މިއަދުގެ ބައްދަލުވުމުގައި ފުރަތަމަ ކުރިއަށް ގެންދެވީ، ޤާނޫނު ނަންބަރު 8/2020 (ފެނާއި ނަރުދަމާގެ ޤާނޫނު) އަށް ... ވަނަ އިޞްލާޙު ގެނައުމުގެ ބިލާ ގުޅޭގޮތުން ކަމާގުޅޭ މުއައްސަސާތަކާ ބައްދަލުކުރެއްވުމެވެ. އެގޮތުން، މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް، ޔުޓިލިޓީ ރެގިއުލޭޓަރީ އޮތޯރިޓީ، އެންވަޔަރަންމަންޓަލް ޕްރޮޓެކްޝަން އޭޖެންސީ، މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް، ލޯކަލް ގަވަރންމަންޓް އޮތޯރިޓީ، ފެނަކަ ކޯޕަރޭޝަން ލިމިޓެޑް، މާލޭ ވޯޓަރ އެންޑް ސުވަރޭޖް ކޮމްޕެނީ ޕވޓ ލޓޑގެ ބޭފުޅުން އެ އިޞްލާޙުތަކާ ގުޅޭގޮތުން ދެކިވަޑައިގަންނަވާ ކަންކަން ފާހަގަކުރެއްވިއެވެ.

އެ ބިލާ ގުޅޭގޮތުން، ކަމާގުޅޭ މުއައްސަސާތަކާއެކު ބައްދަލުކުރެއްވި ބައި ނިންމަވާލެއްވުމަށްފަހު ދެން، ކޮމިޓީން ކުރިއަށް ގެންދެވީ އެ ބިލު ދިރާސާކުރެއްވުމުގެ މަސައްކަތެވެ. އެގޮތުން، އެ ބިލުގައި ހިމެނޭ މާއްދާތައް ވަކިވަކިން ކޮމިޓީގައި އިއްވެވިއެވެ. އަދި އެޓަރނީ ޖެނެރަލްގެ އޮފީހުން ބިލުގެ 58 ވަނަ މާއްދާގެ (ހ) އަށް ހުށަހަޅުއްވާފައިވާ އިޞްލާޙު ކޮމިޓީއަށް އިއްވެވުމުން، އެ އިޞްލާޙު ހުށަހަޅުއްވާފައިވާ ގޮތަށް، 58 ވަނަ މާއްދާގެ (ހ) "މި ޤާނޫނުގައި ކަނޑައެޅިގެން އެހެން ގޮތަކަށް ބަޔާންކޮށްފައި ނުވާހާ ހިނދަކު، މި ޤާނޫނުގެ ދަށުން ހަދަންޖެހޭ ގަވާއިދުތައް ހަދާނީ މިނިސްޓްރީންނެވެ." މިފަދައިން އިޞްލާޙު ކުރެއްވުމަށް މާފަންނު ހުޅަނގު ދާއިރާގެ މެންބަރު މުޙައްމަދު މުޞްޠަފާ އިބްރާހީމް ހުށަހަޅުއްވައި ވިލުފުށި ދާއިރާގެ މެންބަރު ޙަސަން ވަޙީދު ތާއީދުކުރެއްވިއެވެ.

ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން މި ހުށަހެޅުއްވުން ފާސްވިއެވެ.

