Committee Meeting - People's Majlis of Maldives

ޚުލާސާ

މިއަދުގެ ބައްދަލުވުމުގައި ކުރިއަށް ގެންގޮސްފައިވަނީ، ސަރުކާރުގެ ފަރާތުން މާފަންނު މެދު ދާއިރާގެ މެންބަރު އަސްމާ ރަޝީދު ހުށަހަޅުއްވާފައިވާ ބޯހިޔާވަހިކަމުގެ ބިލު ދިރާސާކުރެއްވުމުގެ މަސައްކަތެވެ. އެގޮތުން ބިލަށް ހުށަހަޅުއްވާފައިވާ ޚިޔާލުތަކަށް އެޓަރނީ ޖެނެރަލްގެ އޮފީހުގެ ލަފާފުޅެއް ލިބިފައި ނުވާތީ، ބިލުގެ މާއްދާތައް ވަކިވަކިން ރެކޯޑުގައި ކިޔުމަށް މެންބަރަކު ހުށަހެޅުއްވުމުން، ބިލުގެ ފުރަތަމަ މާއްދާއިން ފެށިގެން 8 ވަނަ މާއްދާގެ ނިޔަލަށް އިއްވާފައިވެއެވެ. ނަމަވެސް ބިލުގެ މާއްދާތައް ކިޔަމުންދާއިރު އެ ބާބަކަށް ނުވަތަ އެ މާއްދާއަކަށް ހުށަހަޅުއްވާފައިވާ ޚިޔާލުތަކާ ގުޅޭގޮތުން މަޝްވަރާކުރެއްވުމަށް މެންބަރުންގެ ބޭނުންފުޅުވާތީ، އެ ބިލަށް ހުށަހަޅުއްވާފައިވާ ޚިޔާލުތަކާ ގުޅޭގޮތުން އެޓަރނީ ޖެނެރަލްގެ އޮފީހުގެ ލަފާފުޅެއް ކޮމިޓީއަށް ލިބުމުން ބިލު ދިރާސާކުރެއްވުމުގެ މަސައްކަތް ކުރިއަށްގެންދިއުމަށް ވިލިމާލެ ދާއިރާގެ މެންބަރު މުޙައްމަދު އިސްމާޢީލް ހުށަހަޅުއްވައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ތާއީދުކުރެއްވިއެވެ.

އެހެންކަމުން، ބޯހިޔާވަހިކަމުގެ ބިލަށް ހުށަހަޅުއްވާފައިވާ ޚިޔާލުތަކަށް އެޓަރނީ ޖެނެރަލްގެ އޮފީހުގެ ލަފާފުޅު ކޮމިޓީއާ ޙިއްޞާކުރެއްވުމުން ބިލު ދިރާސާކުރެއްވުމުގެ މަސައްކަތް ކޮމިޓީން ކުރިއަށް ގެންދިއުމަށް ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ނިންމެވިއެވެ.