މިއަދުގެ ބައްދަލުވުމުގައި، ސިފައިންގެ ކޯޕަރޭޓިވް ސޮސައިޓީ (ސިފްކޯ) ގެ ޚާއްޞަ އޮޑިޓް ރިޕޯޓާ ގުޅޭގޮތުން މަޝްވަރާކުރެއްވިއެވެ. އެގޮތުން، އެ އޮޑިޓް ރިޕޯޓުގައި ފާހަގަކުރައްވާފައިވާ މައްސަލަތައް ޙައްލުކުރެއްވުމާ ގުޅޭގޮތުން ސިފައިންގެ ކޯޕަރޭޓިވް އިން ދެއްވާފައިވާ ޖަވާބުތައް އަދި ކޮމިޓީން ހުށަހެޅުއްވި ރިކޮމެންޑޭޝަންތައް ހިމެނޭ ރިޕޯޓެއް އެކުލަވާލުމަށްފަހު، އެ ރިޕޯޓު މާލިއްޔަތު ކޮމިޓީއަށް ފޮނުއްވުމަށާއި، އެ ރިޕޯޓުގައި ފާހަގަކުރައްވާފައިވާ މައްސަލަތަކާ ގުޅޭގޮތުން މާލިއްޔަތު ކޮމިޓީން ސިފައިންގެ ކޯޕަރޭޓިވްއާ ބައްދަލުކުރުމަށް ސަބް-ކޮމިޓީއަށް ފެންނަކަމަށް ރިކޮމެންޑޭޝަނެއް ރިޕޯޓުގައި ހިމެނުމަށް ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި، ހެންވޭރު އުތުރު ދާއިރާގެ މެންބަރު އަޙްމަދު އައިފާން ތާޢީދުކުރެއްވި ހުށަހެޅުން އިއްތިފާޤުން ފާސްވިއެވެ.

އެއަށްފަހު، ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި، ހެންވޭރު އުތުރު ދާއިރާގެ މެންބަރު އަޙްމަދު އައިފާން ތާޢީދުކުރެއްވި ތިރީގައިވާ ހުށަހެޅުންތައް ކޮމިޓީގެ އިއްތިފާޤުން ފާސްވިއެވެ.

1. އިންފޮމޭޝަން ކޮމިޝަނަރުގެ އޮފީހުގެ 2019، 2020، 2021، 2022 އަދި 2023 ވަނަ އަހަރުގެ އޮޑިޓް ރިޕޯޓުތަކުގައި އޮޑިޓަރ ޖެނެރަލް އެއްވެސް މައްސަލައެއް ފާހަގަކުރައްވާފައިނުވާތީ، އެ ރިޕޯޓުތައް ފައިލްކުރުމަށް.

2. އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުގެ 2022 އަދި 2023 ވަނަ އަހަރުގެ އޮޑިޓް ރިޕޯޓުތަކުގައި އޮޑިޓަރ ޖެނެރަލް އެއްވެސް މައްސަލައެއް ފާހަގަކުރައްވާފައި ނުވާތީ، އެ ރިޕޯޓުތައް ފައިލްކުރުމަށް.

3. ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑްގެ 2012، 2013، 2014 އަދި 2015 ގައި އޮޑިޓަރ ޖެނެރަލްގެ އޮފީހުން ފާހަގަކުރައްވާފައިވާ އެކައުންޓިންގ ސްޓޭންޑަރޑްގެ މައްސަލަތައް ހައްލުކުރައްވާފައިވާކަމަށް އެ ކޯޕަރޭޝަނުން މަޢުލޫމާތު ދެއްވާފައިވާތީއާއި، އެ ކޯޕަރޭޝަންގެ 2016، 2017، 2018، 2019، 2020 އަދި 2021 ވަނަ އަހަރުގެ އޮޑިޓް ރިޕޯޓުތަކުގައި އަންކޮލިފައިޑް އޮޕީނިއަންއެއް ދެއްވާފައިވާތީ، ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑްގެ އޮޑިޓް ރިޕޯޓުތައް ފައިލްކުރުމަށް.

4. އެޓަރނީ ޖެނެރަލްގެ އޮފީހުގެ 2015، 2017، އަދި 2018 ވަނަ އަހަރުގެ އޮޑިޓް ރިޕޯޓުގައި ފާހަގަކުރައްވާފައިވާ ހަރުމުދަލުގެ ރަޖިސްޓަރީ މާލިއްޔަތުގެ ގަވާއިދާ އެއްގޮތަށް ބަލަހައްޓާފައިނުވާ މައްސަލަ ހައްލުކުރައްވާފައިވާކަމަށް އެ އޮފީހުން މަޢުލޫމާތު ދެއްވާފައިވާތީއާއި، އެ އޮފީހުގެ 2018، 2019، 2020، 2021، 2022 އަދި 2023 ވަނަ އަހަރުގެ އޮޑިޓް ރިޕޯޓުތަކުގައި އަންކޮލިފައިޑް އޮޕީނިއަންއެއް ދެއްވާފައިވާތީ، އެޓަރނީ ޖެނެރަލްގެ އޮފީހުގެ އޮޑިޓް ރިޕޯޓުތައް ފައިލްކުރުމަށް.