Committee Meeting - People's Majlis of Maldives

ޚުލާސާ

މިއަދުގެ ބައްދަލުވުމުގައި ރައްޔިތުންގެ މަޖިލީހުގެ ގަވާއިދުގެ 272 ވަނަ މާއްދާގެ (ނ) ގައިވާ ގޮތުގެމަތިން، ރައްޔިތުންގެ މަޖިލީހުގެ ގަވާއިދުގެ 51 ވަނަ ބާބަށް އިޞްލާޙު ގެނައުމަށް ރައްޔިތުންގެ މަޖިލީހުގެ ރައީސް ހުށަހަޅުއްވާފައިވާ މައްސަލަ ކޮމިޓީން ދިރާސާކުރެއްވިއެވެ.

އެގޮތުން، ރައްޔިތުންގެ މަޖިލީހުގެ ގަވާއިދުގެ 51 ވަނަ ބާބަށް އިޞްލާޙު ގެނައުމަށް ރައްޔިތުންގެ މަޖިލީހުގެ ރައީސް ހުށަހަޅުއްވާފައިވާ އިޞްލާޙަށް ހުށަހެޅުނު އިތުރު 3 އިޞްލާޙާއި، އިދާރީ މޭޒުން ގެންނެވި އިމުލާ ކުށްތަކާއި އެއްކޮށް، މުޅި ބާބަށް ގެނެވުނު ހުރިހާ އިޞްލާޙުތަކާއެކު 51 ވަނަ ބާބު އިޞްލާޙުކުރުމަށް ފެންނަކަމަށް އިސްދޫ ދާއިރާގެ މެންބަރު އިސްމާޢީލް ޝަފީޢު ހުށަހެޅުއްވިއެވެ. މި ހުށަހެޅުއްވުމަށް ހެންވޭރު ދެކުނު ދާއިރާގެ މެންބަރު ޙުސައިން އިމްރާން ލަޠީފް ތާއީދުކުރެއްވިއެވެ. އަދި ވޯޓަށް އެއްސެވުމުން ކޮމިޓީގެ ބައްދަލުވުމަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވެގެން ދިޔައެވެ.

މީގެ އިތުރުން، މި އިޞްލާޙު މިގޮތަށް ފާސްވެގެން ދިޔުމާއެކު މިކަމުގައި ނާޖާއިޒު ފައިދާ ނަގާނެ ފަރާތްތައްވެސް އުޅޭނެކަމާއި، އެހެންކަމުން، ސޮއި ފޯޖުކޮށްފައިވާ ހާލަތްތަކުގައި ޢަމަލުކުރާނެ ގޮތެއް ނުވަތަ މަޖިލީހުން ކަނޑައަޅާނެ އުޞޫލެއް އޮންނަންވާނެކަމަށް ހެންވޭރު ދެކުނު ދާއިރާގެ މެންބަރު ޙުސައިން އިމްރާން ލަޠީފް ފާހަގަކުރެއްވިއެވެ.