މިއަދުގެ ބައްދަލުވުމުގައި، ޕްރައިވެޓް ހޮސްޕިޓަލްތަކުން އާސަންދަ އަދި އެންސްޕާގެ ދަށުން ދީފައިވާ ޚިދުމަތްތަކަށް ފައިސާ ނުލިބި ގިނަ ދުވަސްތަކެއް ހޭދަވާތީ، ޞިއްޙީ ޚިދުމަތް ދިނުމުގައި އެ ހޮސްޕިޓަލްތަކަށް ގޮންޖެހުންތަކާ ކުރިމަތިލާންޖެހޭކަމަށް ބަޔާންކޮށް ހުށަހަޅާފައިވާ މައްސަލައާއި، ޞިއްޙީ ވެލްފެއަރގެ ޚިދުމަތް ދިނުމުގެ ނިޒާމުގައި ހުރި އިތުރު މައްސަލަތަކާއި، އަދި އޮފީސް ޢިމާރާތެއް ބިނާކުރުމަށް އާސަންދަ ކޮމްޕެނީ ލިމިޓެޑުން ނޯތް ކޯސްޓް ކޮންޓްރެކްޓަރސް ޕްރައިވެޓް ލިމިޓެޑާއެކު ވެފައިވާ އެއްބަސްވުމާ އެއްގޮތަށް އެ މަސައްކަތް ކުރިއަށްނުދާ މައްސަލައާ ގުޅޭގޮތުން ކޮމިޓީން ޑްރާފްޓްކޮށްފައިވާ ރިޕޯޓާމެދު މަޝްވަރާކުރެއްވިއެވެ. އެގޮތުން، ރިޕޯޓު އިތުރަށް ދިރާސާކުރުމަށް މެންބަރުންނަށް ވަގުތު ދިނުމަށްފަހު އެހެން ބައްދަލުވުމެއްގައި މި ރިޕޯޓުގެ މަސައްކަތް ކުރިއަށްގެންދިއުމަށް ނިންމެވިއެވެ.

ސިފައިންގެ ކޯޕަރޭޓިވް ސޮސައިޓީ (ސިފްކޯ) ގެ ޚާއްޞަ އޮޑިޓް ރިޕޯޓު ސަބް-ކޮމިޓީ 1 އިން ދިރާސާކޮށް ނިންމިގޮތުގެ ރިޕޯޓާމެދު މަޝްވަރާކުރެއްވުމަށްފަހު، ކޮމިޓީން އޮޑިޓަރ ޖެނެރަލްގެ އޮފީހަށް ރިކުއެސްޓްކޮށްފައިވާ ސިފްކޯގެ ހައުސިންގ ޕްރޮޖެކްޓާގުޅޭ ޚާއްޞަ އޮޑިޓް ކުރައްވައި އޮޑިޓަރ ޖެނެރަލްގެ އޮފީހުން އޮޑިޓް ރިޕޯޓު ފޮނުއްވުމުން، އެ އޮޑިޓް ރިޕޯޓާއެކު މި ރިޕޯޓު ދިރާސާކުރުމުގެ މަސައްކަތް ކުރިއަށް ގެންދިއުމަށް ފެންނަކަމަށް ގެމަނަފުށި ދާއިރާގެ މެންބަރު އަސަދުﷲ ޝިހާބް ހުށަހަޅުއްވައި، ގުރައިދޫ ދާއިރާގެ މެންބަރު ހަނާން މުޙައްމަދު ރަޝީދު ތާޢީދުކުރެއްވި ހުށަހެޅުން ހާޒިރުވެ ތިއްބެވި މެންބަރުންގެ އިއްތިފާޤުން ފާސްވިއެވެ.

އެއަށްފަހު، 7,000 ސޯޝަލް ހައުސިންގ ޔުނިޓު މަޝްރޫޢުގެ ދަށުން ހައުސިންގ ޔުނިޓަކަށް ޖެހޭ ޖުމުލަ އަގާއި މަހުން މަހަށް ދައްކަންޖެހޭ ޢަދަދު ހިސާބުކޮށް ކަނޑައަޅާފައިވާ ގޮތުގެ ރިވިއު ރިޕޯޓު ސަބް-ކޮމިޓީ 1 އިން ދިރާސާކޮށް ނިންމިގޮތުގެ ރިޕޯޓާމެދު މަޝްވަރާކުރެއްވުމަށްފަހު، ހައުސިންގ ޑިވެލޮޕްމަންޓް ކޯޕަރޭޝަނުން އެ ރިޕޯޓާގުޅޭ އިތުރު މަޢުލޫމާތު ހޯދުމަށް ނިންމެވިއެވެ.

