މިއަދުގެ ބައްދަލުވުމުގައި ފުރަތަމަ ކަމަކަށް ކޮމިޓީން ކުރިއަށް ގެންދެވީ ހދ. މަކުނުދޫގައި ޤާއިމުކޮށްފައިވާ ވޭސްޓް މެނޭޖްމަންޓް ސެންޓަރު ހިންގުމުގެ ހުއްދަ ޔުޓިލިޓީ ރެގިއުލޭޓަރީ އޮތޯރިޓީން ލިބޭނެ ގޮތް ހައްދަވައިދެއްވުން އެދި ހދ. މަކުނުދޫ ކައުންސިލުން ހުށަހަޅާފައިވާ މައްސަލައެވެ. އެގޮތުން، އެ ސެންޓަރަށް ހުއްދަ ނުލިބޭ ސަބަބު ހޯދުމަށާއި މި މައްސަލައިގައި ހދ. މަކުނުދޫ ކައުންސިލުގެ ސިޓީއެއް ލިބިފައިވޭތޯއާއި ލިބިފައިވާނަމަ މިހާތަނަށް ޖަވާބުދެއްވާފައިނުވާ ސަބަބު ޔުޓިލިޓީ ރެގިއުލޭޓަރީ އޮތޯރިޓީން ލިޔުމުން ހޯދުމަށް މަތިވެރި ދާއިރާގެ މެންބަރު ޙަސަން ޒަރީރު ހުށަހަޅުއްވައި މުލަކު ދާއިރާގެ މެންބަރު އިބްރާހީމް ނައުފަލް ތާއީދުކުރެއްވިއެވެ.

އެ ހުށަހެޅުމަށް ތާއީދު ލިބި، އެއްވެސް މެންބަރަކު އިޢުތިރާޒުނުކުރައްވާތީ، ކޮމިޓީން އެގޮތަށް ނިންމެވިއެވެ.

ދެވަނަ ކަމަކަށް ކޮމިޓީން ކުރިއަށް ގެންދެވީ، ޔޫ އެންޑް މީ ރިސޯޓުން ގިރިއަކަށް ކުނި އަޅާ ކަމަށް ބުނެ ރައްޔިތުންގެ މަޖިލީހުގެ ވިސްލްބްލޯވަރ ޕްރޮޓެކްޝަން ކޮމިޓީން ހުށަހަޅާފައިވާ މައްސަލަ ކޮމިޓީން ދިރާސާކުރުމަށް، އެ ރިސޯޓަށް ކުރި ދަތުރުގެ މަޢުލޫމާތު ކޮމިޓީއާ ހިއްސާކުރުމެވެ. އެގޮތުން، ކޮމިޓީގެ ފަރާތުން އެ ރިސޯޓަށް ކުރި ދަތުރުގައި ފާހަގަވިކަންކަން ކޮމިޓީއާ ހިއްސާކުރެއްވުމަށްފަހު އެ މައްސަލަ ކޮމިޓީން ނިންމެވިއެވެ.

ތިންވަނަ ކަމެއްގެ ގޮތުގައި ކޮމިޓީން ކުރިއަށް ގެންދެވީ، މ. ކޮޅުފުށީގައި އިމާރާތްކޮށްފައިވާ 100 ހައުސިންގ ޔުނިޓަށް ފެނާއި ނަރުދަމާ އަދި ކަރަންޓުގެ ޚިދުމަތް ދިނުމަށް ބޭނުންވާ މަސައްކަތް ފެށިފައިނުވާތީ އެ ޚިދުމަތް ފޯރުކޮށްދެވޭނެ ދުވަހަކާ ގުޅޭގޮތުން ކަމާ ގުޅޭ އިދާރާތަކުން މަޢުލޫމާތު ސާފުކޮށްދިނުމަށް އެދި ހުށަހަޅާފައިވާ މައްސަލައެވެ. އެގޮތުން، އެ މައްސަލައިގެ އެންމެ ފަހުގެ މަޢުލޫމާތު ހޯދުމަށް ކޮމިޓީން ކަމާ ގުޅޭ އިދާރާތަކަށް ފޮނުވާފައިވާ ސިޓީތަކުގެ ޖަވާބު ލިބިފައިވާތީ، އެ ސިޓީތަކާ މެދު ކޮމިޓީގައި މަޝްވަރާކުރެއްވިއެވެ. އަދި، އެ މަޝްރޫޢު ފެނަކަ ކޯޕަރޭޝަނާ ހަވާލުކުރެވޭނީ މިނިސްޓްރީ އޮފް ފިނޭންސް އެންޑް ޓްރޭޑް އިން ބަޖެޓް ހަމަޖައްސަވައިދެއްވުމުން ކަމަށް، މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުގެ ސިޓީގައި ފާހަގަކޮށްފައިވާތީ، އެ މަޝްރޫޢުއަށް ބޭނުންވާ ބަޖެޓް ހަމަޖައްސަވައިދެވޭނެ ތާރީޙެއް މިނިސްޓްރީ އޮފް ފިނޭންސް އެންޑް ޓްރޭޑުން ހޯދުމަށް ކޮމިޓީން ނިންމެވިއެވެ.

ދެން، ކޮމިޓީން ކުރިއަށް ގެންދެވީ، ތިމާވެއްޓަށް ގެއްލުން ލިބޭ ފަދަ އެކިއެކި މައްސަލަތަކާ ގުޅިގެން ޖޫރިމަނާކޮށްފައިވާ ފަރާތްތަކުން ޖޫރިމަނާ ފައިސާ ނުދައްކާ މައްސަލައިގައި ކޮމިޓީން ތައްޔާރުކޮށްފައިވާ ރިޕޯޓާމެދު ގޮތެއް ނިންމުމުގެ މައްސަލައެވެ. އެގޮތުން، ސެކްރެޓޭރިއެޓުން އެ ރިޕޯޓު ކޮމިޓީއަށް އިއްވެވުމުން، އެ ރިޕޯޓާ މެދު ކޮމިޓީން މަޝްވަރާކުރެއްވިއެވެ. އަދި، ދެން އަންނަ ބައްދަލުވުމެއްގައި އެ ރިޕޯޓަށް ގޮތެއް ނިންމެވުމަށް މިއަދުގެ ބައްދަލުވުން ނިންމަވާލެއްވިއެވެ.