މި ބައްދަލުވުމުގައި ފުރަތަމަ ކުރިއަށް ގެންދެވީ ރައްޔިތުންގެ މަޖިލީހުގެ ގަވާއިދުގެ 153 ވަނަ މާއްދާގައިވާ ގޮތުގެމަތިން ކޮމިޓީގެ މުޤައްރިރު އަދި ނައިބު މުޤައްރިރު އިންތިޚާބުކުރުމުގެ މަސައްކަތެވެ. ބައްދަލުވުން ފެއްޓެވިއިރު ރިޔާސަތު ބެލެހެއްޓެވީ ލީގަލް އޮފިސަރ ފަރުހަތު ޙަބީބުއެވެ. ކޮމިޓީގެ މުޤައްރިރުކަމަށް މެންބަރެއްގެ ނަން ހުށަހެޅުއްވުމަށް މެންބަރުންނަށް ފުރުޞަތު ހުޅުވާލުމާއެކު، ވިލިނގިލި ދާއިރާގެ މެންބަރު ޢާޒިމް ޢަބްދުލްޢަޒީޒް ހުށަހަޅުއްވައި، ތޮއްޑޫ ދާއިރާގެ މެންބަރު ޙުސައިން ސަމީރު ތާއީދުކުރެއްވީ، ހޯރަފުށި ދާއިރާގެ މެންބަރު ޢަލީ މޫސާގެ ނަންފުޅެވެ. އެ ހުށަހެޅުއްވުމަށް ވޯޓަށް އެއްސެވުމުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވެފައިވެއެވެ.

އެ ހުށަހެޅުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.

އެއަށްފަހު ކޮމިޓީގެ ނައިބު މުޤައްރިރުކަމަށް މެންބަރެއްގެ ނަން ހުށަހެޅުއްވުމަށް މެންބަރުންނަށް ފުރުޞަތު ހުޅުވާލުމާއެކު، ހޯރަފުށި ދާއިރާގެ މެންބަރު ޢަލީ މޫސާ ހުށަހަޅުއްވައި ތޮއްޑޫ ދާއިރާގެ މެންބަރު ޙުސައިން ސަމީރު ތާއީދުކުރެއްވީ ވިލިނގިލި ދާއިރާގެ މެންބަރު ޢާޒިމް ޢަބްދުލްޢަޒީޒް ގެ ނަންފުޅެވެ. އެ ހުށަހެޅުއްވުމަށް ވޯޓަށް އެއްސެވުމުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވެފައިވެއެވެ.

އެ ހުށަހެޅުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.

އެއަށްފަހު ކޮމިޓީގެ މުޤައްރިރު ހޯރަފުށި ދާއިރާގެ މެންބަރު ޢަލީ މޫސާ ރިޔާސަތާ ހަވާލުވެވަޑައިގެންނެވިއެވެ.

އެއަށްފަހު ކޮމިޓީގައި މަޝްވަރާކުރައްވާފައިވަނީ ކޮމިޓީއަށް ދިރާސާކުރުމަށް ފޮނުއްވި އަހަރީ ރިޕޯޓްތައް ދިރަސާކުރެއްވުމުގެ މަސައްކަތް ކުރިއަށްގެންދަވާނެ ގޮތެއް ކަނޑައެޅުމާ ގުޅޭގޮތުންނެވެ. މެންބަރުންގެ މަޝްވަރާކުރެއްވުމަށްފަހު ވިލިނގިލި ދާއިރާގެ މެންބަރު ޢާޒިމް ޢަބްދުލްޢަޒީޒް ހުށަހަޅުއްވައި، ތޮއްޑޫ ދާއިރާގެ މެންބަރު ޙުސައިން ސަމީރު ތާއީދުކުރައްވާފައިވަނީ އަހަރީ ރިޕޯޓްތައް ދިރާސާކުރެއްވުމުގެ ގޮތުން މިނިސްޓްރީތަކާއި އިދާރާތަކާ ބައްދަލުކުރައްވައި އަހަރީ ރިޕޯޓާގުޅޭ 30 މިނެޓަށްވުރެ ދިގު ނޫން ޕްރެޒެންޓާޝަނެއް ހުށަހެޅުއްވުމުގެ ފުރުޞަތު ދިނުމަށެވެ. އެ ހުށަހެޅުއްވުމަށް ވޯޓަށް އެއްސެވުމުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވެފައިވެއެވެ.

އެ ހުށަހެޅުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.