެންބަރުންގެ އިއްތިފާޤުން މި ހުށަހެޅުން ފާސްވެގެން ދިޔައެވެ. 

އެއަށްފަހު، ނުކުޅެދުންތެރިކަން ހުންނަ ކުދިންނަށް ޤާނޫނީ ގޮތުން ލިބިދޭންޖެހޭ ޢިނާޔަތްތައް ލިބުމުގައި އިޙުމާލުވެފައިވާތީ އެކަމާ ގުޅިގެން ހުށަހަޅުއްވާފައިވާ ޕެޓިޝަން ދިރާސާކުރެއްވިއެވެ. އެގޮތުން، މި ޕެޓިޝަނާ ގުޅޭގޮތުން ލިޔުމުން މަޢުލޫމާތު ހޯދުމަށް މިނިސްޓްރީ އޮފް ހެލްތަށް ސިޓީއެއް ފޮނުވުމަށް މަޑަވެލި ދާއިރާގެ މެންބަރު މުޙައްމަދު ޝަމީޒް ހުށަހެޅުއްވިއެވެ. މި ހުށަހެޅުއްވުމަށް ހިންނަވަރު ދާއިރާގެ މެންބަރު މުޙައްމަދު ޢަބްދުއްރަޙްމާން ތާއީދުކުރެއްވިއެވެ. އަދި މި ހުށަހެޅުއްވުމަށް ވޯޓަށް އެއްސެވުމުން އެވަގުތު ކޮމިޓީގައި ހާޒިރުވެވަޑައިގެން ތިއްބެވި މެންބަރުންގެ އިއްތިފާޤުން މި ހުށަހެޅުން ފާސްވެގެން ދިޔައެވެ. 

ދެން ކުރިއަށް ގެންދެވީ ކޭ-ޕާކް ރެސިޑެންސީސް މަޝްރޫޢުއާ ގުޅިގެން ދިގުލައިގެން ގޮސްފައިވާ އަދި ހައްލުނުވެ އޮތް ބޯހިޔާވަހިކަމުގެ މައްސަލައާއި ގުޅިގެން ހުށަހަޅާ ޕެޓިޝަން ދިރާސާކުރެއްވުމުގެ މަސައްކަތެވެ. އެގޮތުން، މި ޕެޓިޝަނުގައި ފާހަގަކުރައްވާ މައްސަލައާ ގުޅޭ ޤަރާރެއް ރައްޔިތުންގެ މަޖިލީހުގެ ގެދޮރުވެރިކަމުގެ ކޮމިޓީއަށް ފޮނުއްވާފައިވާތީ، އެކޮމިޓީން އެ މަސައްކަތްކޮށް ނިންމުމުން މި ޕެޓިޝަންގެ މަސައްކަތް ކުރިއަށް ގެންދިޔުމަށް މަޑަވެލި ދާއިރާގެ މެންބަރު މުޙައްމަދު ޝަމީޒް ހުށަހެޅުއްވިއެވެ. މި ހުށަހެޅުއްވުމަށް އުނގޫފާރު ދާއިރާގެ މެންބަރު އިބްރާހީމް ޝިފާޒް ތާއީދުކުރެއްވިއެވެ. އަދި މި ހުށަހެޅުއްވުމަށް ވޯޓަށް އެއްސެވުމުން އެވަގުތު ކޮމިޓީގައި ހާޒިރުވެވަޑައިގެން ތިއްބެވި މެންބަރުންގެ އިއްތިފާޤުން މި ހުށަހެޅުން ފާސްވެގެން ދިޔައެވެ. 

އެންމެ ފަހު ކަމެއްގެ ގޮތުގައި، ސަރުކާރުން ފޯރުކޮށްދީފައިވާ ދަރިވަރުންގެ ލޯނު ސްކީމްގެ ދަށުން ސްޕެއިންގައި ކިޔަވަމުންދާ އެންމެހާ ދަރިވަރުންނަށް ދިމާވެފައިވާ ދަތިތަކަށް ހައްލު ހޯދައިދިނުމަށް ގޮވާލާ ހުށަހަޅާ ޕެޓިޝަން ދިރާސާކުރެއްވިއެވެ. އެގޮތުން، މި ޕެޓިޝަނުގައި ފާހަގަކުރައްވާފައިވާ މައްސަލައާ ގުޅޭ އަދާހަމަ މަޢުލޫމާތު ހޯދުމަށް މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓަށް ސިޓީއެއް ފޮނުވުމަށް ވައިކަރަދޫ ދާއިރާގެ މެންބަރު ޙުސައިން ޒިޔާދު ހުށަހެޅުއްވިއެވެ. މި ހުށަހެޅުއްވުމަށް ކޮމަންޑޫ ދާއިރާގެ މެންބަރު މުޙައްމަދު އިބްރާހީމް ތާއީދުކުރެއްވިއެވެ. އަދި މި ހުށަހެޅުއްވުމަށް ވޯޓަށް އެއްސެވުމުން އެވަގުތު ކޮމިޓީގައި ހާޒިރުވެވަޑައިގެން ތިއްބެވި މެންބަރުންގެ އިއްތިފާޤުން މި ހުށަހެޅުން ފާސްވެގެން ދިޔައެވެ.