އޭގެ އިތުރުން، އޮޑިޓް ރިޕޯޓުތައް ދިރާސާކުރެއްވުމަށް އެކުލަވާލައްވާފައިވާ މާލިއްޔަތު ކޮމިޓީގެ ސަބް-ކޮމިޓީ 1 އިން ފައިލްކުރުމަށް ނިންމާފައިވާ އަންނިނިވި އޮޑިޓް ރިޕޯޓުތައް، ސަބް-ކޮމިޓީގެ ނިންމުމާ އެއްގޮތަށް ފައިލްކުރުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވި ހުށަހެޅުން ވޯޓުގެ ވަގުތުގައި ހާޒިރުވެ ތިއްބެވި މެންބަރުންގެ އިއްތިފާޤުން ފާސްވިއެވެ.

1. އިންފޮމޭޝަން ކޮމިޝަނަރުގެ އޮފީހުގެ 2019، 2020، 2021، 2022 އަދި 2023 ވަނަ އަހަރުގެ އޮޑިޓް ރިޕޯޓުތައް.
2. އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުގެ 2022 އަދި 2023 ވަނަ އަހަރުގެ އޮޑިޓް ރިޕޯޓުތައް.
3. ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑްގެ 2012، 2013، 2014، 2015، 2016، 2017، 2018، 2019، 2020 އަދި 2021 ވަނަ އަހަރުގެ އޮޑިޓް ރިޕޯޓުތައް.
4. އެޓަރނީ ޖެނެރަލްގެ އޮފީހުގެ 2015، 2017، 2018، 2019، 2020، 2021، 2022 އަދި 2023 ވަނަ އަހަރުގެ އޮޑިޓް ރިޕޯޓުތައް.
5. ކުޅުދުއްފުށި ހާބަރ އެކްސްޕޭންޝަން ޕްރޮޖެކްޓުގެ 2018، 2019، 2020 އަދި 2021 ވަނަ އަހަރުގެ އޮޑިޓް ރިޕޯޓުތައް.
6. "ކޮވިޑް-19 އެމަރޖެންސީ ރެސްޕޮންސް ޕްރޮޖެކްޓް" (ގްރާންޓް ނަންބަރު:0687-MLD) ގެ އޮޑިޓް ރިޕޯޓު.
7. "ކޮވިޑް-19 އެމަރޖެންސީ ރެސްޕޮންސް ޕްރޮޖެކްޓް" (ގްރާންޓް ނަންބަރު:076-MLD) ގެ އޮޑިޓް ރިޕޯޓު.
8. ކޮވިޑް-19 އާ ގުޅިގެން 2020 ވަނަ އަހަރުގެ ފުރަތަމަ ދެ ކުއަޓަރގައި މިނިސްޓްރީ އޮފް ފޮރިން އެފެއާޒުން ކޮށްފައިވާ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓު.
9. ކޮވިޑް-19 އާ ގުޅިގެން 2020 ވަނަ އަހަރުގެ ފުރަތަމަ ދެ ކުއަޓަރގައި މޯލްޑިވްސް ނޭޝަނަލް ޑިފެންސް ފޯސްއިން ކޮށްފައިވާ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓު.
10. ކޮވިޑް-19އާ ގުޅިގެން 2020 ވަނަ އަހަރުގެ ތިންވަނަ ކުއަރޓަރގައި މޯލްޑިވްސް ނޭޝަނަލް ޑިފެންސް ފޯސްއިން ކޮށްފައިވާ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓު.
11. ކޮވިޑް-19 އާ ގުޅިގެން 2020 ވަނަ އަހަރުގެ ތެރޭގައި މޯލްޑިވްސް ޕޮލިސް ސަރވިސްއިން ކޮށްފައިވާ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓު.
12. ކޮވިޑް-19 އާ ގުޅިގެން ފްރަންޓްލައިންގައި މަސައްކަތްކުރި ފަރާތްތަކަށް ދިން އެލަވަންސްގެ ކޮމްޕްލަޔަންސް އޮޑިޓް ރިޕޯޓު.

