މިއަދުގެ ބައްދަލުވުމުގައި، ޤާނޫނު ނަންބަރު 4/2007 (އޮޑިޓް ޤާނޫނު) އަށާއި، ޤާނޫނު ނަންބަރު 3/2013 (ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓްކުރުމުގެ ޤާނޫނު) އަށް އިޞްލާޙު ގެނައުމަށް ރައްޔިތުންގެ މަޖިލީހަށް ހުށަހަޅާފައިވާ ބިލުތަކާ ގުޅިގެން، އެ އިޞްލާޙުތައް ގެނައުމާމެދު ބަންޑާރަނައިބާއި އޮޑިޓަރ ޖެނެރަލް ދެކެވަޑައިގަންނަވާ ގޮތް ލިޔުމުން ހޯއްދެވުމަށް، އެ އޮފީސްތަކަށް ސިޓީ ފޮނުއްވުމަށް ހުޅުމާލެ ދެކުނު ދާއިރާގެ މެންބަރު ޑޮކްޓަރ އަޙްމަދު ޝަމްހީދު ހުށަހެޅުއްވިއެވެ. މި ހުށަހެޅުއްވުމަށް ކޮމިޓީގައި ހާޒިރުވެވަޑައިގެން ތިއްބެވި އެއްވެސް މެންބަރު އިއުތިރާޒުކުރައްވާފައިނުވާތީ، އެގޮތަށް ރިޔާސަތުން ނިންމެވިއެވެ.

އެއަށްފަހު، އޮޑިޓަރ ޖެނެރަލްގެ އޮފީހުން ކޮށްފައިވާ ފެނަކަ ކޯޕަރޭޝަން ލިމިޓެޑްގެ ޚާއްޞަ އޮޑިޓް ރިޕޯޓުން ފާހަގަވެފައިވާ ކޮރަޕްޝަންގެ ޢަމަލުތައް ތަޙްޤީޤުކޮށް ފިޔަވަޅުއެޅުން އަވަސްކުރުމަށް ގޮވާލައި ހުށަހަޅާފައިވާ ޤަރާރުގެ މަސައްކަތް ކުރިއަށްގެންދާނެ ގޮތާމެދު މަޝްވަރާކުރެއްވިއެވެ. އެގޮތުން، ކޮމިޓީގެ އެދިލެއްވުމުގެ މަތިން ފެނަކަ ކޯޕަރޭޝަން ލިމިޓެޑާ ގުޅޭގޮތުން އޮޑިޓަރ ޖެނެރަލްގެ އޮފީހުން ނެރުއްވާފައިވާ ޚާއްޞަ އޮޑިޓް ރިޕޯޓުތަކުގެ މަސައްކަތްތައް، މި ޤަރާރުގެ މަސައްކަތްތަކާ އެކުއެކީ ކުރިއަށްގެންދިއުމަށާއި، ޤަރާރުގެ މަސައްކަތް ނިންމާނެ ސުންގަޑިއަކީ މި މަހުގެ ނިޔަލަށް (31 އޮކްޓޫބަރު 2025) ކަމުގައި ކަނޑައެޅުއްވުމަށް ކޮމިޓީގައި ހާޒިރުވެވަޑައިގެން ތިއްބެވި އެއްވެސް މެންބަރު އިއުތިރާޒުކުރައްވާފައިނުވާތީ، އެގޮތަށް ރިޔާސަތުން ނިންމެވިއެވެ. މީގެ އިތުރުން، ފެނަކަ ކޯޕަރޭޝަން ލިމިޓެޑާ ގުޅޭގޮތުން އޮޑިޓަރ ޖެނެރަލްގެ އޮފީހުން ނެރުއްވާފައިވާ ޚާއްޞަ އޮޑިޓް ރިޕޯޓުތަކާ ގުޅޭ އިތުރު މަޢުލޫމާތު ސާފުކުރެއްވުމަށް އޮޑިޓަރ ޖެނެރަލްގެ އޮފީސް އަދި ފެނަކަ ކޯޕަރޭޝަން ލިމިޓެޑާ ބައްދަލުކުރެއްވުމަށް ނިންމެވިއެވެ.

ކޮމިޓީގެ މިއަދުގެ ބައްދަލުވުމަށް އެޖެންޑާ ކުރެވިފައިވާ 4 އަދި 5 ވަނަ ނަންބަރުގައިވާ މައްސަލަތަކާމެދު ދެން އޮންނަ ކޮމިޓީ ބައްދަލުވުމެއްގައި މަޝްވަރާކުރެއްވުމަށް ރިޔާސަތުން ނިންމެވުމަށްފަހު، މިއަދުގެ ކޮމިޓީގެ ބައްދަލުވުން ނިންމަވާލެއްވިއެވެ.