އެއަށްފަހު، ޔުޓިލިޓީ ރެގިއުލޭޓަރީ އޮތޯރިޓީން ބިލަށް ހުށަހަޅުއްވާފައިވާ އިޞްލާޙު ކޮމިޓީއަށް އިއްވަވާފައިވެއެވެ. އަދި ޔުޓިލިޓީ ރެގިއުލޭޓަރީ އޮތޯރިޓީން ހުށަހަޅުއްވާފައިވާ ގޮތަށް 14 ވަނަ މާއްދާއެއްގެ ގޮތުގައި މާއްދާއެއް އިތުރުކޮށް "މި ޤާނޫނުން ބުނެވިދިޔަ އިޞްލާޙުތަކާ ގުޅިގެން އެ ޤާނޫނުގެ ދަށުން އެކުލަވާލާފައިވާ ގަވާއިދުތަކާއި އުސޫލުތަކަށް ގެންނަންޖެހޭ އިޞްލާޙުތަކާއި އަލަށް އެކުލަވާލަންޖެހޭ ގަވާއިދުތަކާއި އުސޫލުތައް މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 6 މަސް ދުވަހުގެ ތެރޭގައި އެކުލަވާލާ ދިވެހި ސަރުކާރުގެ ގެޒެޓުގައި ޝާއިޢުކުރަންވާނެއެވެ." މިފަދައިން މާއްދާއެއް އިތުރުކޮށް އިޞްލާޙުކުރެއްވުމަށް މާފަންނު ހުޅަނގު ދާއިރާގެ މެންބަރު މުޙައްމަދު މުޞްޠަފާ އިބްރާހީމް ހުށަހަޅުއްވައި ވިލުފުށި ދާއިރާގެ މެންބަރު ޙަސަން ވަޙީދު ތާއީދުކުރެއްވިއެވެ.

ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން މި ހުށަހެޅުއްވުން ފާސްވިއެވެ.

ކޮމިޓީން އިތުރަށް މަޝްވަރާކުރެއްވުމަށްފަހު، އެ މާއްދާގެ މުއްދަތު 6 މަސްދުވަހުން 3 މަސް ދުވަހަށް ކުރުކުރެއްވުމަށް ބައެއް މެންބަރުން ޚިޔާލު ފާޅުކުރެއްވުމުން، މެންބަރުންނަށް އެދިވަޑައިގަންނަވާ ގޮތެއް ހުށަހެޅުއްވުމަށް ހުޅުވާލި ފުރުޞަތުގައި، އެ ބިލަށް އިތުރުކުރުމަށް ކޮމިޓީން ފާސްކުރައްވާފައިވާ 14 ވަނަ މާއްދާ އަންނަނިވި ގޮތަށް އިޞްލާޙުކުރެއްވުމަށް ތިނަދޫ ދެކުނު ދާއިރާގެ މެންބަރު މުޙައްމަދު އަލްސަން އަޙްމަދު ހުށަހަޅުއްވައި، ގެމަނަފުށި ދާއިރާގެ މެންބަރު އަސަދުﷲ ޝިހާބް ތާޢީދުކުރެއްވިއެވެ. "ބިލުގެ 14. މި ޤާނޫނުން ބުނެވިދިޔަ ޤާނޫނަށް ގެނެވޭ އިޞްލާޙުތަކާ ގުޅިގެން އެ ޤާނޫނުގެ ދަށުން އެކުލަވާލާފައިވާ ގަވާއިދުތަކާއި އުޞޫލުތަކަށް ގެންނަންޖެހޭ އިޞްލާޙުތަކާއި، އަލަށް އެކުލަވާލަންޖެހޭ ގަވާއިދުތަކާއި އުޞޫލުތައް، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 30 (ތިރީސް) ދުވަހުގެ ތެރޭގައި އެކުލަވާލައި، ދިވެހިސަރުކާރުގެ ގެޒެޓުގައި ޝާއިޢުކުރަންވާނެއެވެ." 

ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން މި ހުށަހެޅުއްވުން ފާސްވިއެވެ.

ބިލުގެ ހުރިހާ މާއްދާއެއް ކޮމިޓީއަށް އިއްވަވާ ނިންމެވުމަށްފަހު، ކޮމިޓީން ބިލަށް ގެންނެވި އިޞްލާޙުތަކާއެކު ކޮމިޓީން މުޅި ބިލު ފާސްކުރެއްވުމަށް މާފަންނު ހުޅަނގު ދާއިރާގެ މެންބަރު މުޙައްމަދު މުޞްޠަފާ އިބްރާހީމް ހުށަހަޅުއްވައި ވިލުފުށި ދާއިރާގެ މެންބަރު ޙަސަން ވަޙީދު ތާޢީދުކުރެއްވިއެވެ.

ވޯޓުގައި ބައިވެރިވެވަޑައިގެންނެވި މެންބަރުންގެ އަޢުލަބިއްޔަތުން މި ހުށަހެޅުއްވުން ފާސްވިއެވެ.