އެއަށްފަހު، ކޮމިޓީއަށް ހުށަހެޅިފައިވާ އިންޝުއަރެންސްގެ ބިލު ދިރާސާކުރެއްވިއެވެ. އެގޮތުން،

ބިލުގެ 21 ވަނަ މާއްދާގެ (ރ) އަށް ގިނަވެގެން 12 މަސްދުވަހުގެ މުއްދަތެއް އިތުރުކުރުމަށްފަހު، އެ މާއްދާ އަންނަނިވި ގޮތަށް އިޞްލާޙު ކުރުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާޢީދުކުރެއްވި ހުށަހެޅުން ހާޒިރުވެ ތިއްބެވި މެންބަރުންގެ އިއްތިފާޤުން ފާސްވިއެވެ

"އިންޝުއަރެންސް ކުންފުންޏެއްގެ ލައިސަންސް ބާޠިލުކޮށްފިނަމަ، އަދި އެފަރާތުގެ އެއްވެސް ޕޮލިސީހޯލްޑަރަކަށް ދޭންޖެހޭ ފައިސާއެއް ނެތްނަމަ ނުވަތަ ޕޮލިސީހޯލްޑަރުންނަށް ދޭންޖެހޭ ފައިސާ ދައްކާ ނިމިފައިވާނަމަ، ފައިސާ ދައްކާ ނިންމާ ތާރީޚުން ފެށިގެން ގިނަވެގެން 12 (ބާރަ) މަސްދުވަހުގެ ތެރޭގައި، ސެކިއުރިޓީ ޑިޕޮސިޓްގެ ގޮތުގައި ބާކީހުރި ފައިސާ އެފަރާތަށް އޮތޯރިޓީން ދޭންވާނެއެވެ."

އޭގެ އިތުރުން، އިންޝުއަރެންސްގެ ބިލަށް ގެނެވުނު އިޞްލާޙުތަކަށްފަހު، ބިލު ކޮމިޓީން ފާސްކުރުމަށް ހުޅުވާލި ފުރުޞަތުގައި، ބިލަށް ހުށަހެޅުނު އިޞްލާޙުތަކާއެކު މުޅި ބިލު ފާސްކުރުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވި ހުށަހެޅުން ހާޒިރުވެ ތިއްބެވި މެންބަރުންގެ އިއްތިފާޤުން ބިލު ފާސްވިއެވެ.

އެހެނިހެން ކަންތައްތަކުގެ ތެރެއިން، މޯލްޑިވްސް ޕޯޓްސް ލިމިޓެޑްގެ ހިޔާ މަޝްރޫޢުއާ ގުޅޭގޮތުން، އެ މަޝްރޫޢުގެ އެކިއެކި މަސައްކަތްތައް ކުރުމަށް ޙަވާލުކުރެވުނު ކޮންޓްރެކްޓަރުންނަށް އެ ކުންފުނިން ދައްކަވަންޖެހޭ ފައިސާގެ ތެރެއިން މިހާތަނަށް ދައްކާފައިނުވާ ފައިސާގެ ތަފްޞީލާއި، ޕްރޮޖެކްޓްގެ ދަށުން ޢިމާރާތްކުރި ފްލެޓުތައް އެ ކުންފުނީގެ މުވައްޒަފުންނަށް ދިނުމުގައި ގެންގުޅުނު އުސޫލާގުޅޭ މަޢުލޫމާތު އެ ކުންފުނިން ހޯދުމަށް ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި، ފުނަދޫ ދާއިރާގެ މެންބަރު މުޙައްމަދު މަމްދޫޙް ތާޢީދުކުރެއްވި ހުށަހެޅުން ވޯޓުގެ ވަގުތުގައި ހާޒިރުވެ ތިއްބެވި މެންބަރުންގެ އިއްތިފާޤުން ފާސްވިއެވެ.